ახალი ამბები

ბათუმის შოთა რუსთაველის სახელმწიფო უნივერსიტეტში „ქართული ლიტერატურისა და ლიტერატურული პროცესის შემსწავლელი სეზონური სკოლა“ გაიხსნა. ღონისძიების ფარგლებში ხუთი დღის განმავლობაში ჩატარდება ლექციები და სემინარები. საქართველოს სხვადასხვა უმაღლესი საგანმანათლებლო დაწესებულების 30 სტუდენტი იმუშავებს ტექსტებზე, ლიტერატურისა და მხატვრული სტილისტიკის პრობლემებზე. ასევე გაიმართება წამახალისებელი კონკურსი საუკეთესო ნამუშევრის გამოსავლენად და გამარჯვებული ნაშრომი გამოქვეყნდება ლიტერატურულ ჟურნალ „არილის“ საიტზე.

ბსუ-ში მათემატიკის დეპარტამენტის ასოცირებულ პროფესორ ზებურ ავალიანის ხსოვნისადმი მიძღვნილი საუნივერსიტეტო საჭადრაკო ტურნირი „ზებურ ავალიანის თასი - 2022“ გაიმართა. ტურნირი 7 ტურად, შვეიცარული სისტემით გაიმართა და მასში 50-მდე სტუდენტი, პროფესორ-მასწავლებელი და ნორჩი მოჭადრაკე ასპარეზობდა. პირველ ადგილი ეკონომიკის საბაკალავრო პროგრამის სტუდენტს თენგიზ დიდმანიძეს ერგო, მეორე ადგილი - ბიზნესის ადმინისტრირების საბაკალავრო პროგრამის სტუდენტს თედო ბოლქვაძეს და მესამე ადგილი - ომარ სირაბიძეს. ტურნირის ნომინაციაში „საუკეთესო მოჭადრაკე სტუდენტი“ კომპიუტერული მეცნიერების საბაკალავრო პროგრამის სტუდენტმა ოლეგ ირემაძემ გაიმარჯვა, ხოლო ნომინაცია „საუკეთესო მოჭადრაკე ბავშვი“ - კესარია მგელაძემ.

ბსუ-ს აკადემიურმა საბჭომ რუმინეთის მეცნიერებათა აკადემიის ნამდვილ წევრს, თეოლოგიის დოქტორს, კონსტანცას ოვიდიუსის უნივერსიტეტის (რუმინეთი) რელიგიის კვლევისა და შესწავლის ცენტრის ხელმძღვანელს ნიკოლაე დურას საპატიო დოქტორის წოდება მიანიჭა. პროფესორი ნიკოლაე დურა აქტიურადაა ჩართული ბსუ-ს ნიკო ბერძენიშვილის ინსტიტუტის სამეცნიერო პროგრამების კოორდინირებაში, არის ინსტიტუტის სამეცნიერო შრომების სარედაქციო საბჭოს წევრი და ინსტიტუტის ეგიდით გამართული არაერთი სამეცნიერო საერთაშორისო კონფერენციის ორგანიზატორი. აკადემიკოსი ნიკოლაე დურა ხელს უწყობს ინტერდისციპლინური, ინტერკულტურული სამეცნიერო კვლევების განხორციელებასა და სწავლებას. დიდია პროფესორ ნიკოლაე დურას წვლილი ინსტიტუტის საერთაშორისო ურთიერთობების გაღრმავებასა და განმტკიცების საქმეში.

ბათუმის შოთა რუსთაველის სახელმწიფო უნივერსიტეტში სტუდენტთა საუნივერსიტეტო სამეცნიერო კონფერენციის მონაწილეების დაჯილდოება გაიმართა. ბსუ-ს რექტორმა, პროფესორმა მერაბ ხალვაშმა, ადმინისტრაციის ხელმძღვანელმა ნიკა ჩხარტიშვილმა, რექტორის მოადგილეებმა: თამარ სირაძემ და ანზორ ბერიძემ, ფაკულტეტის დეკანებმა სტუდენტებს სერტიფიკატები გადასცეს, გამარჯვება მიულოცეს და წარმატებები უსურვეს. 57 საპრიზო ადგილზე გასული სტუდენტი ფულად ჯილდოს მიიღებს, ხოლო საუკეთესო ნაშრომების ავტორებს რეკომენდაცია მიეცემათ, მონაწილეობა მიიღონ რესპუბლიკურ და საერთაშორისო კონფერენციებში. სტუდენტთა სამეცნიერო კონფერენციის 19 სექციაში 200-მდე სტუდენტმა 160 სამეცნიერო მოხსენება წარმოადგინა. საპრიზო ადგილზე გასული სტუდენტების მოხსენებები გამოქვეყნდება სტუდენტთა სამეცნიერო შრომების კრებულში.

ბსუ-ს კურსდამთავრებულს, ღვაწლმოსილ პედაგოგს დავით დავითაძეს 100 წელი შეუსრულდა. ღირსშესანიშნავი თარიღი საუკუნის პედაგოგს ბათუმის შოთა რუსთაველის სახელმწიფო უნივერსიტეტის რექტორმა, პროფესორმა მერაბ ხალვაშმა მიულოცა და საპატიო სიგელი და შოთა რუსთაველის სახელობის მედალი გადასცა. რექტორმა დავით დავითაძეს მადლობა გადაუხადა ხანგრძლივი პედაგოგიური მოღვაწეობისა და ქვეყნის წინაშე დამსახურებისთვის.