ბათუმის შოთა რუსთაველის სახელმწიფო უნივერსიტეტის ტექნოლოგიურმა ფაკულტეტმა მესამე მისიის ფარგლებში უმასპინძლა სსიპ ბათუმის №8 საჯარო სკოლის დამამთავრებელი კლასის მოსწავლეებს.

ინოვაციების ცენტრში მათ ჩაუტარდათ ლექცია თემაზე: „კატასტროფების რისკის მართვა თანამედროვე საინჟინრო გადაწყვეტილებების მიღების პროცესში“.

შემდგომ მოსწავლეები ჩაერთნენ ERASMUS+-ის LISS24-ის პროგრამის ფარგლებში შექმნილი ლაბორატორიის სამუშაო პროცესში. აღნიშნული ლაბორატორია გამოიყენება ინოვაციური დიზაინის მიმართულებით საუკეთესო გადაწყვეტილებების მისაღებად.

მოსწავლეებმა იმუშავეს iMotions-ის კომპიუტერულ პორტალზე, რომელიც დაკავშირებულია ლაბორატორიულ აღჭურვილობასთან: თვალის მოძრაობის ტრეკერთან (eye-tracker), ადამიანის სახის კუნთების მოძრაობის ამომცნობ ვიდეოკამერასთან და ადამიანის ფიზიოლოგიური პარამეტრების საზომ Shimmer-ის სისტემასთან.

მოსწავლეებმა ასევე დაათვალიერეს FabLab ლაბორატორია, სადაც საშუალება ჰქონდათ გაცნობოდნენ სტრუქტურული მოდელების აგების პრინციპებს.