ბათუმის შოთა რუსთაველის სახელმწიფო უნივერსიტეტს გაეროს ბავშვთა ფონდის (UNICEF) ახალი წარმომადგენელი საქართველოში, იზაბელა კასტროჯოვანი და ფონდის კომუნიკაციის პროგრამის ხელმძღვანელი, მაია ქურციკიძე ეწვივნენ.
გაცნობითი ხასიათის შეხვედრა შედგა ბსუ-ს რექტორის მოადგილეებთან - გიორგი ქათამაძესთან და თამარ სირაძესთან, ასევე ზუსტ მეცნიერებათა და განათლების ფაკულტეტის დეკანთან, ლელა თურმანიძესთან და ბავშვის უფლებათა ცენტრის ექსპერტებთან. მხარეებმა იუნისეფის მხარდაჭერით განხორციელებული პროექტები, მათი შედეგები და სამომავლო თანამშრომლობის პერსპექტივები განიხილეს.

უმაღლესი საგანმანათლებლო პროგრამების აკრედიტაციის საბჭომ, 2026 წლის 21 აპრილს ივანე ჯავახიშვილის სახელობის თბილისის სახელმწიფო უნივერსიტეტის, ბათუმის შოთა რუსთაველის სახელმწიფო უნივერსიტეტისა და იაკობ გოგებაშვილის სახელობის თელავის სახელმწიფო უნივერსიტეტების ერთობლივ სამაგისტრო პროგრამას „ბავშვის უფლებები“, მიანიჭა უპირობო აკრედიტაცია.
„ბავშვის უფლებების“ სამაგისტრო პროგრამა უნიკალურია არა მხოლოდ ქართულ საგანმანათლებლო სივრცეში, არამედ პოსტსაბჭოთა ქვეყნებისთვისაც. იგი შემუშავდა გაეროს ბავშვთა ფონდისა და საფრანგეთის საელჩოს მხარდაჭერით. ახალი სამაგისტრო პროგრამის მიზანია ბავშვთა საკითხებზე მომუშავე პროფესიონალების მომზადება, იგი უზრუნველყოფს ბავშვის უფლებებთან დაკავშირებული კონკრეტული სამართლებრივი, სოციალური, საგანმანათლებლო, ფსიქოლოგიური და პოლიტიკის საკითხების სიღრმისეულ ცოდნას.

10 დეკემბერს, ზუსტ მეცნიერებათა და განათლების ფაკულტეტის ბავშვთა უფლებების ცენტრის თანამშრომლები ადამიანის უფლებების საერთაშორისო დღის აღსანიშნავად, ხელვაჩაურის მუნიციპალიტეტის დაბა მახინჯაურის საჯარო სკოლას ეწვივნენ.
ზუსტ მეცნიერებათა და განათლების ფაკულტეტის პროფესორმა ლელა თავდგირიძემ და ასოცირებულმა პროფესორებმა: დიანა ახვლედიანმა და დალი დობორჯგინიძემ, სკოლის ბიბლიოთეკას საჩუქრად გადასცეს შოთა რუსთაველის საქართველოს ეროვნული სამეცნიერო ფონდის დაფინანსებით გამოცემული მონოგრაფია: „უსაფრთხო სკოლის ოპტიმალური მოდელის გამოვლენა საქართველოს სოციალურ კონტექსტში“ და აჭარის განათლებისა და სპორტის სამინისტროს „უმაღლესი განათლების ხელშეწყობის“ პროგრამის ფარგლებში გამოცემული სახელმძღვანელო: „როგორ ჩამოვაყალიბოთ დამოუკიდებელი მასწავლებლები: მეტაკოგნიტური, თვით-რეგულატორული და სასწავლო უნარების სწავლება - პრაქტიკოსების გზამკვლევი“. ასევე, ზუსტ მეცნიერებათა და განათლების ფაკულტეტის ასოცირებულმა პროფესორმა თათია ნაკაშიძემ ჩაატარა სემინარი თემაზე: „ხელოვნური ინტელექტის პასუხისმგებლიანი და უსაფრთხო გამოყენება სასწავლო პროცესში“.

ბათუმის შოთა რუსთაველის სახელმწიფო უნივერსიტეტის 90 წლის იუბილესთან დაკავშირებით UNICEF საქართველოს ორგანიზებით 27 ნოემბერს ზუსტ მეცნიერებათა და განათლების ფაკულტეტის სტუდენტებისთვის, ბავშვის უფლებების ცენტრში, გაიმართა სემინარი მედიაწიგნიერების შესახებ.
სემინარზე მომავალმა მასწავლებლებმა განიხილეს თუ რა გამოწვევებია დღეს ამ მიმართულებით, როგორ გადააქცევს მედიაწიგნიერება ინფორმაციას ცოდნად და როგორ უნდა დაიცვას თავი პიროვნებამ დეზინფორმაციისა და კიბერსაფრთხეებისგან.