ახალი ამბები

ბათუმის შოთა რუსთაველის სახელმწიფო უნივერსიტეტის ტექნოლოგიური ფაკულტეტის აგრარული მიმართულებისა და საბუნებისმეტყველო მეცნიერებათა და ჯანდაცვის ფაკულტეტის 10-მა სტუდენტმა აჭარის ა.რ. სოფლის მეურნეობის სამინისტროს აგროსერვის ცენტრსა და ლაბორატორიულ კვლევით ცენტრში ფასიანი ექვსთვიანი სტაჟირება გაიარა. სტუდენტებმა უნივერსიტეტში გამართულ შეხვედრაზე სტაჟირების შემაჯამებელი პრეზენტაცია წარმოადგინეს. ღონისძიებას აჭარის ა.რ. სოფლის მეურნეობის მინისტრი ტიტე აროშიძე, ბათუმის შოთა რუსთაველის სახელმწიფო უნივერსიტეტის რექტორი მერაბ ხალვაში, რექტორის მოადგილე ნათია წიკლაშვილი, ტექნოლოგიური ფაკულტეტის დეკანი გიზო ფარცხალაძე, პროფესორ-მასწავლებელები და სტუდენტები ესწრებოდნენ.

დემოკრატიული ჩართულობის ცენტრის კოორდინატორი თეონა დიასამიძე, ბათუმის მუნიციპალიტეტის საკრებულოს ფრაქცია „ქართული ოცნება-კონსერვატორების” თავმჯდომარე ნატალია ძიძიგური, ბათუმის მუნიციპალიტეტის საკრებულოს საფინანსო და ეკონომიკური განვითარების კომისიის თავმჯდომარე ზურაბ ნაკაიძე ბათუმის შოთა რუსთაველის უნივერსიტეტის სტუდენტებსა და პროფესორ-მასწავლებლებს შეხვდნენ. ღონისძიება მიზნად ისახავდა ბათუმში ინფრასტრუქტურული პროექტების განხორციელებისას საზოგადოებრივი უსაფრთხოების დაცვის საკითხებისა და ამ პროცესში მოქალაქეთა ჩართულობის მნიშვნელობის განხილვა.

ბათუმის შოთა რუსთაველის სახელმწიფო უნივერსიტეტის და გაეროს ქალთა ორგანიზაციის ორგანიზებით იდეათონი „ნუ შეავიწროებ პოტენციალს“ - როგორ შევქმნათ უსაფრთხო და დაცული სამუშაო გარემო - გაიმართა. იდეების კონკურსის მიზანია, ხელი შეუწყოს იმ გენდერული სტრატეგიების შემუშავებას, რომლებიც ხელს შეუწყობს აკადემიურ ორგანიზაციებსა და კერძო კომპანიებს, დანერგონ სექსუალური შევიწროებისგან თავისუფალი, უსაფრთხო სასწავლო და სამუშაო სივრცე ქალებისთვის. ბსუ-ს სტუდენტებისაგან დაკომპლექტებულმა იდეათონის ცხრა ჯგუფმა პროფესიონალი ინსტრუქტორისა და გენდერის ექსპერტის მეთვალყურეობით შეიმუშავეს ინოვაციური იდეები და სტრატეგიები, თუ როგორ შეიქმნას ქალებისთვის უსაფრთხო გარემო გენდერული თანასწორობის პრინციპებზე დაფუძნებით.

ვეტერანთა დღე ბათუმის შოთა რუსთაველის სახელმწიფო უნივერსიტეტში რამდენიმე ღონისძიებით აღინიშნა. რექტორმა მერაბ ხალვაშმა, სტუდენტებმა, პროფესორ-მასწავლებლებმა და საზოგადოების წარმომადგენლებმა გმირთა ხეივანში ეროვნული გმირის ჟიული შარტავას მემორიალი გვირგვინით შეამკეს. ბსუ-ს სტუდენტების მონაწილეობით გაიმართა ამირან მამალაძის ხსოვნისადმი მიძღვნილი ყოველწლიური ტურნირის ფინალური მატჩი ფეხბურთში, ასევე პირველობა ქუჩის კალათბურთსა და მაგიდის ჩოგბურთში. ფეხბურთის ტურნირში პირველობისათვის გუნდები: „ბსუ-ს ვირტუოზები“ და „1:0“ იბრძოდნენ. შეჯიბრის გარდამავალი თასი „ბსუ-ს ვირტუოზებს“ გადაეცა. ღონისძიების ფარგლებში კინოთეატრ აპოლოში შედგა ფილმის „შინდისის გმირების“ ჩვენება და დისკუსია სტუდენტებისა და ომის ვეტერანების მონაწილეობით.

განათლების პოლიტიკის, დაგეგმვისა და მართვის საერთაშორისო ინსტიტუტის პრეზიდენტმა თამარ სანიკიძემ პროექტის „ევროკავშირის პოლიტიკასა და პრაქტიკასთან ასოცირება: უწყვეტი განათლების პრინციპების დანერგვა მდგრადი განვითარებისათვის” პრეზენტაცია გამართა ბათუმის შოთა რუსთაველის სახელმწიფო უნივერსიტეტში. პროექტის თემას საქართველოს ევროკავშირთან ასოცირების ხელშეკრულების, მთელი სიცოცხლის მანძილზე სწავლის ხელშეწყობისათვის აღებული ვალდებულებები წარმოადგენს. პროექტის მიზანია საზოგადოებისა და სხვადასხვა სამიზნე ჯგუფის ცნობიერების ამაღლება ვალდებულების შესრულებით მიღებული სარგებლის შესახებ და მათი ჩართულობის ხელშეწყობა სახელმწიფოს მიერ ვალდებულებების შესრულების პროცესში.