2023 წლის 25 აპრილს ტალინის უნივერსიტეტში „ჰორიზონტი 2020“-ის პროექტის „ციფრული ინოვაციების დანერგვა სკოლებში რეგიონული ინოვაციური ჰაბებისა და მენტორინგის მოდელის საშუალებით“ (IHUB4Schools) ფარგლებში გაიმართა კონფერენცია სახელწოდებით „Conference of Innovative Education: Fostering Sustainable Digital Innovation in Schools“.
აშშ-ის ელჩმა კელი დეგნანმა, ბსუ-ს რექტორმა მერაბ ხალვაშმა, აჭარის ა.რ. სოფლის მეურნეობის მინისტრმა ზაზა შავაძემ და განათლების, კულტურისა და სპორტის მინისტრმა მაია ხაჯიშვილმა ბათუმის შოთა რუსთაველის სახელმწიფო უნივერსიტეტის პროფესიული პროგრამების მართვისა და უწყვეტი განათლების ცენტრის ბაზაზე აგრარული ექსტენციის ცენტრი გახსნეს. ცენტრის დაარსების მიზანია სოფლის მეურნეობის დარგების მხარდაჭერა, საზოგადოებისათვის აგრარული ექსტენციის მიწოდებაში უნივერსიტეტის როლის და მონაწილეობის გაძლიერება ბსუ-ს აკადემიური პირების და კვლევითი ცენტრების ბაზებზე განხორციელებული კვლევების ექსტენციის სხვადასხვა პროგრამებად შემუშავების და განხორციელების მეშვეობით.
აშშ-ის თავდაცვის ატაშე, პოლკოვნიკი ჯოზეფ ბილბო ბათუმის შოთა რუსთველის სახელმწიფო უნივერსიტეტის სტუდენტებს შეხვდა. ატაშემ შეხვედრაზე ისაუბრა ამერიკის შეერთებული შტატებისა და საქართველოს ურთიერთობებზე, ყურადღება გაამახვილა მსოფლიოში მიმდინარე მნიშვნელოვან პოლიტიკურ პროცესებზე, დეზინფორმაციის გამოწვევებსა და აშშ-ის როლზე საქართველოს უკეთესი მომავლისათვის. შეხვედრა კითხვა-პასუხის რეჟიმში წარიმართა და აშშ-ის თავდაცვის ატაშემ ჯოზეფ ბილბომ სტუდენტების აქტუალურ შეკითხვებს უპასუხა. დასასრულს, ბსუ-ს რექტორმა მერაბ ხალვაშმა ჯოზეფ ბილბოს მადლობა გადაუხადა სტუმრობისთვის, კიდევ ერთხელ შეაჯამა უნივერსიტეტში აშშ-ის მხარდაჭერით განხორციელებული პროექტები და ნატოსა და ევროკავშირში საქართველოს გაწევრიანების მნიშვნელობაზე ისაუბრა. ღონისძიებას სტუდენტებთან ერთად, პროფესორ-მასწავლებლები და ადმინისტრაციის წარმომადგენლები ესწრებოდნენ.
ბსუ-ში დიპლომირებული მედიკოსის ინგლისურენოვანი ერთსაფეხურიანი საგანმანათლებლო პროგრამის პირველკურსელი უცხოელი სტუდენტების მიღება გაიმართა. საბუნებისმეტყველო მეცნიერებათა და ჯანდაცვის ფაკულტეტის დეკანმა რუსუდან ხუხუნაიშვილმა, ბსუ-ს რექტორის მოადგილემ თამარ სირაძემ, დეკანის მოადგილემ სოფო ცქვიტინიძემ სტუდენტებს სწავლის დაწყება მიულოცეს და სამახსოვრო საჩუქრები გადასცეს. ფაკულტეტის ადმინისტრაციამ სტუდენტებს უნივერსიტეტის პრეზენტაცია წარუდგინა. ღონისძიებაში ასევე მონაწილეობა მიიღეს პროგრამის კურსდამთავრებულებმა, რომლებმაც თავიანთი შთაბეჭდილებები და გამოცდილება გაუზიარეს პირველკურსელებს.
აშშ-ის ელჩი საქართველოში კელი დეგნანი ბათუმის შოთა რუსთაველის სახელმწიფო უნივერსიტეტის რექტორს, პროფესორ მერაბ ხალვაშს და სტუდენტებს შეხვდა. ამერიკის ელჩი ახალგაზრდებს მიესალმა და მიმართვისას ხაზი გაუსვა საქართველოსთან მრავალწლიან და ნაყოფიერ თანამშრომლობას. ელჩმა ისაუბრა ბათუმის შოთა რუსთაველის სახელმწიფო უნივერსიტეტში განხორციელებულ და მიმდინარე საგანმანათლებლო-სამეცნიერო პროექტებზე. აშშ-ის მხარდაჭერით ბსუ-ში ხორციელდება პროგრამები სამართალმცოდნეობის, საბაზისო განათლების, სამოქალაქო განათლების, ტექნოლოგიების, ინგლისური ენის შესწავლის, სოფლის მეურნეობის და სხვა მიმართულებით.
