ბათუმის შოთა რუსთაველის სახელმწიფო უნივერისტეტში ბსუ-ს მიზნობრივი სტუდენტური პროექტის ფარგლებში ფუკოს ქანქარა დამზადდა. პროექტის ავტორია ზუსტ მეცნიერებათა და განათლების ფაკულტეტის ფიზიკის სპეციალობის მესამე კურსის სტუდენტი ანა სურმანიძე, ხელმძღვანელები: პროფესორი ნუგზარ ღომიძე, ასოცირებული პროფესორები ლალი კალანდაძე და იზოლდა ჯაბნიძე. ბსუ პირველი უმაღლესი საგანმანათლებლო დაწესებულებაა საქართველოში, სადაც ფუკოს ქანქარა აიგო.

ბათუმის შოთა რუსთაველის სახელმწიფო უნივერსიტეტის, საქართველოს მათემატიკოსთა კავშირისა და საქართველოს უნივერსიტეტის ორგანიზებით ბსუ-ში საქართველოს მათემატიკოსთა კავშირის X საერთაშორისო კონფერენცია გაიხსნა. ხუთი დღის განმავლობაში 135 ქართველი და 45 უცხოელი მკვლევარი 17 ქვეყნიდან სამეცნიერო მოხსენებებს წარმოადგენს თანამედროვე მათემატიკის აქტუალურ საკითხებზე. კონფერენციის მიზანია, ბოლო ერთი წლის განმავლობაში წარმოებული კვლევის შედეგების გაანალიზება, თანამედროვე სამეცნიერო მიღწევების გაზიარება, სამეცნიერო კავშირების განმტკიცება, სამეცნიერო კვლევა-ძიებაში ახალგაზრდა მეცნიერთა ჩართულობის გაზრდა დამეცნიერებს შორის სამომავლო თანამშრომლობის ხელშეწყობა.

26-30 აგვისტოს, შვედეთში, ქალაქ სტოკჰოლმში გაიმართა ტრენინგები შვედური ინსტიტუტის მიერ დაფინანსებული პროექტის: “ინტერნაციონალიზაციის ინსტრუმენტების, პრაქტიკისა და პერსონალის კომპეტენციების მოდერნიზება სტუდენტზე ორიენტირებული სწავლების მხარდასაჭერად აღმოსავლეთ პარტნიორობის უნივერსიტეტებში – INTERTOOL“ ფარგლებში. პროექტის კოორდინატორია შვედეთის სამეფო ტექნოლოგიური უნივერსიტეტის (KTH) საერთაშორისო ურთიერთობათა სამსახური და მასში ჩართულია უკრაინის, სომხეთის, მოლდოვასა და საქართველოს 8 უნივერსიტეტი. პროექტის მიზანია პარტნიორი უნივერსიტეტების პერსონალის უნარების განვითარება საერთაშორისო თანამშრომლობის გაძლიერების, საგანმანათლებლო და სამეცნიერო პროცესების ინტერნაციონალიზაციის, საერთაშორისო პროექტების შექმნისა და ეფექტური მართვის საკითხებში.

22-23 აგვისტოს, სტამბულში, ბეიკენტის უნივერსიტეტში გაიმართა საერთაშორისო კონფერენცია თემაზე: “სწავლის შედეგები და სწავლების ხარისხი უმაღლეს განათლებაში.” ღონისძიება უნივერსიტეტის 20 წლის იუბილეს მიეძღვნა და იგი განიხილება, როგორც დასაწყისი კონფერენციათა ციკლისა, რომელიც განკუთვნილია ტექნოლოგიური და გარემოს განვითარების კვალდაკვალ უნივერსიტეტის სტუდენტთა სწავლებაში ახალი მეთოდებისა და ტენდენციების აღმოჩენაზე.

ბათუმის შოთა რუსთაველის სახელმწიფო უნივერსიტეტის ზუსტ მეცნიერებათა და განათლების ფაკულტეტის მათემატიკის დეპარტამენტის პროფესორმა იაშა დიასამიძემ სემინარზე წიგნი „ალგებრის ამოცანათა კრებული“ წარადგინა. მოცემული კრებული დაწერილია ბსუ-ში არსებული სილაბუსების მიხედვით და შედგება 21 პარაგრაფისათვის. თითოეულ პარაგრაფში მოცემულია თეორიული მასალა დამტკიცების გარეშე, დაწვრილებით ამოხსნილია ტიპიური მაგალითები, მოცემულია მაგალითები, შესაბამისი პასუხებით. წიგნი განკუთვნილია დამოუკიდებლად მომუშავე სტუდენტებისათვის.