ახალი ამბები

საერთაშორისო სამეცნიერო-პრაქტიკული კონფერენცია „ეროვნული იდენტობის ფორმირების პრობლემები აღმოსავლეთ ევროპის და ცენტრალური აზიის ქვეყნებში“ გაიხსნა ბათუმის შოთა რუსთაველის სახელმწიფო უნივერსიტეტში. კონფერენციის მიზნად ისახავდა აღმოსავლეთ ევროპის და ცენტრალური აზიის ქვეყნებში ეროვნული აღმშენებლობის პროცესებში გამოვლენილი ნაციონალური (ეთნოკულტურული) და სამოქალაქო იდენტობის კონვერგეციის პროცესების წინააღმდეგობრიობისა და კონფლიქტოგენურობის გაანალიზებას. სესიაზე 30-მდე ქართველი, ყაზახი, მოლდაველი, პოლონელი, ესტონელი მკვლევარმა ბოლო პერიოდში წარმოებული კვლევის შედეგები წარმოადგინეს.

ბათუმის შოთა რუსთაველის სახელმწიფო უნივერსიტეტის რექტორმა მერაბ ხალვაშმა და ყაზახეთის განათლების და კულტურის სამინისტროს ფილოსოფიის, პოლიტოლოგიის და რელიგიათმცოდნეობის ინსტიტუტის დირექტორმა ახან ბიჟანოვამ თანამშრომლობის მემორანდუმს მოაწერეს ხელი. ხელშეკრულება ითვალისწინებს სასწავლო-საგანმანათლებლო და სამეცნიერო პროექტების განხორციელებას. მხარეთა შეთანხმებით, ჩატარდება ერთობლივი საერთაშორისო სამეცნიერო კონფერენციები, კონგრესები, საზაფხულო სკოლები, სემინარები და კულტურული ღონისძიებები.

წარმატებით დასრულდა ბათუმის შოთა რუსთაველის სახელმწიფო უნივერსიტეტის პროფესიული საგანმანათლებლო პროგრამების ავტორიზაციის პროცესი. საგანმანათლებლო დაწესებულებას პროფესიული საგანმანათლებლო პროგრამების განხორციელების უფლება 6 წლის ვადით მიენიჭა. ვულოცავთ სტუდენტებსა და პროფესორ-მასწავლებლებს ამ მნიშვნელოვან გამარჯვებას.

საქართველოს პარლამენტის თავმჯდომარის მოადგილე ილია ნაკაშიძე, ბათუმის შოთა რუსთაველის სახელმწიფო უნივერსიტეტის რექტორი მერაბ ხალვაში და აჭარის ა.რ. ჯანმრთელობისა და სოციალური დაცვის მინისტრი ზაალ მიქელაძე ოფიციალური ვიზიტით რიზეს გუბერნიაში იმყოფებოდნენ. დელეგაციის წევრები გაეცნენ რიზეს საუნივერსიტეტო კლინიკის მუშაობის სპეციფიკას, დაათვალიერეს სამედიცინო ფაკულტეტი, თურქეთში სიდიდით მეორე სიმულაციის სასწავლო ცენტრი და შეთანხმდნენ სამომავლო თანამშრომლობაზე. უნივერსიტეტში ვიზიტისას დელეგაციის წევრები ასევე ეწვივნენ ქართული ენისა და ლიტერატურის დეპარტამენტს, სადაც შეხვედრა გამართეს ქართული ენის მიმართულების სტუდენტებთან და პროფესორ-მასწავლებლებთან.

ბათუმის შოთა რუსთაველის სახელმწიფო უნივერსიტეტში ერაზმუს+-ის აკადემიური და ადმინისტრაციული პერსონალის გაცვლითი პროგრამების ფარგლებში „ბსუ-ს მესამე საერთაშორისო კვირეული“ გაიხსნა. ღონისძიების მიზანია უმაღლესი საგანმანათლებლო დაწესებულების ინტერნაციონალიზაციის ხელშეწყობა. ვროცლავის ფიზიკური აღზრდის საუნივერსიტეტო სკოლის, ალექსანდრა სტულგინსკის უნივერსიტეტის, კვიძინის უნივერსიტეტის, სილეზიის ტექნოლოგიური უნივერსიტეტისა და რენე1-ის უნივერსიტეტის პროფესორები ბსუ-ს სტუდენტებისათვის ლექციებს წაიკითხავენ. კვირეულის ფარგლებში უცხოეთის საგარეო ურთიერთობათა სამსახურების წარმომადგენლები ჩაატარებენ ტრენინგებს გაცვლითი პროგრამების ეფექტურად მართვის საკითხებზე. ღონისძიება უნივერსიტეტის რექტორის მოადგილემ თამარ სირაძემ გახსნა. საერთაშორისო კვირეული ბსუ-ს სტრატეგიული განვითარებისა და საგარეო ურთიერთობათა დეპარტამენტის ორგანიზებით იმართება.