ახალი ამბები

ბათუმის შოთა რუსთაველის სახელმწიფო უნივერსიტეტმა წმინდა მოწამე ეკატერინეს სახელობის სათნოების სავანეში მორიგი საქველმოქმედო აქცია გამართა. ღონისძიების ფარგლებში, უნივერსიტეტის რექტორმა, პროფესორმა მერაბ ხალვაშმა, ადმინისტრაციის ხელმძღვანელმა ნიკა ჩხარტიშვილმა და ტურიზმის ფაკულტეტის დეკანმა ირაკლი კორძაიამ სათნოების სახლის მაცხოვრებლებს ახალი წელი მიულოცეს და საჩუქრად სასურსათო პროდუქტები და ტკბილეული გადასცეს. ბათუმის წმინდა მოწამე ეკატერინეს სახელობის სათნოების სავანეში 130-მდე ბენეფიციარი ცხოვრობს. საქველმოქმედო აქცია უნივერსიტეტმა სოციალური პასუხისმგებლობის ფარგლებში განახორციელა.

ქალაქ ბათუმის მერმა არჩილ ჩიქოვანმა ბათუმის შოთა რუსთაველის სახელმწიფო უნივერსიტეტის ღვაწლმოსილი პროფესორ-მასწავლებლები და მკვლევრები განათლების სფეროში ხანგრძლივი ნაყოფიერი საქმიანობისა და მეცნიერებაში შეტანილი განსაკუთრებული წვლილისათვის დააჯილდოვა.ფიტოპათოლოგიისა და ბიომრავალფეროვნების ინსტიტუტის მეცნიერს იზოლდა მაჭუტაძეს, აგრარული და მემბრანული ტექნოლოგიების ინსტიტუტის მეცნიერს რაულ გოცირიძეს, ნიკო ბერძენიშვილის ინსტიტუტის მკვლევრებს ჯემალ ვარშალომიძეს და ჯემალ მიქელაძეს, ჰუმანიტარულ მეცნიერებათა ფაკულტეტის ლექტორებს ნოდარ ბარამიძეს, ციალა მდინარაძეს და ბიბლიოთეკარს მერი ლომინაძეს დამსახურებული მოღვაწის წოდება მიენიჭათ.

ბათუმის შოთა რუსთაველის სახელმწიფო უნივერსიტეტის ემერიტუს-პროფესორის, ცნობილი მეცნიერისა და საზოგადო მოღვაწის, ისტორიის მეცნიერებათა დოქტორის ბიჭიკო დიასამიძის 80 წლის იუბილე ბსუ-ში რამდენიმე ღონისძიებით აღინიშნა. უნივერსიტეტში გაიხსნა ემერიტუს-პროფესორ ბიჭიკო დიასამიძის სახელობის აუდიტორია, გაიმართა საიუბილეო სხდომა და მისი წიგნის „ისტორიული ეტიუდები“ მესამე ტომის წარდგენა. ღონისძიებაზე უნივერსიტეტის რექტორმა, პროფესორმა მერაბ ხალვაშმა, პროფესორ-მასწავლებლებმა, მკვლევრებმა და საზოგადოების წარმომადგენლებმა კიდევ ერთხელ გაიხსენეს ღვაწლმოსილი პროფესორის სასწავლო-სამეცნიერო მიღწევები და საზოგადოებრივი საქმიანობა.

საქართველოს განათლებისა და მეცნიერების სამინისტროს, შოთა რუსთაველის ეროვნული სამეცნიერო ფონდისა და ეროვნული ბიბლიოთეკის ორგანიზებით, გაიმართა ღონისძიება „წლის საუკეთესო მიღწევა“, რომელიც ითვალისწინებდა 2021 წლის განმავლობაში განხორციელებული ყველაზე მნიშვნელოვანი მიღწევის პოპულარიზაციას. ბათუმის შოთა რუსთაველის სახელმწიფო უნივერსიტეტის ნიკო ბერძენიშვილის ინსტიტუტის მკვლევრები ირინე ვარშალომიძე და ნინო ძნელაძე ღონისძიებაზე წარსდგნენ ნაშრომით „ხარიტონ ახვლედიანის სახელობის აჭარის მუზეუმში დაცული მონეტების კატალოგი“. ფიტოპათოლოგიისა და ბიომრავალფეროვნების ინსტიტუტის მკვლევრებმა მარიამ მეტრეველმა და იზოლდა მაჭუტაძემ სამეცნიერო საზოგადოების წარმომადგენლებს გააცნეს სამეცნიერო ნაშრომი „კოლხეთის ტყეები და ჭარბტენიანი ტერიტორიები მსოფლიო ბუნებრივი მემკვიდრეობის უბანი“.

ბათუმის შოთა რუსთაველის სახელმწიფო უნივერსიტეტს 2021-2022 სასწავლო წელს 318 სტიპენდიანტი ჰყავს. კონკურსის საფუძველზე, სახელმწიფო სტიპენდია 226-მა სტუდენტმა მოიპოვა, 31-მა - პირველკურსელთა სტიპენდია, 16-მა - საფაკულტეტო სახელობითი სტიპენდია, 2-მა - შოთა რუსთაველისა და ხუსეინ ნაკაიძის სახელობის საუნივერსიტეტო სახელობითი სტიპენდია, 8-მ - ავთანდილ ბარათაშვილის სახელობის სტიპენდია, 10-მა - გუდავაძე-პატარკაციშვილის ფონდის სტიპენდია, 4-მა - თამაზ ბექაიას ფონდის სტიპენდია და 21-მა ლუკა ასათიანის სახელობის სტიპენდია. სასტიპენდიო ფონდი შეადგენს 230 475 ლარს. ბსუ ულოცავს სტუდენტებს სტიპენდიის მოპოვებას და უსურვებს წარმატებებს.