7-8 სექტემბერს, გრიგოლ რობაქიძის სახელობის უნივერსიტეტის ბათუმის წარმომადგენლობაში გაიმართება მე-15 საერთაშორისო კონგრესი: „CUDES 2024: 15th International Congress on Current Debates in Social Sciences“. მასპინძელი უნივერსიტეტი ორგანიზებას გაუწევს კონფერენციის, დებატებისა და დისკუსიების ჩატარებას. CUDES-ი არის პლატფორმა მეცნიერებისთვის, მკვლევრებისა და სტუდენტებისათვის, რათა ჩაერთონ მნიშვნელოვან დისკურსში სოციალური მეცნიერებების თანამედროვე საკითხების განსახილველად.

შოთა რუსთაველის საქართველოს ეროვნული სამეცნიერო ფონდი აცხადებს 2024 წლის შავი ზღვისა და ზღვისპირა რეგიონის კვლევების საგრანტო კონკურსს - „შავი ზღვის ლურჯი განვითარება“. პროექტის მიზანია ახალი ცოდნის შექმნა, ახალი იდეებისა და კონცეფციების, მოვლენებისა და ფაქტების, თეორიებისა და მოდელების თეორიული და ექსპერიმენტული შესწავლა-ანალიზი, რაც გრძელვადიან პერსპექტივაში ხელს შეუწყობს ქვეყანაში შავი ზღვისა და ზღვისპირა რეგიონის შემსწავლელი კვლევების განვითარებასა და სოციალურ-პოლიტიკურ, ეკონომიკურ, საზოგადოებრივ, კულტურულ და საინფორმაციო-ტექნოლოგიურ პროგრესს.

2024 წლის 21-22 ივნისს, კავკასიის უნივერსიტეტში გაიმართება მეცხრე წლიური საერთაშორისო კონფერენცია „მეცნიერება მდგრადი განვითარებისთვის 2024". საერთაშორისო კონფერენციში მონაწილეობის მიღება შეუძლიათ როგორც აკადემიური ხარისხის მქონე პირებს, ისე დოქტორანტებს.აბსტრაქტების მიღების ბოლო ვადაა 2024 წლის 10 მაისი. კონფერენციაზე წარმოდგენილი ნაშრომები გამოქვეყნდება საერთაშორისო კონფერენციის კრებულში. დამატებითი ინფორმაციისათვის, გთხოვთ, ეწვიოთ ბმულს: https://www.cu.edu.ge/ka/survey/international-scientific-conference-science-for-sustainable-development-2024

ბათუმის შოთა რუსთაველის სახელმწიფო უნივერსიტეტსა და ბუქარესტის უნივერსიტეტის თანამშრომლობის ფარგლებში რუმინული ჟურნალი „Journal of Urban Anthropology“, რომლის მიმდინარე ნომერი ეძღვნება კავკასიას, სთავაზობს ბსუ-ს აკადემიურ და სამეცნიერო პირებს ჟურნალში სამეცნიერო სტატიის განთავსებას.აბსტრაქტის (დაახლოებით 300 სიტყვა) წარდგენის ვადა 2024 წლის 1 აპრილამდე, ელექტრონული ფოსტის მისამართზე antropologie@muzeulbucurestiului.ro. სრული ნაშრომები უნდა იყოს წარდგენილი 2024 წლის 1 ივნისამდე.

განათლების საერთაშორისო ცენტრი საერთაშორისო სტანდარტების უნარებისა და ცოდნის მქონე კადრების მომზადების მიზნით, სახელმწიფოს განვითარების პრიორიტეტების გათვალისწინებით, ახორციელებს სასტიპენდიო პროგრამებს საქართველოს მოქალაქეებისთვის საზღვარგარეთ სწავლის ხელშეწყობის მიზნით. ცენტრის საერთაშორისო თანამშრომლობაში აღსანიშნავია ჩინეთის სახალხო რესპუბლიკის მთავრობის მხარდაჭერა. გარდა სამთავრობო შეთანხმების საფუძველზე მოქმედი სასტიპენდიო პროგრამისა, ჩინეთის მხარე საქართველოს მოქალაქეებს დამატებით სთავაზობს ჩინეთის მთავრობის სტიპენდიას „Youth of Excellence Scheme”.