ახალი ამბები

ბათუმის შოთა რუსთაველის სახელმწიფო უნივერსიტეტი უერთდება ვაქცინაციის კამპანიას „აიცერი უსაფრთხო გარემოსთვის”. უსაფრთხო სამუშაო და სასწავლო გარემოს შექმნა თითოეული ჩვენგანის პასუხისმგებლობა და უპირველესი საზრუნავია, ბსუ იზიარებს საზოგადოებრივ პასუხისმგებლობას და მოუწოდებს აკადემიურ პერსონალს, ადმინისტრაციის თანამშრომლებსა და სტუდენტებს აქტიურად ჩაერთონ ვაქცინაციის პროცესში. ვაქცინაცია ინდივიდუალური უფლება და საყოველთაო პასუხისმგებლობაა. ერთად შევაჩეროთ COVID-19-ის პანდემია.

ბათუმის შოთა რუსთაველის სახელმწიფო უნივერსიტეტი სამეცნიერო ღონისძიებას „საზღვაო ქვეყნის ლურჯი პოლიტიკა“ უმასპინძლებს, რომლის მიზანს ახალგაზრდების, განსაკუთრებით მოსწავლეების საზღვაო მეცნიერებებით დაინტერესება წარმოადგენს. მოსამზადებელ სამუშაოებთან დაკავშირებით, აჭარის რეგიონში ოფიციალური ვიზიტით მყოფი, საქართველოს განათლებისა და მეცნიერების მინისტრის მოადგილე ნუნუ მიცკევიჩი აჭარის განათლების, კულტურისა და სპორტის მინისტრთან მაია ხაჯიშვილთან ერთად, ბათუმის შოთა რუსთაველის სახელმწიფო უნივერსიტეტში სამეცნიერო ღონისძიებაში მონაწილე უნივერსიტეტების, კვლევითი დაწესებულებებისა და ოფიციალური უწყებების წარმომადგენლებს შეხვდა და უსაფრთხოდ და მაღალ დონეზე ჩატარების უზრუნველსაყოფად, ღონისძიების შინაარსობრივი და საორგანიზაციო საკითხები ადგილზე განიხილა.

ილიას სახელმწიფო უნივერსიტეტის წარმომადგენლები Turnitin-ის გამოყენების პრაქტიკის გაზიარებისა და პროგრამის ახალი ფუნქციების გაცნობის მიზნით
ბსუ-ს აკადემიურ პერსონალსა და ადმინისტრაციის წარმომადგენლებს შეხვდნენ. შეხვედრის ფარგლებში, ილიას სახელმწიფო უნივერსიტეტის ბიბლიოთეკის დირექტორის მოადგილემ გიგა ხოსიტაშვილმა დისკუსიის ფორმატში ისაუბრა კეთილსინდისიერების პრინციპის დაცვის ხელშეწყობასა და გამოწვევებზე, ყურადღება გაამახვილა სტუდენტებში პლაგიატის წესების დარღვევის მიზეზებზე.

ბათუმის შოთა რუსთაველის სახელმწიფო უნივერსიტეტში რექტორთა მუდმივმოქმედი კონფერენციის მეორე სხდომა მიმდინარეობს, რომელშიც საქართველოს 30-ზე მეტი უმაღლესი საგანმანათლებლო დაწესებულების რექტორები და წარმომადგენლები მონაწილეობენ. შეხვედრა ბათუმის შოთა რუსთაველის სახელმწიფო უნივერსიტეტის რექტორმა მერაბ ხალვაშმა და ივანე ჯავახიშვილის სახელობის თბილისის სახელმწიფო უნივერსიტეტის რექტორმა გიორგი შარვაშიძემ გახსნეს.

ბსუ-ს ჰუმანიტარულ მეცნიერებათა ფაკულტეტის ევროპეისტიკის სამაგისტრო პროგრამის სტუდენტი ცისნამი შარაშიძე (სამაგისტრო ნაშრომის ხელმძღვანელი პროფესორი ნატალია სურგულაძე) ფრანკოფონიის საუნივერსიტეტო სააგენტოს კონკურსის „ჩემი სადისერტაციო თემა 180 წამში“ გამარჯვებულია. AUF-ის, ფრანკოფონიის საუნივერსიტეტო სააგენტოს მიერ ორგანიზებულ კონკურსში მონაწილეობდა 11 შერჩეული დოქტორანტი და მაგისტრანტი საქართველოს სხვადასხვა უნივერსიტეტიდან. ჟიურის გადაწყვეტილებით, ცისნამი შარაშიძეს მეორე ადგილი ერგო.