ახალი ამბები

ღვაწლმოსილი მეცნიერის, ცნობილი ეთნოლოგის, ბსუ-ს ნიკო ბერძენიშვილის ინსტიტუტის უფროსი მეცნიერ თანამშრომლის ნოდარ კახიძის 90 წლისადმი მიძღვნილი საიუბილეო სხდომა გაიმართა შოთა რუსთაველის სახელმწიფო უნივერსიტეტში. მკვლევარს იუბილე მიულოცეს, წარმატებები უსურვეს, სამახსოვრო საჩუქრები გადასცეს და მის ღვაწლზე ისაუბრეს უნივერსიტეტის რექტორმა მერაბ ხალვაშმა, ინსტიტუტის დირექტორმა როინ მალაყმაძემ, საქართველოს პარლამენტის ვიცე სპიკერმა ილია ნაკაშიძემ, აჭარის ა.რ. უმაღლესი საბჭოს თავმჯდომარის მოადგილემ მერაბ კარანაძემ, აჭარის ა.რ. განათლების, კულტურისა და სპორტის მინისტრმა მაია ხაჯიშვილმა, თსუ-ს ივანე ჯავახიშვილის ისტორიისა და ეთნოლოგიის ინსტიტუტის მთავარმა მეცნიერ თანამშრომელმა როლანდ თოფჩიშვილმა და საზოგადოების წარმომადგენლებმა. საიუბილეო საღამოზე ნოდარ კახიძე მეცნიერების განვითარებაში შეტანილი წვლილისათვის ბსუ-ს რექტორმა მერაბ ხალვაშმა შოთა რუსთაველის მედლით დააჯილდოვა და აჭარის ა.რ. უმაღლესი საბჭოს თავმჯდომარის მოადგილემ მერაბ კარანაძემ აჭარის ა.რ. უმაღლესი საბჭოს საპატიო სიგელი გადასცა.

საქართველოს პარლამენტის დისტანციური სტაჟირების პროგრამის წარდგენა გაიმართა ბათუმის შოთა რუსთაველის სახელმწიფო უნივერსიტეტში. პარლამენტის აპარატის უფროსმა გივი მიქანაძემ სტუდენტებს დისტანციური სტაჟირების საპილოტე პროგრამა წარუდგინა და მასში მონაწილეობის წესები გააცნო. დისტანციური სტაჟირების უპრეცენდენტო მოდელი ექვსთვიანია და მასში მონაწილეობა სხვადასხვა ფაკულტეტის დამამთავრებელი კურსის სტუდენტებთან ერთად უნივერსიტეტის კურსდამთავრებულებს შეეძლებათ. პირველ ეტაპზე კონკურსი ადამიანის რესურსების მართვისა და საერთაშორისო ურთიერთობების მიმართულებებში გამოცხადდა. მონაწილეთა განცხადებების მიღება ათ თებერვალს დასრულდება.

კამპანიის „ცხოვრება მშვენიერია“ ფარგლებში ბსუ-ს იურიდიული და სოციალურ მეცნიერებათა ფაკულტეტის სტუდენტების ორგანიზებით გამწვანების აქცია გაიმართა. კამპანია მიზნად ისახავდა ახალგაზრდებში ცხოვრების მიმართ პოზიტიური დამოკიდებულების დამკვიდრებას და დადებითი აქტივობების წახალისებას. კამპანიის ფარგლებში ბათუმის ცენტრალურ პარკს 25 ძირი ცაცხვის და მაგნოლია გრანდიფლორას ხე შეემატა. აქცია ბათუმის შოთა რუსთაველის სახელმწიფო უნივერსიტეტის სტუდენტების ორგანიზებითა და ბათუმის ლანდშაფტური დაგეგმარებისა და გამწვანების სამსახურის მხარდაჭერით გაიმართა.

ბათუმის შოთა რუსთაველის სახელმწიფო უნივერსიტეტის რექტორმა მერაბ ხალვაშმა, აჭარის ავტონომიური რესპუბლიკის სოფლის მეურნეობის მინისტრმა ტიტე აროშიძემ და ორგანიზაცია „მწვანე სექტორის“ თავმჯდომარემ ილია გუჩმანიძემ საბუნებისმეტყველო მეცნიერებათა და ჯანდაცვის ფაკულტეტის აქვაკულტურის ლაბორატორია გახსნეს და თანამშრომლობის მემორანდუმს მოაწერეს ხელი. ხელშეკრულება ითვალისწინებს ბათუმის შოთა რუსთაველის სახელმწიფო უნივერსიტეტის სასწავლო პროგრამაში მარიკულტურის სპეციალიზაციის განვითარებისა და საზღვაო ფერმერთა კვალიფიციური კადრების მომზადების ხელშეწყობას.

ბათუმში „მაგნოლია 2019“-ის დაჯილდოების ცერემონია გაიმართა. ღონისძიებაზე აჭარის ტურიზმისა და კურორტების დეპარტამენტმა რეგიონში საუკეთესო ტურისტული სერვისის მიმწოდებლები, კერძო და სამთავრობო სექტორის წარმომადგენლები დააჯილდოვა. ბათუმის შოთა რუსთაველის სახელმწიფო უნივერსიტეტმა სიგელი რამდენიმე ნომინაციაში მიიღო. ასევე, დაჯილდოების ცერემონიაზე ბსუ-ს რექტორმა მერაბ ხალვაშმა საუკეთესო გიდს სალომე გორგილაძეს ჯილდო გადასცა.