19-20 მაისს, საქართველოს ეროვნულ ბოტანიკურ ბაღში ბიომრავალფეროვნების საერთაშორისო დღისადმი მიძღვნილი კონფერენცია „ბიომრავალფეროვნება და საქართველო“ გაიმართა. კონფერენცია სამკურნალო მცენარეთა განყოფილების 100 წლისთავს მიეძღვნა და მასში ბათუმის შოთა რუსთაველის სახელმწიფო უნივერსიტეტთან ერთად ბათუმის ბოტანიკური ბაღი, საქართველოს უმაღლესი საგანმანათლებლო დაწესებულებები და არასამთავრობო ორგანიზაციები მონაწილეობდნენ.
სამეცნიერო მოხსენებები წარმოადგინეს ბათუმის შოთა რუსთაველის სახელმწიფო უნივერსიტეტისა და ბათუმის ბოტანიკური ბაღის წარმომადგენლებმა.

6 მაისს, ბათუმის ბოტანიკური ბაღის ეგზოტურ მცენარეთა დეპარტამენტის საკოლექციო სათბურიდან ბათუმის შოთა რუსთაველის სახელმწიფო უნივერსიტეტის ფიტოპათოლოგიისა და ბიომრავალფეროვნების ინსტიტუტს 42 სახეობის 216 ნერგი გადაეცა საჩუქრად. ნერგები ინსტიტუტის საკუთრებაში არსებულ სამეცნიერო - კვლევითი საქმიანობისთვის განკუთვნილი ქობულეთის ყოფილი სამკურნალო მცენარეთა ზონალური სადგურის 5,2 ჰა მიწის ნაკვეთის განაშენიანებას ითვალისწინებს.

2016 წლის 21 მარტიდან 29 აპრილამდე, ბსუ-ს ფიტოპათოლოგიისა და ბიომრავალფეროვნების ინსტიტუტის უფროსი მეცნიერ თანამშრომელი, ტექნოლოგიური ფაკულტეტის დოქტორანტი ქეთინო ნაცარიშვილი, შოთა რუსთაველის ეროვნული სამეცნიერო ფონდის პროექტის ფარგლებში კვლევითი ვიზიტით ჩინეთის ჩრდილო-დასავლეთის აგრარული უნივერსიტეტის (Northwest A&F University) მარცვლეულთა სტრესის ბიოლოგიის მთავარ ლაბორატორიაში იმყოფებოდა.

ბათუმის შოთა რუსთაველის სახელმწიფო უნივერსიტეტის ფიტოპათოლოგიისა და ბიომრავალფეროვნების ინსტიტუტის კოლექტივი ულოცავს 60 წლის იუბილეს ინსტიტუტის დირექტორს, ბატონ გურამ მემარნეს და უსურვებს დღეგრძელობას, ბედნიერებას, წარმატებებს პირად და საზოგადოებრივ ცხოვრებაში, სამეცნიერო, ადმინისტრაციული და სამეურნეო საქმიანობის მდიდარი გამოცდილების გაზიარებას მომავალ თაობებზე, კვლავ დიდხანს მუხლჩაუხრელად შრომას ინსტიტუტის, უნივერსიტეტის, რეგიონის და ქვეყნის საკეთილდღეოდ.

ბათუმის შოთა რუსთაველის სახელმწიფო უნივერსიტეტის ფიტოპათოლოგიისა და ბიომრავალფეროვნების ინსტიტუტის მეცნიერ - თანამშრომლებმა გალინა მეფარიშვილმა და მაკა მურადაშვილმა მონაწილეობა მიიღეს 22-25 თებერვალს ყირგიზეთში, ქალაქ ბიშკეკში გამართულ საერთაშორისო სემინარში. სემინარის თემას წარმოადგენდა: „კარტოფილის მურა სიდამპლის გამომწვევი ბაქტერიული პათოგენის (Ralstonia solanacearum) მონიტორინგის, დიაგნოსტიკისა დ ფიტოსანიტარული რისკის შეფასების მეთოდები“. დაავადება მურა სიდამპლე წარმოადგენს სერიოზულ პრობლემას კარტოფილის, პომიდვრისა და სხვა კულტურათა წარმოებისთვის, ამიტომ მის გამომწვევ პათოგენს (Ralstonia solanacearum) ბევრ ქვეყანაში საკარანტინო ობიექტის სტატუსი აქვს მინიჭებული და მკაცრი კონტროლის ქვეშ იმყოფება.