დღეს, ბათუმის შოთა რუსთაველის სახელმწიფო უნივერსიტეტში „ბათუმობის’’ სახალხო დღესასწაულთან დაკავშირებით VII საერთაშორისო სამეცნიერო კონფერენცია გაიხსნა სახელწოდებით „ბათუმი-წარსული და თანამედროვეობა’’. სესიაზე 60-მდე მეცნიერი მოხსენებას წარმოადგენს შავიზღვისპირა ქალაქის ისტორიაზე, თანამედროვეობაზე, არქეოლოგიაზე, ეთნოგრაფიასა და ურბანული განვითარების ტენდენციებზე.
წიგნის -„აჭარა: ტურისტულ-მხარეთმცოდნეობითი რესურსები“ პრეზენტაცია გაიმართა ბათუმის შოთა რუსთაველის სახელმწიფო უნივერსიტეტში. სახელმძღვანელო ნიკო ბერძენიშვილის ინსტიტუტის ბაზაზე (სარედაქციო კოლეგიის თავმჯდომარე რ. მალაყმაძე) მომზადდა და განკუთვნილია ტურიზმის ფაკულტეტის სტუდენტებისთვის და ამ სფეროთი დაინტერესებულთათვის. წიგნის საშუალებით მკითხველს საშუალება ექნებათ გაეცნონ აჭარის, მისი ცალკეული მუნიციპალიტეტების ისტორიას, ეკონომიკას, ბუნებას, მოსახლეობის ეთნიკურ და კონფესიურ სტრუქტურას, ტრადიციულ მატერიალურ და სულიერ საუნჯეს, ფოლკლორს, მეცნიერებას, ხელოვნებას და კულტურას, მატერიალური კულტურის ძეგლებს, ბუნების დაცულ ტერიტორიებს.
უნივერსიტეტში საერთაშორისო კონფერენცია „ჩვენი სულიერების ბალავარი“ გაიხსნა. რიგით მერვე სამეცნიერო კონფერენციაში 60 -მდე ქართველი და უცხოელი მეცნიერი მონაწილეობს. მკვლევრები ორი დღის განმავლობაში მოხსენებებს წარმოადგენენ ქრისტიანობის ისტორიის და ქართული მართლმადიდებლური ეკლესიის აქტუალურ საკითხებზე. კონფერენციის მოხსენებები კრებულის სახით უკვე დაიბეჭდა. საერთაშორისო სამეცნიერო კონფერენცია ბათუმის შოთა რუსთაველის სახელმწიფო უნივერსიტეტის ნიკო ბერძენიშვილის კვლევითი ინსტიტუტის ორგანიზებით ტარდება.
აკადემიკოს ივანე ჯავახიშვილის დაბადების 140 წლისთავისადმი მიძღვნილი სამეცნიერო სესია გაიმართა ბათუმის შოთა რუსთაველის სახელმწიფო უნივერსიტეტში. უმაღლესი საგანმანათლებლო დაწესებულების ნიკო ბერძენიშვილის ინსტიტუტის მკვლევრებმა, ჰუმანიტარულ მეცნიერებათა ფაკულტეტის ისტორიის, არქეოლოგიისა და ეთნოლოგიის დეპარტამენტის პროფესორ-მასწავლებლებმა და მეცნიერ-თანამშრომლებმა კონფერენციაზე მოხსენებები წარმოადგინეს ცნობილი ქართველი მეცნიერის ცხოვრებასა და მოღვაწეობაზე. მომხსენებლებმა ისაუბრეს აკადემიკოსის როლზე ქართული უნივერსიტეტის დაარსების საქმეში და მეცნიერის შრომებში ქართული სამართლის, ეტიკეტისა და ეთნოლოგიის საკითხები განიხილეს.
