ბათუმის შოთა რუსთაველის სახელმწიფო უნივერსიტეტის იურიდიული ფაკულტეტის სტუდენტებისათვის პროფესორმა, ბსუ-ს საპატიო დოქტორმა თომას კრუსმანმა სემინარი ჩაატარა თემაზე: „გერმანული კაზუისტიკის მეთოდიკა ქართულ სისხლის სამართალში“. ლექცია მიზნად ისახავდა სწავლებას კაზუსის ამოხსნის გერმანულ მეთოდიკაზე შედარებით-სამართლებრივი ანალიზის საფუძველზე როგორც ანგლო-საქსური პრეცედენტული სამართლის, ისე გერმანულ სისხლის სამართალში გახმაურებული საქმის მეშვეობით. ასევე გაიმართა დისკუსია საკითხზე, თუ როგორ უნდა შეფასდეს პოლიციის განყოფილების უფროსის მოვალეობის შემსრულებლის ქმედება - წამების მუქარა ეჭვმიტანილის მიმართ მცირეწლოვანი მძევლის ადგილსამყოფლის თაობაზე ინფორმაციის მიწოდების მიზნით.

ევროპის იურიდიული ფაკულტეტების ასოციაციის (European Law Faculties Association) ეგიდით 25-27 აპრილს, ესპანეთის ქალაქ ბარსელონაში გაიმართა საერთაშორისო კონფერენცია სახელწოდებით: „იურიდიული განათლება: ცოდნა და უნარები“. კონფერენციის მუშაობაში მონაწილეობა მიიღეს ბსუ-ს იურიდიული ფაკულტეტის დეკანმა, პროფესორმა ადამ მახარაძემ და ამავე ფაკულტეტის ასისტენტმა არმაზ კახიძემ. ბათუმის შოთა რუსთაველის სახელმწიფო უნივერსიტეტის იურიდიული ფაკულტეტი 2015 წლიდან არის ევროპის იურიდიული ფაკულტეტების ასოციაციის წევრი.

საქართველოს პარლამენტის საგარეო ურთიერთობათა კომიტეტის თავმჯდომარემ სოფიო ქაცარავამ, ადამიანის უფლებების დაცვის სამდივნოს უფროსმა მარიამ ჯაჯანიძემ და სახალხო დამცველის თანასწორობის დეპარტამენტის უფროსმა ქეთევან შუბაშვილმა ბათუმის შოთა რუსთაველის სახელმწიფო უნივერსიტეტის პროფესორ-მასწავლებლებთან და სტუდენტებთან ადამიანის უფლებათა დაცვის საკითხებზე შეხვედრა გამართეს. ღონისძიების მონაწილეებმა სოციალური და სამოქალაქო-პოლიტიკური უფლებების დამოკიდებულებაზე ისაუბრეს, სახელმწიფოს მზარდი სოციალური პასუხისმგებლობა განიხილეს საქართველოს ევროინტეგრაციის პროცესის კონტექსტში და სამოქალაქო-პოლიტიკური უფლებების განხორციელების გათვალისწინებით სოციალური უფლებების რეალიზების მნიშვნელობაზე იმსჯელეს.

ბათუმის შოთა რუსთაველის სახელმწიფო უნივერსიტეტის იურიდიული ფაკულტეტის სასამართლო საიმიტაციო დარბაზში ასოცირებული პროფესორ ომარ ფარტენაძის ხელმძღვანელობით ჩატარდა სასამართლო იმიტირებული პროცესი სისხლის სამართლის მიმართულებით. მომავალმა სამართალმცოდნეებმა სასწავლო კურსის „ადვოკატირების საფუძვლები“ ფარგლებში მეოთხე კურსის სტუდენტებმა სისხლის სამართლის საქმე განიხილეს კანონმდებლობით გათვალისწინებულ ყველა სტადიის გათვალისწინებით. იმიტირებული პროცესი ნაფიცი მსაჯულების მიერ გამამართლებელი ვერდიქტის გამოტანით დასრულდა.