ახალი ამბები
03.07.2017

საქართველოს პარლამენტის ეროვნული ბიბლიოთეკის გენერალურმა დირექტორმა, მწერალმა გიორგი კეკელიძემ ბათუმის შოთა რუსთაველის სახელმწიფო უნივერსიტეტში საჯარო ლექცია წაიკითხა თემაზე: „განმანათლებლობა და საქართველოს ევროპული არჩევანი მხატვრულ ლიტერატურაში“. მომხსენებელი სხვადასხვა უმაღლესი საგანმანათლებლო დაწესებულების სტუდენტებსა და საზოგადოების წარმომადგენლებს მხატვრული ლიტერატურის ფასეულობებზე, დემოკრატიული არჩევანის მნიშვნელობასა და ღირებულებებზე ესაუბრა. საჯარო ლექცია მაჟორიტარ დეპუტატ ფატი ხალვაშის ორგანიზებით გაიმართა.

ბათუმის შოთა რუსთაველის სახელმწიფო უნივერსიტეტის ეზოში საქართველოს პარლამენტის ეროვნული ბიბლიოთეკის დირექტორმა გიორგი კეკელიძემ მოძრაობა „ეკვილიბრიუმის“ ფარგლებში „წიგნის ბუდე“ გახსნა. სტუდენტებსა და პროფესორ-მასწავლებლებს შესაძლებლობა აქვთ ორიგინალური სათავსოდან წიგნი აიღონ, წაიკითხონ და უკან დააბრუნონ, ან წაღებული წიგნის ნაცვლად ახალი დატოვონ. პროექტი მიზნად ისახავს წიგნის კითხვის პოპულარიზაციას. ბსუ სოციალურ კამპანიაში „ეკვილიბრიუმი“ რამდენიმე თვის წინ ჩაერთო და სოციალური ქსელით დაწყებული აქციის „გაიღე წიგნი“ ეგიდით, შუახევის რაიონის სოფელ ჭვანის ბიბლიოთეკას 400-მდე წიგნი გადასცა.