ქალთა მიმართ ძალადობის აღმოფხვრის საერთაშორისო დღე ბათუმის შოთა რუსთაველის სახელმწიფო უნივერსიტეტში სოციალურ და პოლიტიკურ მეცნიერებათა ფაკულტეტის სტუდენტებთან შეხვედრით აღინიშნა. ფაკულტეტის დეკანის მოვალეობის შემსრულებელი, ასოცირებული პროფესორი ქეთევან ბერიძე ახალგაზრდებს მოძალადის და მსხვერპლის პორტრეტზე, ძალადობის გამომწვევ მიზეზებზე, საქართველოში არსებულ მდგომარეობასა და გახშირებული შემთხვევების ფსიქოლოგიურ მექანიზმებზე ესაუბრა. ღონისძიების დასასრულს, სტუდენტები და პროფესორ-მასწავლებლები ქალთა მიმართ ძალადობის შესაჩერებლად ბათუმში, ერას მოედანზე გამართულ აქციას შეუერთდნენ და გენდერული ძალადობის მსხვერპლთა მიმართ სოლიდარობა გამოხატეს. გენდერული ძალადობის წინააღმდეგ დაწყებული საერთაშორისო კამპანია 16 დღეს გაგრძელდება.

ბათუმის შოთა რუსთაველის სახელმწიფო უნივერსიტეტის იურიდიულ, ეკონომიკისა და ბიზნესისა და სოციალურ და პოლიტიკურ მეცნიერებათა ფაკულტეტებსა და „ა(ა)იპ შეზღუდული შესაძლებლობების მქონე პირთა უფლებებისათვის“ შორის მემორანდუმი გაფორმდა. ხელშეკრულება ითვალისწინებს შშმ პირთა განვითარების ხელშეწყობას, სემინარების ჩატარებას, ერთობლივი პროგრამების დაგეგმვასა და განხორციელებას. ღონისძიების ფარგლებში ორგანიზაციის თავმჯდომარემ თამაზ მჟავანაძემ ახალი პროექტი - „სტუდენტთა სამართლებრივი და ფსიქოლოგიური პრაქტიკული სწავლების ხელშეწყობისათვის“ წარადგინა.

ტემპუსის პროექტის - INOTLES (Innovating of Teaching and Learning of Europea Studies) ფარგლებში სოციალურ მეცნიერებათა დეპარტამენტში საერთაშორისო ურთიერთობებისა და ევროპისმცოდნეობის პროფესორ-მასწავლებლების მონაწილეობით webinar-ი ჩატარდა. ონლაინ-კონფერენციაში პროექტში ჩართული ევროპის 10 უმაღლესი სასწავლებელი (ბელგია, ნიდერლანდები, დიდი ბრიტანეთი, უნგრეთი საქართველო, მოლდოვა, უკრაინა) მონაწილეობდა. რიგით მეორე სემინარზე სტუდენტთა ჩაჭრის თავიდან აცილების ეფექტური მეთოდები და სწავლების პროცესში სიმულაციის მეთოდების გამოყენების საკითხები განიხილეს.