ახალი ამბები

ბათუმის შოთა რუსთაველის სახელმწიფო უნივერსიტეტის პროფესორმა ზაზა შაშიკაძემ, პროფესორმა ნუგზარ ღომიძემ და ასოცირებულმა პროფესორმა ნარგიზა ალასანიამ შოთა რუსთაველის საქართველოს ეროვნული სამეცნიერო ფონდის საგრანტო კონკურსებში გაიმარჯვეს. პროფესორი ზაზა შაშიკაძე „სახელმწიფო გრანტი საქართველოში და საზღვარგარეთ არსებული ქართული მატერიალური და სულიერი მემკვიდრეობის სამეცნიერო კვლევისათვის“ ფარგლებში სამეცნიერო პროექტს „ოსმალურ საეკლესიო დავთრებში დაცული ცნობები ქართული ეკლესია-მონასტრების შესახებ“ განახორციელებს. პროფესორი ნუგზარ ღომიძე და ასოცირებული პროფესორი ნარგიზ ალასანია „საგამომცემლო სახელმწიფო სამეცნიერო გრანტების კონკურსის“ ფარგლებში სახელმძღვანელოებს - „რადიოფიზიკა“ და „მწვანე ტექნოლოგიების როლი ბიზნესის წარმატებასა და ქვეყნის ეკონომიკურ განვითარებაში“ - გამოსცემენ. უნივერსიტეტი ულოცავს პროფესორებს მნიშვნელოვან წარმატებს.

საქართველოში ევროკავშირის კვლევისა და ინოვაციის ახალი ჩარჩო პროგრამა Horizon Europe-ის ეროვნული ოფისი დაფუძნდა. საქართველოს განათლებისა და მეცნიერების მინისტრმა მიხეილ ჩხენკელმა ოფისის დაფუძნების ღონისძიება გახსნა, პროგრამის მნიშვნელობაზე ისაუბრა და მეცნიერებს მნიშვნელოვანი მოვლენა მოულოცა. Horizon Europe-ის ეროვნული ოფისის მისიაა ევროკავშირისა და საქართველოს უმაღლეს საგანმანათლებლო დაწესებულებებსა და კვლევით ინსტიტუტებს შორის მედიაციისა და კოორდინირებული მუშაობის უზრუნველყოფა. ღონისძიებას ბათუმის შოთა რუსთაველის სახელმწიფო უნივერსიტეტის რექტორი მერაბ ხალვაში, საქართველოს სამეცნიერო საზოგადოება, უმაღლესი საგანმანათლებლო დაწესებულებების, კვლევითი ინსტიტუტებისა და დიპლომატიური კორპუსის წარმომადგენლები ესწრებოდნენ.

სტუდენტურ კამპანიას - „ავიცრათ ერთმანეთისთვის“ ბათუმის შოთა რუსთაველის სახელმწიფო უნივერსიტეტის სტუდენტები შეუერთდნენ. უმაღლესმა საგანმანათლებლო დაწესებულებამ გამოწვევა ტექნოლოგიური უნივერსიტეტისგან მიიღო. ღონისძიების ფარგლებში საბუნებისმეტყველო მეცნიერებათა და ჯანდაცვის ფაკულტეტის სტუდენტები ბრენდირებული ხალათებითა და პირბადეებით შეიკრიბნენ და ვაქცინაციის პროცესის გააქტიურების მიზნით, საინფორმაციო ბროშურები დაარიგეს. კომპანია „ავიცრათ ერთმანეთისთვის“ ხორციელდება ორგანიზაცია „ქოლგის“ მხარდაჭერით.

ბათუმის შოთა რუსთაველის სახელმწიფო უნივერსიტეტის აკადემიურმა საბჭომ საქართველოში გაეროს ბავშვთა ფონდის წარმომადგენელს, სამართლის დოქტორ ღასან ხალილს საპატიო დოქტორის წოდება მიანიჭა. ღასან ხალილმა მნიშვნელოვანი წვლილი შეიტანა ბსუ-ს განვითარებასა და მომავალი თაობების აღზრდის საქმეში. მისი ინიციატივით, Unicef-ის საქართველოს ოფისი წლებია მხარს უჭერს უნივერსიტეტს სხვადასხვა საგანმანათლებლო აქტივობის განხორციელებაში. დოქტორ ღასან ხალილის ხელმძღვანელობით ბსუ-ში გაიხსნა ბავშვთა უფლებების ცენტრი, ჩატარდა საერთაშორისო კონფერენცია ბავშვის უფლებებზე, დაფინანსდა და ხორციელდება საგრანტო პროექტი ბავშვთა უფლებების ცენტრის გასაძლიერებლად, ტრენინგები გაირა აკადემიურმა პერსონალმა ზოგადი განათლების დაწყებითი საფეხურის მასწავლებლის მომზადებისა და სკოლამდელი განათლების საკითხებში.

“პანდემიას ასრულებ შენ!“ – ამ დევიზით ვაქცინაციის წამახალისებელ ექვსთვიან საინფორმაციო კამპანიაში ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტის მედიცინის მიმართულების სტუდენტები ერთვებიან. კამპანია გაეროს ბავშვთა ფონდისა და იმუნიზაციისა და ვაქცინოლოგიის ასოციაციის (AIVA) მიერ USAID-ის მხარდაჭერით მიმდინარეობს და Covid 19-ის შესახებ საზოგადოების ინფორმირებას ისახავს მიზნად.
საინფორმაციო კამპანიის ფარგლებში, ბათუმის შოთა რუსთაველის სახელმწიფო უნივერსიტეტში თანამშრომლობის მემორანდუმი გაფორმდა, რომელსაც ხელი ბსუ-ს რექტორმა მერაბ ხალვაშმა, გაეროს ბავშვთა ფონდის წარმომადგენელმა საქართველოში (UNICEF) ღასან ხალილიმ და იმუნიზაციისა და ვაქცინოლოგიის ასოციაციის (AIVA) წარმომადგენელმა მარიამ ჯაშმა მოაწერეს.