ხელვაჩაურის მუნიციპალიტეტის მერიაში ბსუ-ს ნიკო ბერძენიშვილის ინსტიტუტის ფოლკლორის, დიალექტოლოგიისა და ემიგრანტული ლიტერატურის კვლევის განყოფილების მეცნიერ-თანამშრომლებმა მუნიციპალიტეტის მერიის თანამშრომლებს, კულტურის სფეროში მომუშავეებსა და საჯარო სკოლების პედაგოგებს გააცნეს პროექტის - „აჭარული დიალექტის ლექსიკონი“ - შედეგები. პროექტი განხორციელდა ნიკო ბერძენიშვილის ინსტიტუტის ფოლკლორის, დიალექტოლოგიისა და ემიგრანტული ლიტერატურის განყოფილების მიერ. ლექსიკონში აისახა ნიკო ბერძენიშვილის ინსტიტუტსა და ხარიტონ ახვლედიანის სახელობის მხარეთმცოდნეობის მუზეუმის ფონდებში დაცული მასალები. მომზადდა დიალექტის ლექსიკონი.

მაქს ვებერის ფონდის საქართველოს ოფისში ბათუმის შოთა რუსთველის სახელმწიფო უნივერსიტეტის ნიკო ბერძენიშვილის ინსტიტუტის უფროსი მეცნიერ-თანამშრომლის, რუსლან ბარამიძის ლექცია გაიმართა თემაზე: „ისლამი, საზღვრები და ერის მშენებლობა აჭარაში". ლექციაზე განხილული იყო საქართველოს მუსლიმური თემის ისტორი, განსაკუთრებული ყურადღება გამახვილებული იყო 1990-იანი წლებიდან განვითარებულ პროცესებზე. კერძოდ, იმ ძირითად ტენდენციებზე, რომლებიც მუსლიმური თემის ყოფით, რეგიონალურ, ორგანიზაციულ, სტრუქტურულ ცვლილებებს ეხებოდა.

8-9-10 მარტს, ბათუმის წიგნისა და უმაღლესი განათლების მეორე საერთაშორისო გამოფენის „Batumi Book & Education Fair 2024“ ფარგლებში, ბსუ-ს ნიკო ბერძენიშვილის ინსტიტუტის მკვლევრებმა შეხვედრები გამართეს სხვადასხვა აკადემიურ და სამეცნიერო დაწესებულებათა წარმომადგენლებთან, მათ შორის, კორნელი კეკელიძის სახელობის საქართველოს ხელნაწერთა ეროვნული ცენტრის დირექტორთან, ზაზა აბაშიძესთან. შეხვედრისას შედგა შეთანხმება ერთობლივი პროექტების განხორციელებისა და სამეცნიერო ღონისძიებების ორგანიზების პერსპექტივებზე.

ბსუ-ს ნიკო ბერძენიშვილის ინსტიტუტს სამუშაო ვიზიტით მაქს ვებერის ფონდის საქართველოს ოფისის მკვლევარი, მიუნჰენის ლუდვიგ მაქსიმილიანის უნივერსიტეტის დოქტორი ჰელენა ჰოლზბერგერი ეწვია. ჰელენი ჰოლზბერგერი საბჭოთა საქართველოს საზღვაო ისტორიას იკვლევს, ამ მიმართულებით მომზადებული პროექტის განსახორციელებლად განსაკუთრებული მნიშვნელობა აქვს იმ საკითხების შესწავლას, რომლებიც დაკავშირებულია ბათუმთან – საქართველოს საზღვაო კარიბჭესთან და მდიდარი ისტორიის მქონე ნავსადგურთან. მკვლევარი კვლევას ბათუმში ნიკო ბერძენიშვილის ინსტიტუტის ბაზაზე განახორციელებს და კვლევების კოორდინატორი ინსტიტუტის უფროსი მეცნიერ-თანამშრომელი რუსლან ბარამიძე იქნება.

ბსუ-ში შოთა რუსთაველის საქართველოს ეროვნული სამეცნიერო ფონდის ფუნდამენტური კვლევების სახელმწიფო სამეცნიერო გრანტების კონკურსში გამარჯვებული საგრანტო პროექტის - „რა იგებს არჩევნებს" დასკვნითი პრეზენტაცია გაიმართა. პროექტის ხელმძღვანელმა, ბსუ-ს ნიკო ბერძენიშვილის ინსტიტუტის უფროსმა მეცნიერ თანამშრომელმა რუსლან ბარამიძემ ისაუბრა პროექტის მიმდინარეობაზე, ძირითად გამოწვებზე და წარადგინა მოხსნება საქართველოში წარმოსახვითი ერთობის, მეხსიერების ადგილების და საზოგადოებრივი ტრანსფორმაციების შესახებ პრეზიდენტების წინასაარჩევნო კამპანიებსა და საინაგურაციო მიმართვების მიხედვით. ბსუ-ს უფროსმა მასწავლებელმა მაია ბოლქვაძემ ისაუბრა საქართველოში საპრეზიდენტო კანდიდატების წინასაარჩევნო კამპანიებში გამოყენებული რიტორიკულ ხერხებზე და წარმოადგინა შესაბამისი ლინგივისტური ანალიზი.