ახალი ამბები

ბათუმის შოთა რუსთაველის სახელმწიფო უნივერსიტეტში გამოფენა „თანამედროვე სახელმწიფო სიმბოლოები“ გაიხსნა. გამოფენაზე წარმოდგენილია დამოუკიდებლობის აღდგენის შემდეგ შექმნილი და დამტკიცებული საქართველოს სახელმწიფო სიმბოლოები, ავტონომიური რესპუბლიკების, თვითმმართველი ორგანოების სიმბოლოები (გერბი, დროშა), სახელმწიფო და უწყებრივი ჯილდოები, უნიფორმები, ფულადი ნიშნები და სხვა ინსიგნიები. ღონისძიების ფარგლებში საქართველოს პარლამენტთან არსებული ჰერალდიკის სახელმწიფო საბჭოს თავმჯდომარის მოადგილემ, საქართველოს სახელმწიფო გერბის ავტორმა მამუკა გონგაძემ და ჰერალდიკის სახელმწიფო საბჭოს დიზაინისა და ანალიტიკის სამსახურის უფროსმა დავით ჩხეიძემ ლექცია წაიკითხე თემაზე: „ქართული ჰერალდიკა“.

ბათუმის შოთა რუსთაველის სახელმწიფო უნივერსიტეტის რექტორმა მერაბ ხალვაშმა აკადემიური საბჭოს წევრებს, ფაკულტეტის დეკანებსა და ადმინისტრაციის წარმომადგენლებს 2019 წელს გაწეული მუშაობის ანგარიში წარუდგინა. საანგარიშო პერიოდში საქმიანობა ძირითადად წარიმართა ბსუ-ს სტრატეგიული განვითარების და რექტორის სამოქმედო გეგმების შესაბამისად, შემდეგი მიმართულებებით: სასწავლო პროცესიის სრულყოფა, სწავლა-სწავლების ხარისხის ამაღლება, სამეცნიერო-კვლევითი მუშაობის ხელშეწყობა, ინტერნაციონალიზაცია, სტუდენტთა მომსახურების გაუმჯობესება, საგანმანათლებლო პროგრამების აკრედიტაცია და ავტორიზაცია, მატერიალურ-ტექნიკური ბაზის გაუმჯობესება, ინფრასტრუქტურული და სოციალური პროექტები. რექტორმა ასევე, ყურადღება გაამახვილა მნიშვნელოვან საუნივერსიტეტო აქტებსა და ღონისძიებებზე. დეტალურად განიხილა ყველა ის მიღწევა და წარმატებული პროექტი, რომელიც უნივერსიტეტმა 2019 წელს განახორციელა.

საბჭოთა რუსეთის მიერ საქართველოს ოკუპაციიდან 99 წელი გავიდა. ბათუმის შოთა რუსთაველის სახელმწიფო უნივერსიტეტში ოკუპაციის დღისადმი მიძღვნილი დისკუსია გაიმართა. ჰუმანიტარულ მეცნიერებათა ფაკულტეტის პროფესორ-მასწავლებლებმა და სტუდენტებმა საქართველოში, 1921 წლის თებერვალ-მარტში განვითარებულ მოვლენებზე იმსჯელეს. 99 წლის წინ საბჭოთა რუსეთის მე-11 წითელი არმია თბილისში შეიჭრა, საბჭოთა ხელისუფლება დამყარდა და საქართველომ სუვერენიტეტი დაკარგა.

ბუდაპეშტის ოტვოშ ლორანდის სახელმწიფო უნივერსიტეტის თარგმანისა და ინტერპრეტაციის დეპარტამენტისა და ევროპული სამაგისტრო პროგრამის ხელმძღვანელმა, ასოცირებულმა პროფესორმა ილდიკო ჰორვატიმ ბსუ-ს ჰუმანიტარულ მეცნიერებათა ფაკულტეტის თარგმანისა და ინტერდისციპლინური კვლევების ცენტრის სინქრონული თარგმანის ლაბორატორიაში ტრენინგი ჩაატარა. ტრენერმა ბათუმის შოთა რუსთაველის სახელმწიფო უნივერსიტეტის ახალი სამაგისტრო პროგრამის „კონფერენციის ინტერპრეტაციის“ სამუშაო ჯგუფის წევრებს სინქრონული თარგმანის სწავლების თანამედროვე მეთოდიკა, პროგრამისა და დარგის სპეციფიკა და დასაქმების პერსპექტივები გააცნო. სწავლება ევროკავშირის წამყვან მწარმოებელთან „ტელევიკ-განათლებასთან“ და ქართულ კომპანია „სინტაქსთან“ გაფორმებული თანამშრომლობის ფარგლებში გაიმართა.

პლაგიატის პრევენციის საერთაშორისო დღე ბათუმის შოთა რუსთაველის სახელმწიფო უნივერსიტეტში რამდენიმე ღონისძიებით აღინიშნა. მოეწყო „პლაგიატის შესახებ სტუდენტური პოსტერების კონკურსის“ ფინალური ნამუშევრების გამოფენა, პლაგიატის პრევენციის შესახებ მომზადებული ვიდეორგოლის ჩვენება და ჩატარდა ვიქტორინა. გამარჯვებულებს პლაგიატის ცნობიერების ამაღლების მიზნით თემატური საჩუქრები გადაეცათ.