ბათუმის შოთა რუსთაველის სახელმწიფო უნივერსიტეტში საერთაშორისო კონფერენცია „ტრანსსასაზღვრო თანამშრომლობა შავი ზღვის აუზის ქვეყნებში ჭარბტენიანი ტერიტორიების ბიომრავალფეროვნების შესანარჩუნებლად“ გაიხსნა. სამი დღის განმავლობაში ბსუ-ს პროფესორ-მასწავლებლები, ფიტოპათოლოგიისა და ბიომრავალფეროვნების ინსტიტუტის მეცნიერები, ადგილობრივი სამთავრობო ორგანიზაციების წარმომადგენლები, გარემოს ეროვნული სააგენტოს ექსპერტები, დაცული ტერიტორიების, ბათუმის ბოტანიკური ბაღის სპეციალისტები, პედაგოგები, საქართველოს, სომხეთის. აზერბაიჯანის, თურქმენეთის წარმომადგენლები მოხსენებებს წარმოადგენენ შავი ზღვის აუზის ქვეყნების ჭარბტენიანი ტერიტორიების ბიომრავალფეროვნების აქტუალურ საკითხებზე.

ბსუ-ს პროფესორებმა და მკვლევრებმა ჯემალ კარალიძემ, ნუგზარ მგელაძემ და გალინა მეფარიშვილმა შოთა რუსთაველის საქართველოს ეროვნული სამეცნიერო ფონდის 2021 წლის ფუნდამენტური კვლევების სახელმწიფო სამეცნიერო გრანტების კონკურსში გაიმარჯვეს. ბათუმის შოთა რუსთაველის სახელმწიფო უნივერსიტეტი პროფესორებსა და მკვლევრებს ულოცავს მნიშვნელოვან გამარჯვებას და უსურვებს წარმატებებს.

საქართველოს განათლებისა და მეცნიერების სამინისტროს, შოთა რუსთაველის ეროვნული სამეცნიერო ფონდისა და ეროვნული ბიბლიოთეკის ორგანიზებით, გაიმართა ღონისძიება „წლის საუკეთესო მიღწევა“, რომელიც ითვალისწინებდა 2021 წლის განმავლობაში განხორციელებული ყველაზე მნიშვნელოვანი მიღწევის პოპულარიზაციას. ბათუმის შოთა რუსთაველის სახელმწიფო უნივერსიტეტის ნიკო ბერძენიშვილის ინსტიტუტის მკვლევრები ირინე ვარშალომიძე და ნინო ძნელაძე ღონისძიებაზე წარსდგნენ ნაშრომით „ხარიტონ ახვლედიანის სახელობის აჭარის მუზეუმში დაცული მონეტების კატალოგი“. ფიტოპათოლოგიისა და ბიომრავალფეროვნების ინსტიტუტის მკვლევრებმა მარიამ მეტრეველმა და იზოლდა მაჭუტაძემ სამეცნიერო საზოგადოების წარმომადგენლებს გააცნეს სამეცნიერო ნაშრომი „კოლხეთის ტყეები და ჭარბტენიანი ტერიტორიები მსოფლიო ბუნებრივი მემკვიდრეობის უბანი“.

ბათუმის შოთა რუსთაველის სახელმწიფო უნივერსიტეტის ფიტოპათოლოგიისა და ბიომრავალფეროვნების ინსტიტუტს FAO-ს სპეციალისტი საჰარ პინკოვიცი ეწვია. გამძლეობის გენეტიკის განყოფილების ხელმძღვანელთან ზოია სიხარულიძესთან გამართულ შეხვედრაზე სტუმარმა ისაუბრა პროექტის შესახებ, რომელიც საქართველოში კარტოფილის გამძლე ჯიშების შემოტანას და ფერმერულ მეურნეობებში მათ გავრცელებას ისახავს მიზნად. ღონისძიებაზე დაიგეგმა სამომავლო გეგმები და შესაძლო თანამშრომლობის მიმართულებები.

ბათუმის შოთა რუსთაველის სახელმწიფო უნივერსიტეტის ფიტოპათოლოგიისა და ბიომრავალფეროვნების ინსტიტუტში სტუმრად იმყოფებოდა აშშ-ის საელჩოს სოფლის მეურნეობის დეპარტამენტის მრჩეველი სოფლის მეურნეობის საკითხებში დემნა ძირკვაძე. შეხვედრა მიზნად ისახავდა სოფლის მეურნეობის პროფილის მქონე ინსტიტუტების მდგრადი შესაძლებლობების ჩამოყალიბებით, გლობალურ სასოფლო-სამეურნეო ბაზრებზე საქართველოს ინტეგრაციის ზრდას. საელჩოს მიზანია, სოფლის მეურნეობის სექტორისთვის შეთავაზებული სერვისების რეფორმირებით და სხვადასვა საგანმანათლებლო პროგრამების შემუშავებით დაეხმაროს საქართველოს ეკონომიკურ წინსვლაში.