ახალი ამბები

„პროფესორები მოსწავლეებისთვის“ - ამ სახელწოდებით ბათუმის შოთა რუსთაველის სახელმწიფო უნივერსიტეტმა კამპანია დაიწყო. ბსუ-ს პროფესორები ბათუმის, ხელვაჩაურისა და ქობულეთის საჯარო და კერძო სკოლის მოსწავლეებს პოპულარული ხასიათის ლექციებს წაუკითხავენ შემდეგ აქტუალურ საკითხებზე: საქართველო ევროინტეგრაციის გზაზე, კონსტიტუცია და დემოკრატიული მმართველობა, ბულინგის გამომწვევი მიზეზები, თაობები და ღირებულებები, ჯანსაღი ცხოვრების წესი, კრიტიკული აზროვნება და სხვ. პროექტი აჭარის განათლების, კულტურისა და სპორტის სამინისტროს მხარდაჭერით ხორციელდება

ბათუმის შოთა რუსთაველის სახელმწიფო უნივერისტეტში აჭარის ავტონომიური რესპუბლიკის უმაღლესი საბჭოს თავმჯდომარე და საორგანიზაციო კომისიის წარმომადგენლები იურიდიული, სოციალურ და პოლიტიკურ მეცნიერებათა, ეკონომიკისა და ბიზნესის ფაკულტეტების სტუდენტებს შეხვდნენ. „აჭარის ავტონომიური რესპუბლიკის კონსტიტუციაში ცვლილების შეტანის შესახებ“ აჭარის ავტონომიური რესპუბლიკის კონსტიტუციური კანონის პროექტის გამოქვეყნებისა და მისი საჯარო განხილვის საორგანიზაციო კომისიის თავმჯდომარემ დავით გაბაიძემ სტუდენტებს კანონის პროექტით გათვალისწინებული ცვლილებები გააცნო. შეხვედრა დისკუსიის რეჟიმში გაიმართა, სადაც სტუდენტებმა საკონსტიტუციო ცვლილებების განხილვის პროცესში აქტიური მონაწილეობა მიიღეს.

ფუტსალის ლიგის 2017/2018 წლების სეზონის მეექვსე ტურზე ბათუმის ფუტსალის ნაკრები ვიცე-ჩემპიონ ტატიშვილის გუნდს შეხვდა. თამაში ბათუმის სახელმწიფო უნივერსიტეტის ნაკრების გამარჯვებით დასრულდა და მოწინააღმდეგე ანგარიშით 7-5 დაამარცხა. 3 თებერვალს თბილისის ოლიმპიურ სასახლეში ბსუ-ს ფუტსალის ნაკრები „კოლხის" გუნდს შეხვდება და გამარჯვების შემთხვევაში ბსუ ლიდერთა ჯგუფში გადაინაცვლებს.

ბათუმის შოთა რუსთაველის სახელმწიფო უნივერსიტეტში „აჭარის ავტონომიური რესპუბლიკის კონსტიტუციაში ცვლილების შეტანის შესახებ“ აჭარის ავტონომიური რესპუბლიკის კონსტიტუციური კანონის პროექტის გამოქვეყნებისა და მისი საჯარო განხილვის საორგანიზაციო კომისიის წევრები აჭარაში მოქმედი სხვადასხვა უმაღლესი და პროფესიული სასწავლებლის სტუდენტებსა და აკადემიური წრეების წარმომადგენლებს შეხვდნენ. საჯარო დისკუსიას წინა მოწვევის საკანონმდებლო ორგანოს წევრები, ბათუმის საკრებულოს თავმჯდომარე სულიკო თებიძე და საკრებულოს წევრები დაესწრნენ. უმაღლესი საბჭოს ინიცირებული საკონსტიტუციო ცვლილებების საჯარო განხილვები მოსახლეობის პარალელურად, ადვოკატებთან, არასამთავრობო ორგანიზაციების, მედიის, პოლიტიკური პარტიების, საზოგადოების, აკადემიური წრეების, სტუდენტებს, ადმინისტრაციული ორგანოებისა და სხვადასხვა სფეროს წარმომადგენლებთან იმართება.

განათლების საერთაშორისო ცენტრის წარმომადგენლებმა ბათუმის შოთა რუსთაველის სახელმწიფო უნივერსიტეტის სტუდენტებს უნგრული და ფრანგული სასტიპენდიო პროგრამები გააცნეს. შეხვედრას საფრანგეთის საელჩოს ატაშე საუნივერსიტეტო და სამეცნიერო თანამშრომლობის საკითხებში ტერი ბურტე და უნგრეთის საელჩოს მისიის ხელმძღვანელის მოადგილე ანიკო ფარკაში ესწრებოდნენ. სტუდენტებმა მიიღეს ინფორმაცია უნგრეთის მთავრობის სასტიპენდიო პროგრამის “Stipendium Hungaricum“ შესახებ, რომელიც მიზნად ისახავს საქართველოს 80 მოქალაქის დაფინანსებას უნგრეთის უმაღლეს საგანმანათლებლო დაწესებულებებში.