ბათუმის შოთა რუსთაველის სახელმწიფო უნივერსიტეტის დეკანებმა, სტუდენტებმა, პროფესორ-მასწავლებლებმა და ადმინისტრაციის წარმომადგენლებმა მეორე მსოფლიო ომში დაღუპული ჯარისკაცების ხსოვნას პატივი მიაგეს. ომის ვეტერანებს ფაშიზმზე გამარჯვების 69-ე წლისთავი მიულოცეს, 1941-1945 წლებში ბრძოლის ველზე დაღუპული გმირები გაიხსენეს და ფერიის ძმათა სასაფლაო ყვავილებით შეამკეს. მეორე მსოფლიო ომში 700 000-ზე მეტი ქართველი მონაწილეობდა.
სოციალურ მეცნიერებათა, ბიზნესისა და სამართალმცოდნეობის ფაკულტეტის ასოცირებულმა პროფესორმა მურმან ცეცხლაძემ, საინფორმაციო ტექნოლოგიებისა და კომუნიკაციების სამსახურის მთავარმა სპეციალისტმა ზვიად ბერაძემ, სტუდენტებმა: ომარ ტაკიძემ, ლანა ბურკაძემ, ანა მჟავანაძემ საერთაშორისო სამეცნიერო-პრაქტიკულ კონფერენციაში - „ცივილური საბაზრო ურთიერთობების ჩამოყალიბება და განვითარების მთავარი მიმართულებები“ მიიღეს მონაწილეობა. ბაქოში გამართული ორდღიანი კონფერენცია მიზნად ისახავდა საბაზრო ეკონომიკის განვითარების პროცესში არსებული პრობლემებისა და მათი დაძლევის გზების განხილვას. კომპეტენტურმა ჟიურიმ ფინანსები, დაზღვევა და საბანკო საქმის სპეციალობის IV კურსის სტუდენტ ომარ ტაკიძის მოხსენება „საქართველო აზერბაიჯანის სავაჭრო-ეკონომიკური ურთიერთობები და მათი გავლენა გლობალურ ეკონომიკაზე“ საუკეთესოდ დაასახელა და პირველი ხარისხის დიპლომით დააჯილდოვა.
თანამშრომლობის მემორანდუმი გაფორმდა ბათუმის შოთა რუსთაველის სახელმწიფო უნივერსიტეტსა და „თინაზთეფე“-ს (თურქეთი) საავადმყოფოს შორის. ხელშეკრულება ითვალისწინებს პროფესორ-მასწავლებლების, მკვლევარებისა და სტუდენტების გაცვლითი პროგრამების განხორციელებას, ერთობლივი სასწავლი-სამეცნიერო პროექტების შემუშავებასა და სპეციალისტების გადამზადებას. მემორანდუმის ფარგლებში გაიმართება სიმპოზიუმები, კონფერენციები, სემინარები და კულტურული ღონისძიებები. მხარეთა შეთანხმებით, უნივერსიტეტის ბაზაზე ამოქმედდება იმუნოგენეტიკის ლაბორატორია, სადაც ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის მიმართულების პროფესორები თურქეთის წამყვან ექიმებთან ერთად ერთობლივ კვლევებს ჩაატარებენ.
ბათუმის ბოტანიკურ ბაღში ქალაქ ბათუმის მერის მოვალეობის შემსრულებელი გიორგი ერმაკოვი და ბოტანიკური ბაღის დირექტორი თამაზ დარჩიძე ბათუმის შოთა რუსთაველის სახელმწიფო უნივერსიტეტის რექტორის მოადგილეს ირაკლი ბარამიძეს, სტუდენტებსა და პროფესორ-მასწავლებლებს შეხვდნენ. ბოტანიკური ბაღის ხელმძღვანელმა ბსუ-ს ბიოლოგიის, მცენარეთა ბიომრავალფეროვნებისა და აგროეკოლოგიის სპეციალობის სტუდენტებს პროექტი „ბათუმის ბოტანიკური ბაღის სტიპენდიანტი“ წარუდგინა. პროგრამა მიზნად ისახავს ახალგაზრდების ბაღის განვითარებით დაინტერესებასა და დარგისათვის მაღალკვალიფიციური სპეციალისტების მომზადებას. კონკურსის წესით გამოვლენილი სამი საუკეთესო სტუდენტი ბოტანიკურ ბაღში ორთვიან სტაჟირებას გაივლის და 200-ლარიან სტიპენდიას მიიღებს. ღონისძიების მონაწილეებმა ბოტანიკური ბაღი დაათვალიერეს და ტურისტული სეზონისათვის მოსამზადებელ ინფრასტრუქტურულ სამუშაოებს გაეცნენ. კონკურსში მონაწილეობის მსურველებმა დამატებითი ინფორმაცია იხილეთ...
VI საერთაშორისო სამეცნიერო კონფერენცია „ჩვენი სულიერების ბალავარი“ გაიხსნა ბათუმის შოთა რუსთაველის სახელმწიფო უნივერსიტეტში. ქართველი, რუსი, სომეხი, ბულგარელი მკვლევარები და სასულიერო პირები ორი დღის განმავლობაში 50-მდე სამეცნიერო მოხსენებებს წარმოადგენენ ქართული მართლმადიდებლური ეკლესიის ისტორიაზე, კულტურაზე, ხელოვნებაზე, სწავლებასა და აღზრდაზე. კონფერენციის მონაწილეები ასევე განიხილავენ ისეთი საკითხებს, როგორიცაა: ბათუმის ეპარქიის ისტორია, სიახლეები ქართული ეკლესიის ისტორიაში (გოდერძის უღელტეხილის - ბეშუმის ნაეკლესიარი), ადრეფეოდალური ხანის ცნობილი საეკლესიო ცენტრების ადგილმდებარეობის შესახებ (ფაზისის სამიტროპოლიტო, სებასტოპოლისის საერქიეპისკოპოსო), ქრისტეს სარწმუნოებისათვის ოსმალთაგან წამებული მართლმადიდებელი ლაზები, მართლმადიდებელი ეკლესია XX საუკუნის 20-იანი წლების აჭარაში. კონფერენცია ქრისტიანული კვლევის ცენტრისა და ნიკო ბერძენიშვილის ინსტიტუტის ისტორიისა და არქეოლოგიის განყოფილების ორგანიზებით ტარდება.
