ახალი ამბები

სეზონური სკოლა „სოციალური მუშაობის კვლევის მეთოდები“ იმართება ბათუმის შოთა რუსთაველის სახელმწიფო უნივერსიტეტში. პროფესორ-მასწავლებლები, სტუდენტები და პრაქტიკოსი სოციალური მუშაკები ოთხი დღის განმავლობაში სოციალური მუშაობის თანამედროვე მეთოდებს გაეცნობიან. სეზონური სკოლის ფარგლებში განხილული იქნება ისეთი მნიშვნელოვანი თემები, როგორიცაა: სოციალური მუშაობა და კვლევა – რატომ ვსწავლობთ კვლევას სოციალურ მუშაობაში? მტკიცებულებაზე დაფუძნებული პრაქტიკის მნიშვნელობა სოციალურ მუშაობაში; სოციალური მუშაობის პროფესიული ღირებულებები და ეთიკური საკითხები კვლევაში, კვლევის თვისებრივი მეთოდების გამოყენება სოციალურ მუშაობაში; კვლევის რაოდენობრივი მეთოდების გამოყენება სოციალურ მუშაობაში; კვლევის შედეგების გავრცელება - პოლიტიკასა და პრაქტიკაზე ზემოქმედება და სხვა.

ბათუმის შოთა რუსთაველის სახელმწიფო უნივერსიტეტის, საქართველოს მათემატიკოსთა კავშირისა და საქართველოს უნივერსიტეტის ორგანიზებით ბსუ-ში საქართველოს მათემატიკოსთა კავშირის X საერთაშორისო კონფერენცია გაიხსნა. ხუთი დღის განმავლობაში 135 ქართველი და 45 უცხოელი მკვლევარი 17 ქვეყნიდან სამეცნიერო მოხსენებებს წარმოადგენს თანამედროვე მათემატიკის აქტუალურ საკითხებზე. კონფერენციის მიზანია, ბოლო ერთი წლის განმავლობაში წარმოებული კვლევის შედეგების გაანალიზება, თანამედროვე სამეცნიერო მიღწევების გაზიარება, სამეცნიერო კავშირების განმტკიცება, სამეცნიერო კვლევა-ძიებაში ახალგაზრდა მეცნიერთა ჩართულობის გაზრდა დამეცნიერებს შორის სამომავლო თანამშრომლობის ხელშეწყობა.

ბათუმის შოთა რუსთაველის სახელმწიფო უნივერსიტეტის მუსიკალური ბენდი საერთაშორისო არტ ფესტივალ-კონკურსის „ნესებრის თანავარსკვლავედი - 2019-ის“ გრან პრის მფლობელია. ფესტივალ-კონკურსი 20-25 აგვისტოს ბულგარეთში, ქალაქ ნესებირში გაიმართა და მასში ევროპის სხვადასხვა ქვეყნის შემოქმედებითი ჯგუფები მონაწილეობდა. ბათუმის შოთა რუსთაველის სახელმწიფო უნივერსიტეტის რექტორი მერაბ ხალვაში ბენდის წევრებთან ერთად მის ხელმძღვანელს კალისტრატე ცინცაძეს შეხვდა, ფესტივალში წარმატებულად მონაწილეობა მიულოცა და მადლობა გადაუხადა უნივერსიტეტისა და ქართული ხელოვნების პოპულარიზაციისათვის.

სტრატეგიული კომუნიკაციების სალექციო კურსის აქტუალურ საკითხებზე ბათუმის შოთა რუსთაველის სახელმწიფო უნივერსიტეტში ვორქშოფი გაიმართა. ბსუ-ს იურიდიული და სოციალურ მეცნიერებათა ფაკულტეტის პროფესორ-მასწავლებლებმა და საქართველოს სტრატეგიის და განვითარების ცენტრის (GCSD-ის) წარმომადგენლებმა სამუშაო შეხვედრაზე კურსის სტრუქტურა, ამოცანები, მიზნები, სახელმძღვანელო ლიტერატურა და სწავლების ინოვაციური მეთოდების დანერგვის შესაძლებლობები განიხილეს. ინოვაციური სასწავლო კურსი GCSD-ისა და ბათუმის შოთა რუსთაველის სახელმწიფო უნივერსიტეტის თანამშრომლობით და აშშ-ის საელჩოს ფინანსური მხარდაჭერით ინერგება. პროგრამის ფარგლებში ასევე დაგეგმილია სტუდენტებისთვის სტიპენდიების გაცემა და სამეცნიერო კონფერენციის ორგანიზება.

ბათუმის შოთა რუსთაველის სახელმწიფო უნივერსიტეტისა და სოციალური კვლევისა და ანალიზის ინსტიტუტის ორგანიზებით სეზონური სკოლა „სოციალური მუშაობის სერტიფიცირების პროგრამის მომზადება ბათუმის სახელმწიფო უნივერსიტეტში“ გაიხსნა. ბსუ-ს პროფესორ-მასწავლებლები და დასავლეთ საქართველოში მოქმედი სოციალური მუშაკები ხუთი დღის განმავლობაში სოციალური მუშაობის ისეთ აქტუალურ საკითხებს გაეცნობიან, როგორიცაა: სოციალური მუშაობის საფუძვლები, სოციალური ადვოკატირება, ადამიანის ქცევა სოციალურ გარემოში, სოციალურ კეთილდღეობის პოლიტიკა, სოციალური მუშაობის კვლევის მეთოდები. ქართველი და უცხოელი მომხსენებლები ლექციებს წაიკითხავენ ასევე თემებზე: სოციალური მუშაობა თემებთან და ორგანიზაციებთან, სოციალური მუშაობა და ოჯახში ძალადობა, სოციალური მუშაობა და ბავშვთა დაცვა, სოციალური მუშაობა და სისხლის სამართლის მართლმსაჯულება.