ახალი ამბები

ბათუმში გამართულ საერთაშორისო ტურისტულ გამოფენაში ,,ექსპო ბათუმი - 2011” შოთა რუსთაველის სახელმწიფო უნივერსიტეტის ტურიზმის ფაკულტეტი და ტურისტული სააგენტო UNItour-ი მონაწილეობდა. რსუ-ს სასწავლო-საგანმანათლებლო პროგრამებთან ერთად ფაკულტეტმა დამთვალიერებლებს ტურისტული პროდუქტები გააცნო. ,,ექსპო ბათუმი - 2011”-ზე 12 ქვეყნის 150-მდე კომპანია იყო წარმოდგენილი. გამოფენაზე უკრაინის, ლატვიის, პოლონეთის, აზერბაიჯანის და თურქეთის საგანმანათლებლო დაწესებულებებისა და ტურისტული ორგანიზაციების წარმომადგენლებთან შეხვედრისას ტურიზმის ფაკულტეტსა და ტურისტულ სააგენტო UNItour-თან თანამშრომლობა დაიგეგმა.

რსუ-ს ქრისტიანული კულტურის კვლევის ცენტრის ორგანიზებით რიგით მესამე საერთაშორისო სამეცნიერო კონფერენცია - ,,ჩვენი სულიერების ბალავარი“ ჩატარდა. კონფერენცია სამ სექციაში მუშაობდა და მასში ქვეყნის სხვადასხვა უმაღლესი სასწავლებლის პროფესორ-მასწავლებლებთან ერთად სომეხი, რუსი და ბულგარელი მკვლევრები მონაწილეობდნენ. მეცნიერები ქრისტიანული სარწმუნოების აქტუალურ საკითხებზე ორი დღის განმავლობაში მუშაობდნენ. საერთაშორისო კონფერენციის ფარგლებში ცნობილი მეცნიერის, ისტორიკოსისა და საზოგადო მოღვაწის აბელ სურგულაძის სახელობის აუდიტორიის პრეზენტაცია გაიმართა. უმაღლესი საგანმანათლებლო დაწესებულების 45-ე აუდიტორიას ღვაწლმოსილი პროფესორის სახელი რსუ-ს აკადემიური საბჭოს დადგენილების საფუძველზე მიენიჭა.

შოთა რუსთაველის სახელმწიფო უნივერსიტეტის რექტორმა, პროფესორმა ალიოშა ბაკურიძემ და გერმანიის გამოყენებითი მეცნიერებების ევროპული უნივერსიტეტის დეკანმა სტეფან ბეჰრინგერმა თანამშრომლობის მემორანდუმს მოაწერეს ხელი. ხელშეკრულება ტურიზმის სფეროში ერთობლივი სასწავლო-სამეცნიერო და გაცვლითი პროგრამების განხორციელებას, ონლაინ-ბიბლიოთეკის გამოყენებას, კონფერენციებისა და სიმპოზიუმების ჩატარებას ითვალსიწინებს. მემორანდუმის გაფორმების შემდეგ დელეგაციის წევრები ტურიზმის ფაკულტეტის პროფესორ-მასწავლებლებსა და სტუდენტებს შეხვდნენ და გერმანიის გამოყენებითი მეცნიერებების ევროპული უნივერსიტეტის სასწავლო პროგრამები და მატერიალურ-ტექნიკური ბაზა გააცნეს.

ქართული ენის დღის აღსანიშნავად შოთა რუსთაველის დარბაზში რსუ-ს პროფესორ-მასწავლებლები, სტუდენტები და მწერლები შეიკრიბნენ. უნივერსიტეტელებმა და საზოგადოების წარმომადგენლებმა 1978 წლის 14 აპრილსა და 26 მაისს განვითარებული მოვლენები გაიხსენეს და მშობლიური ენის სიწმინდის დაცვის აუცილებლობაზე ისაუბრეს. 33 წლის წინ ქართველმა ერმა არ დაუშვა საბჭოთა კონსტიტუციის 78-ე მუხლში იმ ცვლილების შეტანა, რომლის მიხედვითაც ქართული ენა სახელმწიფო ენის სტატუსს კარგავდა. ღონისძიება აჭარის განათლების, კულტურისა და სპორტის სამინისტროს, ორგანიზაცია ,,კავკასიონისა“ და შოთა რუსთაველის სახელმწიფო უნივერსიტეტის ხელშეწყობით გაიმართა. შეხვედრის დასრულების შემდეგ პროფესორ-მასწავლებლებმა და სტუდენტებმა ილია ჭავჭავაძის ძეგლი ყვავილებით შეამკეს.

ეკო და აგრო ტურიზმის განვითარების ხელშეწყობის მიზნით შოთა რუსთაველის სახელმწიფო უნივერსიტეტს ნორვეგიის ტელემარკის უნივერსიტეტის კოლეჯის დელაგაცია ეწვია. დელეგაციის წევრები ხუთი დღის განმავლობაში რეგიონის ტურისტულ პოტენციალს გაეცნობიან. ნორვეგიის სამთავრობო პროექტის ეგიდით უმაღლეს სასწავლებლებს შორის დაიგეგმა ერთობლივი საგანმანათლებლო და სამეცნიერო-კვლევითი პროგრამების განხორციელება, ინოვაციებისა და სამეწარმეო სწავლების სფეროში კურიკულუმის შემუშავება და ტურიზმის ფაკულტეტის სტუდენტების სტაჟირება. ნორვეგიის ტელემარკის უნივერსიტეტი რსუ-ს სტუდენტებს ასევე სთავაზობს ბიზნესადმინისტრირების საბაკალავრო პროგრამას, რომლის განხორციელებაც მომავალი სასწავლო წლიდან დაიწყება.