ლევან სამხარაულის სახელობის სასამართლო ექსპერტიზის ეროვნული ბიუროს აჭარის რეგიონული ექსპერტიზის დეპარტამენტის ექსპერტ-ფსიქოლოგმა ქეთევან დიასამიძემ ბათუმის შოთა რუსთაველის სახელმწიფო უნივერსიტეტში სოციალურ მეცნიერებათა, ბიზნესისა და სამართალმცოდნეობის ფაკულტეტის სტუდენტების მოთხოვნით ღია ლექცია წაიკითხა თემაზე: „სასამართლო ექსპერტიზის წარმოების შემთხვევების განხილვა“. ექსპერტმა განიხილა კონკრეტული შემთხვევები და ისაუბრა ფსიქოლოგიური ექსპერტიზის მეთოდებზე.

,,გაიღე სისხლი-გადაარჩინე სიცოცხლე“ - ამ დევიზით ბათუმის შოთა რუსთაველის სახელმწიფო უნივერსიტეტის სოციალურ მეცნიერებათა, ბიზნესისა და სამართალმცოდნეობის ფაკულტეტის სტუდენტებმა და პროფესორ-მასწავლებლებმა აქცია გამართეს. სისხლი 30-მდე სტუდენტმა და აკადემიურმა პერსონალმა გაიღო, ხოლო დონორობის სურვილი 100-ზე მეტმა გამოთქვა. ღონისძიება მიზნად ისახავს დახმარება გაუწიოს იმ პირებს, რომელთაც სისხლი ესაჭიროებათ, თითოეული ადამიანისგან უსასყიდლოდ გაღებული სისხლი მათ სიცოცხლეს გაუხანგრძლივებს.

2014 წლის 15-16 აპრილს იტალიის დედაქალაქ რომში, საპიენზას უნივერსიტეტის პოლიტიკურ მეცნიერებათა დეპარტამენტის ორგანიზებით გაიმართა საერთაშორისო სამეცნიერო კონფერენცია „ნახევრად საპრეზიდენტო მმართველობა ევროპაში და მის ფარგლებს გარეთ“. კონფერენციაზე წარმოდგენილი იყო 30 მოხსენება იტალიის, პოლონეთის, ჩეხეთის, ირლანდიის, დიდი ბრიტანეთის, აშშ-ის, პორტუგალიის, ფინეთის, საქართველოს, ლიტვის, სლოვაკეთის, დანიის, შვედეთის სხვადასხვა უნივერსიტეტების პროფესორთა მიერ. საქართველოს სახელით კონფერენციის მუშაობაში მონაწილეობა მიიღო სოციალურ მეცნიერებათა, ბიზნესისა და სამართალმცოდნეობის ფაკულტეტის ასოცირებულმა პროფესორმა მალხაზ ნაკაშიძემ, რომელმაც წარადგინა მოხსენება თემაზე: „ნახევრად საპრეზიდენტო მმართველობის სისტემა საქართველოში“. მალხაზ ნაკაშიძის მოხსენება „ნახევრად საპრეზიდენტო მმართველობა საქართველოში“ 2015 წელს გამოიცემა მონოგრაფიის: „ნახევრად საპრეზიდენტო მმართველობის სისტემა ცენტრალურ აზიასა და კავკასიაში“ ერთ-ერთი თავის სახით დიდ ბრიტანეთში ცნობილი გამომცემლობის „Palgrave Macmillan“-ის მიერ.

საქველმოქმედო ორგანიზაციის „პირველი ნაბიჯი საქართველოს“ ბათუმის ფილიალის მენეჯერმა ინგა ზარანდიამ სოციალურ მეცნიერებათა, ბიზნესისა და სამართალმცოდნეობის ფაკულტეტის სტუდენტებს ღია ლექცია წაუკითხა. მომხსენებლმა ახალგაზრდებს საქართველოში არსებული „ადრეული ჩარევის“ სახელმწიფო პროგრამა გააცნო და განსაკუთრებული საჭიროების მქონე ბავშვების აქტუალურ საკითხებზე ისაუბრა. „პირველი ნაბიჯი საქართველოს“ მიზანია შეზღუდული შესაძლებლობის მქონე ბავშვებისა და ახალგაზრდების ცხოვრების ხარისხის გაუმჯობესება. 15 წლის მანძილზე, ორგანიზაციის ძალისხმევის შედეგად, ასობით შეზღუდული შესაძლებლობის მქონე ბავშვმა დატოვა ბავშვთა სახლი, გაიარა სარეაბილიტაციო მომსახურება, შეძლო განათლების სისტემაში ჩართვა და სოციალური ინტეგრაცია.

ლევან სამხარაულის სახელობის სასამართლო ექსპერტიზის ეროვნული ბიუროს აჭარის რეგიონული ექსპერტიზის დეპარტამენტის ექსპერტ-ფსიქოლოგმა ქეთევან დიასამიძემ ბათუმის შოთა რუსთაველის სახელმწიფო უნივერსიტეტში სოციალურ მეცნიერებათა, ბიზნესისა და სამართალმცოდნეობის ფაკულტეტის სტუდენტებისათვის ღია ლექცია წაიკითხა თემაზე: „სასამართლო ფსიქოლოგიური ექსპერტიზა“. მომხსენებელმა ისაუბრა თუ რა როლი აკისრია ფსიქოლოგს სასამართლო ექსპერტიზის ჩატარების პროცესში, რა უნარებს უნდა ფლობდეს იგი და როგორ იცავდეს კონფიდენციალობას.