28 თებერვალს უკრაინის მეცნიერებათა აკადემიის კიევის სამართლის უნივერსიტეტის ბაზაზე გაიმართა ცნობილი უკრაინელი მეცნიერის ვლადიმერ კორეცკის ხსოვნისადმი მიძღვნილი საერთაშორისო სამეცნიერო-პრაქტიკული კონფერენცია. კონფერენციის თანაორგანიზატორი იყო ბათუმის შოთა რუსთაველის სახელმწიფო უნივერსიტეტის იურიდიული ფაკულტეტი. კონფერენციაზე მისასალმებელი სიტყვით გამოვიდნენ და მოხსენებები წაიკითხეს იურიდიული ფაკულტეტის დეკანმა, პროფესორმა ადამ მახარაძემ და ამავე ფაკულტეტის ასისტენტ პროფესორმა, რექტორის თანაშემწემ არმაზ კახიძემ.

საკონსტიტუციო სამართლის საერთაშორისო ასოციაციის აღმასრულებელი კომიტეტის გადაწყვეტილებით, ბათუმის შოთა რუსთაველის სახელმწიფო უნივერსიტეტის იურიდიული ფაკულტეტის ასოცირებული პროფესორი მალხაზ ნაკაშიძე საკონსტიტუციო სამართლის საერთაშორისო ასოციაციის წევრი გახდა. ასოციაიცია საერთაშორისო ორგანიზაციაა, რომელიც აერთიანებს საგანმანათლებლო, კვლევით ინსტიტუტებს, ინდივიდუალურ წევრებს მსოფლიოს სხვადასხვა ქვეყნიდან და კონსტიტუციური სამართლის სფეროში საგანმანათლებლო, კვლევითი გამოცდილების გაზიარებას ემსახურება. მალხაზ ნაკაშიძე, როგორც ასოციაციის სრულუფლებიანი წევრი, 2018 წლის აპრილში მიწვეულია საერთაშორისო ორგანიზაციის მიერ დაგეგმილ მრგვალ მაგიდაზე ქალაქ შანხაიში და საკონსტიტუციო სამართლის მსოფლიო კონგრესზე.

საქართველოს ნოტარიუსთა პალატის გამგეობის თავმჯდომარე მარიკა გოგოლაძე პროექტის „პროფესია ნოტარიუსი“ ფარგლებში ბათუმის სახელმწიფო უნივერსიტეტის იურიდიული ფაკულტეტის სტუდენტებისათვის საჯარო ლექცია წაიკითხა ნოტარიუსის პროფესიის შესახებ. პროექტი მიზნად ისახავდა ახალგაზრდებისათვის სანოტარო საქმიანობის უკეთ გაცნობას. საჯარო ლექცია მომავალ იურისტებს პროფესიული არჩევანის გაკეთებაში დაეხმარება, ხოლო ნოტარიატის სისტემას კი საშუალებას მისცემს, მიიზიდოს ახალგაზრდა მოტივირებული კადრები.

იურიდიული ფაკულტეტის სამოქალაქო განათლების კურსის „დემოკრატია და მოქალაქეობა“ სტუდენტების პროექტების პრეზენტაცია გაიმართა ბათუმის შოთა რუსთველის სახელმწიფო უნივერსიტეტში. სამოქალაქო განათლების საუნივერსიტეტო კურსი ბსუ-ში ამერიკული სამთავრობო ორგანიზაციების USAID-სა და IEFS-ს მხარდაჭერით 5 წელზე მეტია დაინერგა და მიზნად ისახავს სტუდენტთა ჩართულობას საზოგადოებრივი ამოცანების გადაწყვეტაში. დღემდე სასწავლო კურსის ფარგლებში განხორციელდა 300-ზე მეტი სოციალური და საქველმოქმედო პროექტი.

ბათუმის შოთა რუსთაველის სახელმწიფო უნივერისტეტში აჭარის ავტონომიური რესპუბლიკის უმაღლესი საბჭოს თავმჯდომარე და საორგანიზაციო კომისიის წარმომადგენლები იურიდიული, სოციალურ და პოლიტიკურ მეცნიერებათა, ეკონომიკისა და ბიზნესის ფაკულტეტების სტუდენტებს შეხვდნენ.