ახალი ამბები

ფრანკოფონიის საუნივერსიტეტო სააგენტოს (AUF) პროგრამების წარდგენა გაიმართა ბათუმის შოთა რუსთაველის სახელმწიფო უნივერსიტეტში. ფრანკოფონიის საუნივერსიტეტო სააგენტოს წარმომადგენელმა საქართველოში თამარ ღარიბაშვილმა სტუდენტებსა და პროფესორ-მასწავლებლებს სააგენტოს საგანმანათლებლო პროგრამები და საერთაშორისო პროექტებში მონაწილეობის პირობები გააცნო. ღონისძიების ფარგლებში, სააგენტოს ორგანიზებით GIPA-ს ლექტორმა ქეთი კვინიკაძემ სტუდენტებისთვის ტრენინგი ჩაატარა თემაზე: „მე ვარ ბრენდი!, ანუ როგორ წარვადგინო საკუთარი თავი?“.

ბსუ ERASMUS+-ის ინსტიტუციური განვითარების პროექტში „უნივერსიტეტების როლი რეგიონის განვითარებაში“ (ROLE OF UNIVERSITIES IN THE REGIONAL DEVELOPMENT - RURD) მონაწილეობს. აკაკი წერეთლის სახელმწიფო უნივერსიტეტში გამართულ პროექტის პირველ~ი საკოორდინაციო შეხვედრის მუშაობაში ჩართული იყვნენ ბსუ-ს რექტორის მოადგილე, პროფესორი ნათია წიკლაშვილი, ჰუმანიტარულ მეცნიერებათა ფაკულტეტის დეკანი, პროფესორი მარინა გიორგაძე და ასოცირებული პროფესორი ხათუნა ბერიძე. პროექტის მიზანია, ევროკავშირის პარტნიორებთან თანამშრომლობით საქართველოს რეგიონალური უმაღლესი საგანმანათლებლო დაწესებულებების როლის გაზრდა რეგიონების განვითარებაში, მათი მისიისა და სტრატეგიული განვითარების გეგმის მოდერნიზება.

ეკონომიკისა და მდგრადი განვითარების სამინისტროს ინოვაციების და ტექნოლოგიების სააგენტოს თანადაფინანსების საგრანტო პროგრამის წარდგენა გაიმართა ბათუმის შოთა რუსთველის სახელმწიფო უნივერსიტეტში. სააგენტოს თანადაფინანსების საგრანტო პროგრამის კოორდინატორმა გიორგი ბაგაშვილმა სტუდენტებს საგრანტო კონკურსში მონაწილეობის წესები და პირობები გააცნო. პროექტის მიზანია, საერთაშორისო პოტენციალის მქონე ინოვაციური პროდუქტების და მომსახურების შემუშავება-ათვისების და კომერციალიზაციის გზით ინოვაციების და ინოვაციური საწარმოების წარმოქმნის სტიმულირება.

ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტის სტუდენტებს საერთაშორისო ფრანგული ბრენდის სასტუმრო „ლე მერიდიანში“ დასაქმების საშუალება ეძლევათ. სასტუმროს წარმომადგენლებმა უმაღლეს საგანმანათლებლო დაწესებულებაში საინფორმაციო შეხვედრა გამართეს და ახალგაზრდებს არსებული ვაკანსიები გააცნეს. „ლე მერიდიანი“ 40-მდე სხვადასხვა პოზიციაზე აცხადებს კონკურსს. სასტუმროს სულ 100-მეტი ვაკანტური ადგილი აქვს და პერსონალი ძირითადად ტურიზმის ფაკულტეტის სტუდენტებით დაკომპლექტდება. 5-ვარსკვლავიანი სასტუმრო „ლე მერიდიანი“ „ბათუმი თაუერში“ განთავსდება.

განათლების ხარისხის განვითარების ეროვნული ცენტრის უმაღლესი საგანმანათლებლო პროგრამების აკრედიტაციის სამმართველოს უფროსმა თეა ნადირაძემ ბათუმის შოთა რუსთაველის სახელმწიფო უნივერსიტეტში სამუშაო შეხვედრა ჩაატარა თემაზე: „ეროვნული კვალიფიკაციის ჩარჩო და სწავლის სფეროების კლასიფიკატორი“. სხვადასხვა ფაკულტეტის დეკანები, საგანმანათლებლო პროგრამების ხელმძღვანელები, ფაკულტეტის ხარისხის უზრუნველყოფის სამსახურის უფროსები და დეპარტამენტის ხელმძღვანელები ეროვნული კვალიფიკაციის ჩარჩოს ძირითად ცნებებსა სწავლის სფეროების კლასიფიკატორის სტრუქტურას გაეცნენ. ღონისძიების ფარგლებში მონაწილეებმა ასევე განიხილეს განათლების სისტემის სხვადასხვა დონის შესაბამისი სწავლის შედეგების ჩამოყალიბების მიზნები და პრინციპები.