ახალი ამბები

გერონტოლოგიისა და გერიატრიის საერთაშორისო სკოლა გაიხსნა ბათუმის შოთა რუსთაველის სახელმწიფო უნივერსიტეტში. ღონისძიების მიზანია დაბერების პროცესისა და მექანიზმის შესახებ არსებული თანამედროვე მიღწევების გაცნობა და პოპულარიზაცია. ოთხდღიანი სკოლა ითვალისწინებს ასაკთან ასოცირებული დაავადებების მკურნალობის ახალი მეთოდების სწავლებასა და გამოცდილების გაზიარებას. ბიოლოგიის, მედიცინის, სოციალური მეცნიერებების, ასაკოვან ადამიანთა მოვლა-მომსახურების დარგის მკვლევარები, სპეციალისტები, სტუდენტები გაეცნობიან გერონტოლოგიის ფუნდამენტური კონცეფციებს, სხვადასხვა ქვეყნის ხანდაზმული მოსახლეობის სოციალური მდგომარეობის საკითხებსა და სოციალურ პაკეტებს. სწავლებას უძღვებიან დარგის წამყვანი ქართველი, ავსტრიელი, მალტელი მეცნიერები და ექსპერტები. სეზონური სკოლის ფარგლებში 25 ოქტომბერს, ხულოს ჰოსპიტალში გაიმართება საქველმოქმედო სამედიცინო აქცია.

საქართველოში ნატოს სამეკავშირეო ოფისის ხელმძღვანელი როზარია პუგლისი ბათუმის შოთა რუსთაველის სახელმწიფო უნივერსიტეტის სტუდენტებს შეხვდა. საერთაშორისო ორგანიზაციის წარომადგენელი ახალგაზრდებს ისეთ აქტუალურ საკითხებზე ესაუბრა, როგორიცაა: ნატო-საქართველოს ურთიერთობები და მისი დინამიკა, შავი ზღვის უსაფრთხოება, ნატოს პრაქტიკული ჩართულობა საქართველოში და მიმდინარე პროექტები, ნატოს ბრიუსელის სამიტის შედეგები. ღონისძიების დასასრულს როზარია პუგლისმა სტუდენტების შეკითხვებს უპასუხა.

ვეტერანის დღე ბათუმის შოთა რუსთაველის სახელმწიფო უნივერსიტეტში რამდენიმე ღონისძიებით აღინიშნა. სტუდენტებმა, პროფესორ-მასწავლებლებმა, რექტორმა მერაბ ხალვაშმა და რექტორის მოადგილემ თამარ სირაძემ გმირთა ხეივანში ეროვნული გმირის ჟიული შარტავას მემორიალი გვირგვინით შეამკეს. სტუდენტების მონაწილეობით ტურნირი ჩატარდა ქუჩის კალათბურთში, ჭადრაკში, შაშსა და მაგიდის ჩოგბურთში. ღონისძიებას აჭარის ა.რ. მთავრობის თავჯდომარემ თორნიკე რიჟვაძე ესწრებოდა, რომელმაც სიმბოლურად კალათში პირველი ბურთი ჩააგდო.

ბათუმის შოთა რუსთაველის სახელმწიფო უნივერსიტეტის რექტორმა მერაბ ხალვაშმა და ტერნოპოლის ეროვნული ეკონომიკური უნივერსიტეტის რექტორმა ანდრი კრუსოვატმა თანამშრომლობის მემორანდუმს მოაწერეს ხელი. ხელშეკრულება ითვალისწინებს ერთობლივი სასწავლო-საგანმანათლებლო და სამეცნიერო პროექტების განხორციელებას. მემორანდუმის ფარგლებში ამოქმედდება გაცვლითი პროგრამები სტუდენტებისა და პროფესორ-მასწავლებლების მონაწილეობით, ჩატარდება სამეცნიერო კონფერენციები, საზაფხულო სკოლები, ტრენინგები და სემინარები. მხარეთა შეთანხმებით, ასევე იგეგმება ერთობლივი საგანმანათლებლო სადოქტორო პროგრამების შემუშავება.

ევროკავშირის პროგრამის - „პროფესიული განათლება გადამზადება და დასაქმება/შრომის ბაზარი“ პრეზენტაცია გაიმართა ბათუმის შოთა რუსთაველის სახელმწიფო უნივერსიტეტში. საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური მომსახურების სააგენტოს დასაქმების ხელისშემწყობი პროგრამების დეპარტამენტის უფროსმა მარიამ ბეზარაშვილმა პროფესიული საგანმანათლებლო პროგრამების სტუდენტებს ევროკავშირის მხარდაჭერით შექმნილი დასაქმების ხელშემწყობი სერვისები და პროგრამები გააცნო. პროგრამის წარდგენას უნივერსიტეტის რექტორი მერაბ ხალვაში, საქართველოში ევროკავშირის ელჩი კარლ ჰარცელი, აჭარის ა.რ. ჯანმრთელობისა და სოციალური დაცვის მინისტრი ზაალ მიქელაძე და პროფესორ-მასწავლებლები ესწრებოდნენ.