ბათუმის შოთა რუსთაველის სახელმწიფო უნივერისტეტში ბსუ-ს მიზნობრივი სტუდენტური პროექტის ფარგლებში ფუკოს ქანქარა დამზადდა. პროექტის ავტორია ზუსტ მეცნიერებათა და განათლების ფაკულტეტის ფიზიკის სპეციალობის მესამე კურსის სტუდენტი ანა სურმანიძე, ხელმძღვანელები: პროფესორი ნუგზარ ღომიძე, ასოცირებული პროფესორები ლალი კალანდაძე და იზოლდა ჯაბნიძე. ბსუ პირველი უმაღლესი საგანმანათლებლო დაწესებულებაა საქართველოში, სადაც ფუკოს ქანქარა აიგო.
ბათუმის შოთა რუსთაველის სახელმწიფო უნივერსიტეტში „საპარტნიორო ფონდის“ წარმომადგენლები სტუდენტებს შეხვდნენ. სტუდენტებთან გამართულ შეხვედრაზე აჭარის ავტონომიური რესპუბლიკის მთავრობის თავმჯდომარემ თორნიკე რიჟვაძემ და ფონდის აღმასრულებელმა დირექტორმა დავით საგანელიძემ ინოვაციური ბიზნეს იდეების ხელშეწყობის მნიშვნელობაზე, ფონდის განხორციელებულ პროექტებზე ისაუბრეს და ამ მიმართულებით ახალგაზრდების ჩართულობაზე გაამახვილეს ყურადღება.
ბათუმის შოთა რუსთაველის სახელმწიფო უნივერსიტეტში მეოთხე საზაფხულო უნივერსიტეტი „საერთაშორისო უსაფრთხოება და ბირთვული გაუვრცელებლობა: ეროვნული და გლობალური გამოწვევები და შესაძლებლობები” გაიხსნა. საზაფხულო უნივერსიტეტი თავდაცვისა და უსაფრთხოების საკითხებში სამოქალაქო საბჭოს, შვედეთის რადიაციული უსაფრთხოების სააგენტოს პარტნიორობითა და ბათუმის შოთა რუსთაველის სახელმწიფო უნივერსიტეტის მხარდაჭერით ხორციელდება. ბათუმის საზაფხულო უნივერსიტეტი წარმოადგენს ინტენსიურ სამდღიან სასწავლო კურსს გლობალური უსაფრთხოების, საგარეო პოლიტიკის და ბირთვული გაუვრცელებლობის შესახებ, რომელსაც წარუძღვებიან საერთაშორისო და ქართველი ექსპერტები. საზაფხულო უნივერსიტეტი მიზნად ისახავს უნივერსიტეტების შესაბამისი ფაკულტეტების პროფესორებსა და ექსპერტებს შორის კომპეტენციის ამაღლებას საერთაშორისო და ბირთვული უსაფრთხოებისა და გაუვრცელებლობის საკითხში.
ბათუმის შოთა რუსთაველის სახელმწიფო უნივერსიტეტში პირველკურსელთა რეგისტრაცია დაიწყო. სტუდენტები რეგისტრაციის პარალელურად, საკონსულტაციო ცენტრში ეცნობიან დეტალურ ინფორმაციას უმაღლეს საგანმანათლებლო დაწესებულებაში მოქმედ სამართლებრივ რეგულაციებზე, სწავლის საფასურის გადახდის წესზე, საერთაშორისო ურთიერთობებზე, გაცვლით პროგრამებზე, სოციალურ პროექტებზე, სტიპენდიებზე, შემოქმედებით და სპორტულ წრეებზე. რეგისტრაცია გრძელდება 12 სექტემბრის ჩათვლით, 10:00-დან 17:00 საათამდე შემდეგ მისამართზე: ქ. ბათუმი, რუსთაველის ქ. №32, ბსუ-ს II კორპუსი, I სართული, ცენტრალური ფოიე, სტუდენტთა კარიერული განვითარების, კულტურისა და სპორტის დეპარტამენტი.
განათლების მიმართულების სტუდენტებისა და მასწავლებლობის სტატუსის მაძიებელი პირებისთვის ბათუმის შოთა რუსთაველის სახელმწიფო უნივერსიტეტში საზაფხულო სკოლა ტარდება თემაზე: „ფორმალური ლოგიკის კანონების გამოყენება სწავლა - სწავლების პროცესში“. საზაფხულო სკოლა მიზნად ისახავს ლოგიკის, როგორც თეორიული მეცნიერების საფუძველზე სწავლა-სწავლების ახალი მოდელის შემუშავებას, რომელიც მიმართული იქნება სწავლისა და სწავლების პროცესის გაუმჯობესებისა და მოსწავლეებში კრიტიკული აზროვნების განვითარებაზე.
