ახალი ამბები

ბათუმის შოთა რუსთაველის სახელმწიფო უნივერსიტეტის საპატიო დოქტორმა, პროფესორმა კარლ კასერმა საჯარო ლექცია წაიკითხა თემაზე: „XXI საუკუნის გამოწვევა - ვიზუალური კულტურის კვლევა შავი ზღვის რეგიონში“. მომხსენებელმა ლექციაზე ვიზუალური კულტურის კვლევის სამი ეტაპი წარმოადგინა. პროფესორმა კარლ კასერმა განიხილა პრესეკულარული ისტორია ვიზუალური კულტურების რელიგიურ ჭრილში, კინემატოგრაფია და კულტურა თანამედროვე ცხოვრებაში, რეალობისა და უტოპიის შეპირისპირება და გენდერის გავლენა ციფრულ სამყაროზე. ცნობილი მკვლევარი ვიზუალური ანთროპოლოგიის ერთ-ერთი დამფუძნებელია ევროპულ სამეცნიერო სივრცეში.

გრაცის უნივერსიტეტის ისტორიისა და ანთროპოლოგიის პროფესორს, ისტორიის ინსტიტუტის ხელმძღვანელს, ფილოსოფიის დოქტორს კარლ კასერს ბათუმის შოთა რუსთაველის სახელმწიფო უნივერსიტეტის აკადემიურმა საბჭომ საპატიო დოქტორის წოდება მიანიჭა. პროფესორ კარლ კასერს დიდი წვლილი მიუძღვის უნივერსიტეტის განვითარებასა და მომავალი თაობების აღზრდაში. ცნობილი მეცნიერის სახელს უკავშირდება ევროპულ სამეცნიერო სივრცეში ვიზუალური ანთროპოლოგიის განვითარება და ბსუ-ში ამ მიმართულებით კვლევების ჩატარება. მკვლევარი არის 11 მნიშვნელოვანი მონოგრაფიისა და მრავალი სამეცნიერო სტატიის ავტორი.

ბსუ-ს ეკონომიკისა და ბიზნესის ფაკულტეტის სტუდენტებმა: ნესტან ვარშანიძემ, გიორგი აბაშიძემ, ლაშა მამულაძემ და ბსუ-ს ფიტოპათოლოგიისა და ბიომრავალფეროვნების ინსტიტუტის მეცნიერ-თანამშრომელმა ირაკლი მიქელაძემ მონაწილეობა მიიღეს მწვანე ეკონომიკის ინოვაციების ფორუმში. ღონისძიების ფარგლებში გამართულ „მწვანე ეკონომიკის სკოლაში“ საქართველოს სხვადასხვა უნივერსიტეტის სტუდენტებმა და სატყეო სექტორის დაინტერესებულმა მხარეებმა ტყის რესურსებით მდგრად სარგებლობაზე დაფუძნებული ბიზნესგეგმები წარმოადგინეს. სტუდენტების მიერ მომზადებული კონცეფციებიდან ოთხი ყველაზე პერსპექტიული შეირჩა შემდგომი პილოტირებისათვის, რომელთა შორისაა ბსუ-ს ეკონომიკისა და ბიზნესის ფაკულტეტის სტუდენტების ნესტან ვარშანიძისა და გიორგი აბაშიძის პროექტი „ბეშუმის ტყე-პარკი“.

სოციალური პროექტის „წიგნების თარო Media“ წარდგენა გაიმართა ბათუმის შოთა რუსთაველის სახელმწიფო უნივერსიტეტში. საქართველოს პირველი არხის შემოქმედებითი გუნდის წევრებმა სტუდენტებსა და სკოლების მოსწავლეებს „წიგნების თაროს“ ახალი პლატფორმა, მობილური აპლიკაცია და პროექტში მონაწილეობის პირობები გააცნეს. „წიგნების თარო Media“ სოციალური პროექტია, რომელიც სტუდენტებსა და მოსწავლეებს შესაძლებლობას აძლევს, საქართველოს პირველ არხზე ანაზღაურებადი სტაჟირების სპეციალური პროგრამა გაიარონ. შეხვედრა „წიგნების თაროს” ტრადიციული საჯარო თამაშით გაგრძელდა, რომელსაც გადაცემის წამყვანი ალექსანდრე ლორთქიფანიძე უძღვებოდა. სწორი პასუხების ავტორები სხვადასხვა ბრენდირებული ნივთით დასაჩუქრდნენ.

ვარშავის უნივერსიტეტის აღმოსავლეთ ევროპის კვლევების განყოფილების საბჭოს გადაწყვეტილებით, ბათუმის რუსთაველის სახელმწიფო უნივერსიტეტის ზუსტ მეცნიერებათა და განათლების ფაკულტეტის პროფესორ დავით დევაძეს ტიტუს ფილიპოვიჩის სახელობის ჯილდო გადაეცა. პირველი სამეცნიერო-კვლევითი სტაჟირების პროგრამის გამარჯვებული პროფესორი დავით დევაძე სტაჟირებას ორი თვის განმავლობაში, პოლონეთში, ლუბლინის მარია კიური-სკლოდოვსკას უნივერსიტეტში გაივლის. გამარჯვებულს ჯილდო პოლონეთის ელჩმა საქართველოში მარიუშ მაშკიევიჩმა გადასცა. ცერემონიას საქართველოს პრეზიდენტი სალომე ზურაბიშვილი, საგარეო საქმეთა სამინისტროს, ვარშავისა და თბილისის სახელმწიფო უნივერსიტეტების წარმომადგენლები და სხვა ოფიციალური პირები ესწრებოდნენ.