ახალი ამბები

ბათუმის შოთა რუსთაველის სახელმწიფო უნივერსიტეტში ჟან მონეს ახალი პროექტის - ჟან მონეს მოდული „ევროკავშირში გაწევრიანების პოლიტიკური კრიტერიუმები და საქართველოს, მოლდოვის და უკრაინის ევროპეიზაცია" პრეზენტაცია გაიმართა. ჟან მონეს ახალი სასწავლო მოდული ბათუმის შოთა რუსთაველის სახელმწიფო უნივერსიტეტმა 2023 წელს მოიპოვა ევროკავშირისგან და მომდევნო 3 წლის განმავლობაში განხორციელდება იურიდიული და სოციალურ მეცნიერებათა ფაკულტეტზე. პროექტის კოორდინატორია ჟან მონეს პროფესორი მალხაზ ნაკაშიძე. მოდულის განხორციელებაში ასევე ჩართული იქნება აკადემიური პერსონალი უკრაინის და მოლდოვის რესპუბლიკის უნივერსიტეტებიდან.

შავი ზღვის დაცვის საერთაშორისო დღე ბათუმის შოთა რუსთაველის სახელმწიფო უნივერსიტეტში რამდენიმე ღონისძიებით აღინიშნა. პროექტ „ემბლასის“ წარმომადგენელმა, ბიოლოგიის მეცნიერებათა დოქტორმა რამაზ მეგრელაძემ ლექცია წაიკითხა თემაზე: „შავი ზღვის ეკოლოგიური გარემო, არსებული გამოწვევები და მათი გადაჭრის გზები“. ასევე გაიმართა ფლეშმობის კონკურსი „შავი ზღვის ხმა“, რომელშიც საჯარო და კერძო სკოლის მოსწავლეებთან ერთად, მონაწილეობა მიიღეს ბათუმის N20 საჯარო სკოლის უკრაინული სექტორის მოსწავლეებმაც. ჟიურის გაასდწყვეტილებით, I ადგილი კერძო სკოლას „ევრო 2000“ ერგო, II ადგილი - კერძო სკოლას „გორდა“, ხოლო III ადგილი - ფოთის N4 საშუალო სკოლას. ბსუ-ს ბიოლოგიისა და ეკოლოგიის საგანმანათლებლო პროგრამების სტუდენტებისათვის სასტუმრო „პარაგრაფში“ ბიოლოგიის დოქტორმა ანდრეი ტრეგუბოვმა ლექცია წაიკითხა ზღვის ბიომრავალფეროვნების აქტუალურ საკითხებზე.

ბათუმის შოთა რუსთაველის სახელმწიფო უნივერსიტეტს ბეჟას პოლიტექნიკური ინსტიტუტის (პორტუგალია) აგრარული სკოლის დეკანი, პროფესორი მარია ჟოაო კარვალიო ეწვია. ბსუ-ს რექტორის მოადგილესთან ანზორ ბერიძესთან და ტექნოლოგიური ფაკულტეტის დეკანთან გიზო ფარცხალაძესთან გამართულ გაცნობითი ხასიათის შეხვედრაზე დაიგეგმა აგრარული მიმართულებით თანამშრომლობა. მხარეთა შეთანხმებით, გაფორმდება თანამშრომლობის მემორანდუმი, სტუდენტებისა და პროფესორ-მასწავლებლებისათვის შემუშავდება გაცვლითი პროგრამები და გაიმართება ერთობლივი სასწავლო-სამეცნიერო ღონისძიებები.

ბსუ-ში სამედიცინო მიმართულების სასწავლო კორპუსი აშენდება. სამედიცინო პროგრამების სტუდენტებისათვის ერთ სივრცეში განთავსდება აუდიტორიები, ლაბორატორიები, სასწავლო ცენტრი, ბიბლიოთეკა, საკონფერენციო და სპორტული დარბაზები. თანამედროვე სტანდარტების, შშმ პირთათვის ადაპტირებული სამსართულიანი სასწავლო კორპუსი აღიჭურვება უახლესი ტექნიკითა და აპარატურით. პროექტი ხორციელდება აჭარის ა.რ. მთავრობის ფინანსური მხარდაჭერით და მისი ღირებულება 8 880 000 ლარს შეადგენს.

პროფესორმა ლევან გიგინეიშვილმა ბათუმის შოთა რუსთაველის სახელმწიფო უნივერსიტეტში საჯარო ლექცია წაიკითხა თემაზე: „ჭეშმარიტება და თავისუფლება: ძველი და ახალი გააზრებები". პროფესორმა ლევან გიგინეიშვილმა მსმენელებს ჭეშმარიტებისა და თავისუფლების ცნებების განვითარების ისტორია გააცნო და გაანალიზა ანტიკური პერიოდის, განმანათლებლებლობისა და პოსტმოდერნიზმის ეპოქების ფილოსოფოსებისა და მოაზროვნეების შეხედულებები. ლექციის მიზანი იყო ძველი და ახალი აღთქმის ქრისტიანული ინტერპრეტაციის გათვალისწინებით, სხვადასხვა დროის დემოკრატიულ ღირებულებათა ერთმანეთთან დაკაშირება. ლექციის დასასრულს, პროფესორმა ლევან გიგინეიშვილმა სტუდენტების აქტუალურ შეკითხვებს უპასუხა. ღონისძიება აზროვნების აკადემიის შემეცნებითი ტურნეს ფარგლებში გაიმართა.