ახალი ამბები

ბათუმის შოთა რუსთაველის სახელმწიფო უნივერსიტეტს გაერთიანებული ერების ორგანიზაციის ლტოლვილთა უმაღლესი კომისრის წარმომადგენელი საქართველოში UNHCR-ის წარმომადგენლებთან ერთად ეწვია. ბსუ-ს რექტორთან, მერაბ ხალვაშთან, იურიდიული და სოციალურ მეცნიერებათა ფკულტეტის დეკანთან, ლევან ჯაყელთან და ბსუ-ს სტრატეგიული განვითარებისა და საერთაშორისო ურთიერთობების დეპარტამენტის უფროსთან, მარინა გიორგაძესთან გამართულ შეხვედრაზე კემლინ ფურლიმ უნივერსიტეტთან თანამშრომლობის პერსპექტივებზე უსაუბრა. მხარეთა შეთანხმებით, პირველ ეტაპზე იურიდიული და სოციალურ მეცნიერებათა ფაკულტეტის სტუდენტებისათვის შემუშავდება დევნილთა საერთშორისო სამართლის სასწავლო კურსი და გადამზადდება შესაბამისი აკადემიური პერსონალი. შეხვედრაზე დაიგეგმა ბსუ-სა და UNHCR-ს შორის თანამშრომლობის მემორანდუმის გაფორმება.

ბათუმის შოთა რუსთველის სახელმწიფო უნივერსიტეტის, დასაქმების ხელშეწყობის სახელმწიფო სააგენტოსა და აჭარის დასაქმების სააგენტოს ორგანიზატორობით, სასტუმრო „შერატონში“ დასაქმების ფორუმი გაიმართა. ფორუმში მონაწილეობდა აჭარაში ოპერირებადი 75 კომპანია 2000-ზე მეტი ვაკანსიით. სტუდენტებსა და კურსდამთავრებულებს შესაძლებლობა ჰქონდათ, არსებული კვალიფიკაციის და სასურველი დასაქმების ხანგრძლივობის შესაბამისად შეერჩიათ სამუშაო ადგილები ადმინისტრაციული, მომსახურების, სავაჭრო, დისტრიბუციის, სასტუმრო, სარესტორნო, სამრეწველო, სატრანსპორტო, ლოჯისტიკური, სამშენებლო, საფინანსო, სადაზღვევო, ჯანდაცვის და განათლების სფეროებიდან.

ბათუმის შოთა რუსთაველის სახელმწიფო უნივერსიტეტის ინტელექტუალური თამაშის „რ? სად? როდის?“ საგაზაფხულო სეზონი დასრულდა. ტურნირში სხვადასხვა ფაკულტეტის სტუდენტების 30 გუნდი მონაწილეობდა. ჩემპიონატის პირველობა ზედიზედ მეორედ, მაგრამ განახლებული შემადგენლობით გუნდმა „ინკვიზიცია“ მოიპოვა, მეორე ადგილზე კვლავ გუნდი „თამადა“ გავიდა, ხოლო მესამე ადგილი ერგო გუნდს „ბაკიბაკო“. შეჯიბრების 10 საუკეთესო გუნდს სიგელები გადაეცა, ხოლო პრიზიორი გუნდები დასაჩუქრდნენ თასებით, წიგნებით, ფასიანი საჩქურებით და გამოცდების დასრულების შემდეგ გაემგზავრებიან ექსკურსიაზე.

ბსუ-ს ტექნოლოგიური ფაკულტეტის აგრარულ მიმართულებაზე სასათბურე მეურნეობა განახლდა და თანამედროვე, ჭკვიანი ტექნოლოგიებით აღიჭურვა. 400 კვ.მ-იანი სასათბურე მეურნეობის მოდერნიზება აშშ-ის სოფლის მეურნეობის დეპარტამენტის (USDA) დაფინანსებით და სექტორული პლატფორმა „მომავლის ფერმერის“ ჩართულობით განხორციელდა. სასათბურე მეურნეობაში სტუდენტებს უკვე საშუალება აქვთ პრაქტიკული კომპონენტი თანამედროვე კომპიუტერული პროგრამით, მცენარეთა წვეთოვანი მორწყვის, ფერტიგაციის და მიკროკლიმატის კონტროლის ტექნოლოგიების მართვით შეასრულონ.

მკვლევრებთან ერთად, ბსუ-ს ჰარვარდის უნივერსიტეტის საქართველოს შემსწავლელი პროგრამის დირექტორი, ცნობილი ამერიკელი ისტორიკოსი, პროფესორი სტივენ ჯონსი ეწვია. რექტორთან, მერაბ ხალვაშთან, რექტორის მოადგილეებთან, თამარ სირაძესთან, ანზორ ბერიძესთან და პროფესორ-მასწავლებლებთან გამართულ შეხვედრაზე პროფესორი სტივენ ჯონსი ბსუ-ს ქართველოლოგიის ცენტრის სამეცნიერო კვლევა-ძიების შედეგებს გაეცნო და ჰარვარდის უნივერსიტეტისა და ბათუმის შოთა რუსთაველის სახელმწიფო უნივერსიტეტის სამომავლო თანამშრომლობის მიმართულებებზე ისაუბრა. მხარეთა შეთანხმებით, დაიგეგმა უნივერსიტეტების ერთობლივი საგანმანათლებლო-სამეცნიერო პროექტების შემუშავება და განხორციელება.