საქართველოს იუსტიციის უმაღლესმა საბჭომ 2018 წლის ივლისში მოსამართლეობის საკვალიფიკაციო გამოცდები ჩაატარა. გამოცდაზე გავიდა საქართველოს მასშტაბით 233 გამოსაცდელი, ორივე გამოცდა წარმატებით ჩააბარა 52-მა , სასიხარულოა, რომ წარმატებულებს შორის, ოთხი მათგანი - გვანცა თურმანიძე, მამუკა ზოიძე, ჯაბა სურმანიძე და არჩილ ჯორთმენაძე ბათუმის შოთა რუსთაველის სახელმწიფო უნივერსიტეტის იურიდიული ფაკულტეტის კურსდამთავრებულები არიან.
ბათუმის შოთა რუსთაველის სახელმწიფო უნივერსიტეტის საერთაშორისო საზაფხულო სკოლა „ევროკავშირის სამართალი და ევროინტეგრაცია სამხრეთ კავკასიაში“ დასრულდა. აჭარის ა.რ. უმაღლესი საბჭოს თავმჯდომარემ დავით გაბაიძემ მე-6 საერთაშორისო საზაფხულო სკოლის მონაწილეებსა და პროფესორ-მასწავლებლებს უმასპინძლა. დავით გაბაიძემ შეხვედრის მონაწილეებს, აჭარის ავტონომიური რესპუბლიკის სტატუსზე, ახლად მიღებულ კონსტიტუციასა და უმაღლესი საბჭოს საქმიანობის ძირითად პრინციპებზე მიაწოდა ინფორმაცია, ისაუბრა ქვეყნის ევროპულ სტრუქტურებში ინტეგრაციისა და მსგავსი პროექტების ჩვენს რეგიონში ჩატარების მნიშვნელობაზე. უმაღლესი საბჭოს თავმჯდომარემ პროექტის ორგანიზატორებს მომავალი საზაფხულო სკოლის მაღალმთიან აჭარაში ჩატარება შესთავაზა და უპასუხა შეხვედრის მონაწილეთა შეკითხვებს.
ბათუმის შოთა რუსთაველის სახელმწიფო უნივერსიტეტის ორგანიზებით მეექვსე საერთაშორისო საზაფხულო სკოლა „ევროკავშირის სამართალი და ევროინტეგრაცია სამხრეთ კავკასიაში“ გაიხსნა. საზაფხულო სკოლის მიზანია სამხრეთ კავკასიის რეგიონთან მიმართებაში ევროპეიზაციის სხვადასხვა ჭრილში წარმოჩენა და განხილვა. კერძოდ, როგორ და რა მასშტაბით შეიძლება ევროპეიზაციამ იქონიოს გავლენა რეგიონის პოლიტიკურ ინსტიტუტებზე, უსაფრთხოების სტრატეგიაზე, კანონმდებლობაზე, სოციალურ და კულტურულ საკითხებზე. ასევე, პოსტსაბჭოთა ქვეყნების განვითარების გაანალიზება ევროპეიზაციის გზაზე. საზაფხულო სკოლა ბსუ-ს პრორექტორმა თამარ სირაძემ, იურიდიული ფაკულტეტის დეკანმა ადამ მახარაძემ, აჭარის უმაღლესი საბჭოს თავმჯდომარემ დავით გაბაიძემ, უკრაინის მეცნიერებათა აკადემიის კიევის სამართლის უნივერსიტეტის დირექტორმა ვლადიმერ იაკიმჩუკმა და ავსტრიის გრაცის უნივერსიტეტის პროფესორმა ბენედიქტ ჰარცლიმ გახსნეს.
უკრაინის მეცნიერებათა აკადემიის სამართლის უნივერსიტეტის პროფესორს, ინფორმაციული განათლების მეცნიერების საერთაშორისო აკადემიის ნამდვილ წევრს, მშვიდობის ელჩს იური ბოშიცკის ბათუმის შოთა რუსთაველის სახელმწიფო უნივერსიტეტის განვითარებაში შეტანილი წვლილისათვის, აკადემიური საბჭოს გადაწყვეტილებით, საპატიო დოქტორის წოდება მიენიჭა. პროფესორმა იური ბოშიცკიმ ხელი შეუწყო კიევის ერთადერთი სამართლის უნივერსიტეტის განვითარებას. მისი ძირითადი სამეცნიერო მოღვაწეობა დაკავშირებულია ინტელექტუალური საკუთრების სამართლის თეორიული საფუძვლების გამოკვლევასა და უკრაინის ინტელექტუალური საკუთრების სამართლის სკოლის შექმნასთან.
თანამშრომლობის მემორანდუმი გაფორმდა ბათუმის შოთა რუსთაველის სახელმწიფო უნივერსიტეტის იურიდიულ ფაკულტეტსა და გდანსკის უნივერსიტეტის სამართლისა და ადმინისტრირების ფაკულტეტს შორის. ხელშეკრულება ითვალისწინებს ერთობლივი სასწავლო-საგანმანათლებლო და სამეცნიერო პროექტების განხორციელებას. მემორანდუმის ფარგლებში ამოქმედდება გაცვლითი პროგრამები სტუდენტებისა და პროფესორ-მასწავლებლების მონაწილეობით, ჩატარდება სამეცნიერო კონფერენციები, ტრენინგები და სემინარები.
