ახალი ამბები

შოთა რუსთაველის სახელმწიფო უნივერსიტეტის ადმინისტრაციის ხელმძღვანლის წარდგინებითა და წარმომადგენლობითი საბჭოს 2011 წლის 18 თებერვლის №7 გადაწყვეტილებით განხორციელდა სპეციალური სასწავლო სოციალური პროგრამა “სტუდენტთა შეღავათები სწავლის საფასურში”. პროგრამაში მონაწილეობა შეეძლო წარჩინებულ, სოციალურად დაუცველ, ობოლ, მრავალშვილიანი ოჯახის წევრ, დევნილ, საქართველოს ტერიტორიული მთლიანობისათვის ბრძოლაში დაღუპულთა შვილებსა და შეზღუდული შესაძლებლობების მქონე სტუდენტებს. 70 კონკურსანტიდან 2010-2011 სასწავლო წლის მეორე სემესტრის სწავლის საფასურში შეღავათი 37 სტუდენტმა მიიღო (26 სტუდენტმა 100%-იანი, 1 სტუდენტმა 70%-იანი და 10 სტუდენტმა 50%-იანი)

შოთა რუსთაველის ეროვნული სამეცნიერო ფონდის წარმომადგენლებმა შოთა რუსთაველის სახელმწიფო უნივერსიტეტის პროფესორ-მასწავლებლებსა და მკვლევრებს ახალი სახელმწიფო სამეცნიერო საგრანტო კონკურსების პირობები გააცნეს. ფონდის გენერალურმა დირექტორმა სულხან სისაურმა და სამეცნიერო დეპარტამენტის ხელმძღვანელმა ირაკლი ნოსელიძემ ყურადღება იმ სიახლეებზე გაამახვილეს, რაც ბოლო პერიოდში განხორციელდა. გამოყენებითი კვლევების კონკურსის პირობების მიხედვით თითქმის გაორმაგდა სახელმწიფო დაფინანსება, შეიცვალა პროექტის ხანგრძლივობა, გამარტივდა კონკურსში წარსადგენი პროექტის დიზაინი და მონაწილეობისთვის აუცილებელი პროცედურები. დოკუმენტაციის მიღება თითქმის ელექტრონულად მოხდება.

ამიერკავკასიის სატრანსპორტო კომპანიის დამფუძნებელმა მაიკლ სონდერსმა შოთა რუსთაველის სახელმწიფო უნივერსიტეტის საინჟინრო-ტექნოლოგიური ფაკულტეტის პროფესორ-მასწავლებლებისა და სტუდენტებისათვის საჯარო ლექცია წაიკითხა თემაზე: ,,ქალაქის სატრანსპორტო მომსახურების უზრუნველყოფა“. ექსპერტმა საკითხის აქტუალობაზე, მნიშვნელობასა და პერსპექტივებზე ისაუბრა. დაიგეგმა ერთობლივი საერთაშორისო სამაგისტრო საგანმანათლებლო პროგრამის ,,სატრანსპორტო სისტემის ორგანიზაცია და მენეჯმენტი“ განხორციელება.

შოთა რუსთაველის სახელმწიფო უნივერსიტეტის სტუდენტური თეატრის სცენაზე რეჟისორ როინ დვალის სპექტაკლის ,,ქართველების“ პრემიერა შედგა. ერთმოქედებიანი სპექტაკლი თამაზ მეტრეველის პიესის ,,სუპერ ქართვლების“ მიხედვით დაიდგა და მასში სხვადასხვა ფაკულტეტის სტუდენტები მონაწილეობდნენ. არაპროფესიონალი მსახიობებით დაკომპლექტებული დასი პრემიერისთვის 6 თვის განმავლობაში ემზდებოდა. სპექტაკლი რსუ-ს სტუდენტთა მომსახურებისა და მხარდაჭერის სამსახურის კულტურის ცენტრის ორგანიზებით გაიმართა და თეატრის საერთაშორისო დღეს მიეძღვნა.

შოთა რუსთაველის სახელმწიფო უნივერსიტეტში ტურიზმის ფაკულტეტის პრეზენტაცია გაიმართა. წარდგინებას აჭარის მთავრობის თავმჯდომარე ლევან ვარშალომიძე, ბათუმის მერი რობერტ ჩხაიძე, აჭარის განათლების, კულტურისა და სპორტის მინისტრი გია აბულაძე, დიპლომატიური კორპუსის წარმომადგენლები, წამყვანი სასტუმროების მენეჯერები, დარგის ექსპერტები, პროფესორ-მასწავლებლები და სტუდენტები ესწრებოდნენ. სიტყვით გამოსვლისას აჭარის მთავრობის თავმჯდომარემ ლევან ვარშალომიძემ ფაკულტეტის შექმნის მნიშვნელობაზე, პერსპექტივებზე და ტურიზმის განვითარების აუცილებლობაზე ისაუბრა. უნივერსიტეტის რექტორმა, პროფესორმა ალიოშა ბაკურიძემ მოწვეულ სტუმრებს ფაკულტეტის მიზნები და ამოცანები, ხოლო ფაკულტეტის დეკანის მოვალეობის შემსრულებელმა როსტომ ბერიძემ საგანმანათლებლო პროგრამები გააცნო.