აჭარის განათლების, კულტურისა და სპორტის სამინისტროს საგანმანათლებლო პროექტის - „მეცნიერება ჩემს გაკვეთილზე“ ფარგლებში, ბსუ-ს ნიკო ბერძენიშვილის ინსტიტუტის დირექტორი, ისტორიის დოქტორი როინ მალაყმაძე მიწვეული იყო ხელვაჩაურის მუნიციპალიტეტში, კირნათის საჯარო სკოლაში. მკვლევარი ისტორიით დაინტერესებულ მოსწავლეებს ესაუბრა სამხრეთ-დასავლეთ საქართველოს ისტორიასა და თანამედროვეობაზე. დასასრულს, გაიმართა დისკუსია თემაზე - „ჩემი მხარის ისტორია“. პროქტის − „მეცნიერება ჩემს გაკვეთილზე“ − მიზანია მასწავლებელთა საქმიანობის მხარდაჭერა და ზოგადი განათლების ეროვნული მიზნების მიღწევაში საკლასო აქტივობების მრავალფეროვნების ხელშეწყობა.

„მაჭახლის ეთნოსოფლის“ ადმინისტრაციულ შენობაში ბსუ-ს ნიკო ბერძენიშვილის ინსტიტუტის მკვლევართა (როინ მალაყმაძე, ნოდარ კახიძე, სულხან მამულაძე) მიერ მომზადებული ნაშრომის − „მაჭახლის ხეობის ისტორიისა და კულტურის ძეგლები“ წარდგენა გაიმართა. ნაშრომში შესწავლილია ორად გაყოფილი მაჭახლის ხეობის მატერიალური კულტურული მემკვიდრეობა და წარმოდგენილია ხეობის ისტორია უძველესი დროიდან დღემდე. განხილულია ხეობაში არსებული ნასოფლარები და ნასახლარები, საფორტიფიკაციო ნაგებობანი და სავაჭრო–საქარავნო გზები, ქვის თაღოვანი ხიდები, მარან–საწნახლები, სამეურნეო დანიშნულების მატერიალური კულტურის ძეგლები და სხვ.

ბსუ-ს ნიკო ბერძენიშვილის ინსტიტუტის დირექტორმა, ეთნოლოგმა როინ მალაყმაძემ მონაწილეობა მიიღო ივანე ჯავახიშვილის სახელმწიფო უნივერსიტეტში გამართულ სამეცნიერო კონფერენციასა და გამოფენაში „ტრადიციული ქართული სამიწათმოქმედო კულტურა და თანამედროვეობა“. მკვლევარმა ისაუბრა მემინდვრეობის ტრადიციების განვითარებაზე აჭარაში. ღონისძიების ფარგლებში თსუ-ს საგამოფენო დარბაზში გამოიფინა XVI-XVII საუკუნეებით დათარიღებული ძველი საბუთები და ეტრატები, ფოტოები და ხელნაწერები, მემორიალური ნივთები, მარცვლეულის უნიკალური ჯიშები და ეთნოგრაფიული მასალა. ღონისძიება თსუ-ს ეთნოლოგია-ანთროპოლოგიის ინსტიტუტის, თსუ-ს მუზეუმისა და ბიბლიოთეკის ორგანიზებით გაიმართა.

ბსუ-ს ნიკო ბერძენიშვილის ინსტიტუტსა და საქართველოს პარლამენტის ეროვნულ ბიბლიოთეკას შორის თანამშრომლობის მემორანდუმი გაფორმდა. დოკუმენტს ხელი მოაწერეს ეროვნული ბიბლიოთეკის გენერალურმა დირექტორმა კონსტანტინე გამსახურდიამ და ნიკო ბერძენიშვილის ინსტიტუტის დირექტორმა როინ მალაყმაძემ. მხარეთა შეთანხმებით, დაიგეგმა თანამშრომლობა სამეცნიერო კვლევებისა და საგამომცემლო საქმიანობის მიმართულებით. მემორანდუმი ასევე ითვალისწინებს ერთობლივი კულტურული და საგანმამანთლებლო პროექტების განხორციელებას.

ბსუ-ს ნიკო ბერძენიშვილის ინსტიტუტის დირექტორმა როინ მალაყმაძემ მონაწილეობა მიიღო დედა ენის დღისადმი მიძღვნილ, კავკასიის უნივერსიტეტში გამართული პროექტის „მე მიყვარს ქართული - ჩემი სახელმწიფო ენა“ შემაჯამებელ ღონისძიებაზე. მკვლევარი მიესალმა შეკრებილ საზოგადოებას, ისაუბრა მშობლიური ენის მნიშვნელობაზე, საქართველოს ისტორიულ მხარეში - ტაო - კლარჯეთში შემორჩენილი ქართული ენის მდგომარეობაზე და კავკასიის უნივერსიტეტის ბიბლიოთეკას საჩუქრად გადასცა ნიკო ბერძენიშვილის ინსტიტუტის უახლოესი გამოცემები. ღონისძიებას ესწრებოდნენ კავკასიის უნივერსიტეტის პრეზიდენტი, საქართველოში ლიეტუვისა და შვედეთის საგანგებო და სრულუფლებიანი ელჩები, კავკასიის უნივერსიტეტის მკვლევარები და სხვა საპატიო სტუმრები.