ახალი ამბები

.ბათუმის შოთა რუსთაველის სახელმწიფო უნივერსიტეტში რექტორის არჩევნები ჩატარდა. მერაბ ხალვაშს აკადემიურმა საბჭომ სიითი სრული შემადგენლობით, 11 ხმით მხარი დაუჭირა და რექტორად მეორე ვადით აირჩია. არჩევნებში ორი კანდიდატი - მერაბ ხალვაში და ინგა შამილიშვილი მონაწილეობდა. კენჭისყრის დაწყებამდე რექტორობის კანდიდატებმა უმაღლესი საგანმანათლებლო დაწესებულების საკანონმდებლო ორგანოს წევრებს სამოქმედო გეგმა გააცნეს. უნივერსიტეტის რექტორის უფლებამოსილების ვადა ოთხი წელია.

საქართველოს განათლების, მეცნიერების, კულტურისა და სპორტის მინისტრის მოადგილე თამარ ქიტიაშვილი ბათუმის შოთა რუსთაველის სახელმწიფო უნივერსიტეტს ეწვია. მინისტრის მოადგილე ბსუ-ს რექტორს მერაბ ხალვაშს და პროფესიული პროგრამების მართვის და უწყვეტი განათლების ცენტრის დირექტორს მადონა მიქელაძეს შეხვდა. თამარ ქიტიაშვილი ადგილზე გაეცნო უნივერსიტეტში სასწავლო პროცესის აღდგენისთვის მიმდინარე მოსამზადებელ სამუშაოებს. შეხვედრაზე ასევე, სამომავლო გეგმები და თანამშრომლობის პერსპექტივები განიხილეს.

აშშ საერთაშორისო განვითარების სააგენტოს (USAID) საბაზისო განათლების პროგრამის ფარგლებში, ხელი მოეწერა საგრანტო ხელშეკრულებას, რომლის თანახმადაც ბათუმის შოთა რუსთაველის სახელმწიფო უნივერსიტეტი მიიღებს დაფინანსებას საქართველოს საჯარო სკოლებში მასწავლებელთა და სკოლის დირექტორთა პროფესიული განვითარების სხვადასხვა აქტივობების განსახორციელებლად.

აჭარის ა.რ. მთავრობის თავმჯდომარემ თორნიკე რიჟვაძემ ბათუმის შოთა რუსთაველის სახელმწიფო უნივერსიტეტის რექტორთან მერაბ ხალვაშთან და საქართველოს ინოვაციებისა და ტექნოლოგიების სააგენტოს თავმჯდომარესთან ავთანდილ კასრაძესთან ერთად, ბსუ-ს ახალი სასწავლო კორპუსის მშენებლობა დაათვალიერა. თანამედროვე სტანდარტების ახალი სასწავლო კორპუსის მშენებლობა დასრულდა და მიმდინარეობს ინტერიერის მოწყობა. შენობის პირველ სართულზე ტექნოპარკი, ხოლო მეორე და მესამე სართულზე პროფესიული პროგრამების მართვის და უწყვეტი განათლების ცენტრი განთავსდება, რომელიც ფუნქციონირებას შემოდგომაზე დაიწყებს.

საქართველოს ჩემპიონი ონლაინ დებატებში „ერთი-ერთზე“ ბსუ-ს ეკონომიკისა და ბიზნესის ფაკულტეტის ბიზნესის ადმინისტრირების საბაკალავრო საგანმანათლებლო პროგრამის IV კურსის სტუდენტი გოგიტა ბარამიძე გახდა. პირველობა 20 აპრილის დაიწყო და 6 ივნისს დასრულდა. ტურნირში მონაწილეობა მიიღო საქართველოს ყველაზე პროგრესულად მოაზროვნე 16-35 წლის 64-მა ახალგაზრდამ. ჩემპიონატი „საერთაშორისო რესპუბლიკური ინსტიტუტის“ ორგანიზებით და საქართველოს საგანმანათლებლო დებატების ასოციაციის პარტნიორობით გაიმართა. ბათუმის შოთა რუსთაველის სახელმწიფო უნივერსიტეტი ულოცავს გოგიტა ბარამიძეს გამარჯვებას და უსურვებს წარმატებებს.