ბათუმის შოთა რუსთაველის სახელმწიფო უნივერსიტეტის ნიკო ბერძენიშვილის ინსტიტუტს ვენეციის უნივერსიტეტის კულტურული ანთროპოლოგიის, ეთნოლოგიისა და ანთროპოლოგიური ლინგვისტიკის დოქტორი, ვენეციის უნივერსიტეტის საგარეო ურთიერთობათა დეპარტამენტის სპეციალისტი, ანდრეა ჯამბაროტტო ეწვია. ახალგაზრდა მკვლევარი რამდენიმე არასამთავრობო ორგანიზაციასთან ერთად, საქართველოში რელიგიისა და იდენტობის საკითხების კვლევებზე მუშაობს. აღნიშნული მიმართულებით მუშაობის პროცესში მას კონსულტაციას ნიკო ბერძენიშვილის ინსტიტუტის მკვლევარები გაუწევენ. შეხვედრაზე საუბარი შეეხო ერთობლივი კვლევების განხორციელებას და სამომავლო თანამშრომლობის პერსპექტივებს.

ბათუმის შოთა რუსთაველის სახელმწიფო უნივერსიტეტის ნიკო ბერძენიშვილის ინსტიტუტის მკვლევრებმა ევროკავშირის პროექტის „ევროკლუბის ღია ბიბლიოთეკების“ ეგიდით, ხულოს მუნიციპალიტეტის ბიბლიოთეკებს საჩუქრად წიგნები გადასცეს. ინსტიტუტის კვლევების ერთ-ერთი მნიშვნელოვანი მიმართულება აჭარის მუნიციპალიტეტების ისტორიის, არქეოლოგიის, ეთნოლოგიისა და სხვა საკითხთა კომპლექსური შესწავლაა. უახლესი გამოცემებისა და მონოგრაფიების უშუალოდ მუნიციპალიტეტებისათვის გაცნობა ამ მიმართულებით მუშაობის ერთ-ერთი მნიშვნელოვანი ნაწილია.

ბათუმის შოთა რუსთაველის სახელმწიფო უნივერსიტეტის ნიკო ბერძენიშვილის ინსტიტუტისა და ჰუმანიტარულ მეცნიერებათა ფაკულტეტის ისტორიის, არქეოლოგიისა და ეთნოლოგიის დეპარტამენტის ორგანიზებით დიდგორის ბრძოლის 900 წლისადმი მიძღვნილი კონფერენცია გაიმართა თემაზე: „დავით აღმაშენებლის ეპოქა“. ღონისძიებაში მონაწილეობა მიიღეს საქართველოს ეროვნული მეცნიერებათა აკადემიის წევრებმა, თბილისის ივანე ჯავახიშვილის სახელობის ისტორიისა და ეთნოლოგიის ინსტიტუტის მკვლევრებმა, ბათუმის შოთა რუსთაველის სახელმწიფო უნივერსიტეტის პროფესორ-მასწავლებლებმა, სტუდენტებმა და ნიკო ბერძენიშვილის ინსტიტუტის მკვლევრებმა.

ნიკო ბერძენიშვილის ინსტიტუტს სუმის მაკარენკოს სახელობის უნივერსიტეტის დელეგაცია ეწვია უნივერსიტეტის სასწავლო-სამეცნიერო ინსტიტუტის დირექტორის, სუმის საოლქო რადას დეპუტატ იულია პოდრეზის ხელმძღვანელობით. ვიზიტის ფარგლებში სტუმრები გაეცნენ ინსტიტუტის საქმიანობას და ფონდებში დაცულ უნიკალურ მასალებს. შეხვედრაზე მხარეებმა ისაუბრეს სამომავლო თანამშრომლობის პერსპექტივებსა და ერთობლივი სამეცნიერო ღონისძიებებზე. დაიგეგმა თანამშრომლობის მემორანდუმის გაფორმებაც.

ბათუმის ხელოვნების უნივერსიტეტში გამართულ V საერთაშორისო სამეცნიერო კონფერენცია „კულტურა და ხელოვნება თანამედროვეობის კონტექსტში“. კონფერენციის მონაწილეებს მიესალმა ბსუ-ს ნიკო ბერძენიშვილის ინსტიტუტის დირექტორი როინ მალაყმაძე. მან ისაუბრა კონფერენციის მნიშვნელობასა და ხელოვნების სასწავლო უნივერსიტეტთან თანამშრომლობის პერსპექტივებზე. კონფერენციის მიზანი იყო კულტურისა და ხელოვნების მნიშვნელოვანი და აქტუალური საკითხების კვლევა, შემოქმედებითი პროცესებისა და ტენდენციების გაანალიზება და მკვლევართა მიერ ერთმანეთისადმი ცოდნისა და გამოცდილების გაზიარება გახლდათ.