ბათუმის შოთა რუსთაველის სახელმწიფო უნივერსიტეტის სოციალურ მეცნიერებათა, ბიზნესისა და სამართალმცოდნეობის ფაკულტეტის ფსიქოლოგიის III კურსის სტუდენტებმა აუტიზმის საერთაშორისო დღისადმი მიძღვნილი შეხვედრა გამართეს. ღონისძიება მიზნად ისახავდა აუტიზმთან დაკავშირებული აქტუალური საკითხების განხილვასა და საზოგადოების ცნობიერების ამაღლებას. შეხვედრაზე სტუდენტები გაეცნენ აუტისტ ბავშვებთან მუშაობის ისეთ თანამედროვე მეთოდებს, როგორიცაა: ABA (ქცევის) და PESI (კომუნიკაციური უნარ-ჩვევების განვითარების) თერაპია. მომავალმა ფსიქოლოგებმა ღონისძიების ფარგლებში მათ მიერ დამზადებული საინფორმაციო ბროშურები დაარიგეს და მოქალაქეებს აუტიზმის მქონე პირთა თანადგომისაკენ მოუწოდეს. აუტიზმის საერთაშორისო დღე სტუდენტებთან ერთად, აუტისტი ბავშვების მშობლებმა, IX და IX სკოლის ფსიქოლოგებმა, ABA და PESI თერაპევტმა ქეთევან გოგიტიძემ და საქართველოს განათლებისა და მეცნიერების სამინისტროს მულტიდისციპლინარული გუნდის წევრმა ციალა ტუღუშმა აღნიშნეს.

აუტიზმის საერთაშორისო დღესთან დაკავშირებით ბათუმის შოთა რუსთაველის სახელმწიფო უნივერსიტეტის სტუდენტური თვითმმართველობისა და სოციალურ მეცნიერებათა, ბიზნესისა და სამართალმცოდნეობის ფაკულტეტის წარმომადგენლებმა ინკლუზიური ჯგუფის მოზარდები მოინახულეს და ტკბილეული გადასცეს. შეხვედრა მიზნად ისახავდა აუტიზმის მქონე პირთა საზოგადოებაში ინტეგრირების ხელშეწყობასა და ცნობიერების გაზრდას. ბათუმის მე-6 საჯარო სკოლაში არსებული ინტეგრირებული ჯგუფის მოსწავლეებმა და თამარის დასახლებაში საოჯახო ტიპის სახლში მყოფმა განსაკუთრებული საჭიროების მქონე ბავშვებმა სტუდენტებს სხვადასხვა სახის ნამუშევრები, ნახატები და თიხისგან დამზადებული ნივთები წარუდგინეს. 2007 წლის 18 დეკემბერს გენერალურმა ასამბლეამ 2 აპრილი აუტიზმის შესახებ ინფორმაციის გავრცელების მსოფლიო დღედ გამოაცხადა.

სოციალურ მეცნიერებათა ბიზნესისა და სამართალმცოდნეობის ფაკულტეტის სტუდენტების არასამთავრობო ორგანიზაცია ,,აბროგაციამ’’ აჭარის სპორტისა და ახალგაზრდობის საქმეთა დეპარტამენტის ფინანსური მხარდაჭერით განახორციელა პროექტი: ,,უკეთესი მომავლისათვის მისია - საუკეთესო იურისტები’’. პროექტი მიზნად ისახავდა არაფორმალური განათლების გზით იმიტირებული სასამართლო პროცესების ჩატარებას, რაც ხელს შეუწყობს სტუდენტების პრაქტიკული განათლების მიღებას. სამართალმცოდნეობის სპეციალობის სტუდენტებს პროექტის ფარგლებში თბილისის სააპელაციო და უზენაეს სასამართლოების მოსამართლეებმა ტრენინგები ჩაუტარეს. პროექტის მონაწილე სტუდენტებს სერტიფიკატები გადაეცათ.

USAID-ის JILEP-ის ორგანიზებით კახეთის რეგიონში, კაჭრეთში საქართველოს უმაღლეს საგანმანათლებლო დაწესებულებათა იურიდიული კლინიკების წარმომადგენელთა კონფერენცია გაიმართა. საქართველოს წამყვანი უმაღლესი საგანმანათლებლო დაწესებულებების იურიდიული კლინიკების იურისტებმა კლინიკური სწავლების ფორმატის განვითარებისა და კლინიკების გაერთიანების საკითხები განიხილეს. კონფერენციის მუშაობაში მონაწილეობა მიიღეს ბათუმის შოთა რუსთაველის სახელმწიფო უნივერსიტეტის იურიდიული კლინიკის დირექტორმა ლევან ჯაყელმა, პროფესორმა კახა ფალავანდიშვილმა, სტუდენტებმა: ლევან კუტუბიძემ და თეა წულუკიძემ.

უკრაინაში, ქალაქ კიევში ტარას შევჩენკოს სახელობის სახელმწიფო უნივერსიტეტში გამართულ სტუდენტთა, დოქტორანტთა და ახალგაზრდა მეცნიერთა XII საერთაშორისო კონფერენციაში: „ШЕВЧЕНКIВСЬКА ВЕСНА: ЕКОНОМIКА 2014“ მონაწილეობა მიიღეს ბათუმის შოთა რუსთაველის სახელმწიფო უნივერსიტეტის ,,მენეჯმენტის” სპეციალობის მე-4 კურსის სტუდენტებმა. პროფესორ გელა მამულაძის ხელმძღვანელობით მანანა დიდმანიძემ, დარინა გორგილაძემ და ქეთევან თავდგირიძემ სესიაზე მოხსენებები წაიკითხეს ისეთ მნიშვნელოვან საკითხებზე, როგორიცაა: „სარეკლამო ბიზნესში არსებული ტენდენციები და პერსპექტივა“, „კომერციული ბანკების პრობლემები და მათი გადაჭრის გზები“, „მართვის პრობლემები ვაჭრობის სფეროში და მათი აღმოფხვრის გზები“. ხუთდღიან კონფერენციაზე წარდგენილი ნაშრომები კონფერენციის შრომების კრებულში დაიბეჭდა და ფორუმის მონაწილე სტუდენტებს სერთიფიკატები გადაეცათ. სოციალურ მეცნიერებათა, ბიზნესისა და სამართალმცოდნეობის ფაკულტეტი სტუდენტებს ულოცავს წარმატებას.