ახალი ამბები

ბათუმის შოთა რუსთაველის სახელმწიფო უნივერსიტეტში საქართველოს დამოუკიდებლობის აღდგენის 100 წლის იუბილესადმი მიძღვნილი სტუდენტთა სამეცნიერო კონფერენცია გაიხსნა. ორი დღის განმავლობაში სხვადასხვა ფაკულტეტის 155 სტუდენტი სამეცნიერო მოხსენებებს თვრამეტი სექციის მიმართულებით წარმოადგენს. სტუდენტთა კარიერული განვითარების, კულტურისა და სპორტის დეპარტამენტის მიერ ორგანიზებული კონფერენციის მიზანია, ხელი შეუწყოს ახალგაზრდების სამეცნიერო საქმიანობაში ჩართვას, მეცნიერული უნარ-ჩვევების ჩამოყალიბებასა და განვითარებას.

აჭარის ა.რ. ტურიზმისა და კურორტების დეპარტამენტის თავმჯდომარე სულხან ღლონტი ბსუ-ს ტურიზმის ფაკულტეტის სტუდენტებს შეხვდა. სულხან ღლონტმა ახალგაზრდებს დეპარტამენტის საქმიანობა, განხორციელებული პროექტები და სამომავლო გეგმები გააცნო. დეტალური ინფორმაცია მიაწოდა რეგიონის ტურისტული მიმართულების ცნობადობის გაზრდის კუთხით, ადგილობრივ და საერთაშორისო ბაზარზე მიმდინარე სარეკლამო კამპანიებზე, სერვისების გაუმჯობესებასა და სასოფლო ტურიზმის განვითარების შესაძლებლობაზე. შეხვედრა კითხვა-პასუხის რეჟიმში გაგრძელდა და სულხან ღლონტმა სტუდენტების შეკითხვებს უპასუხა.

თურქეთის რესპუბლიკის გენერალური კონსული მაქბულე ქოჩაკი ბათუმის შოთა რუსთაველის სახელმწიფო უნივერსიტეტის რექტორს მერაბ ხალვაშს და ჰუმანიტარულ მეცნიერებათა ფაკულტეტის დეკანს მარინე გიორგაძეს შეხვდა. უნივერსიტეტისა და დიპლომატიური კორპუსის წარმომადგენლებმა ერთობლივ განხორციელებულ ღონისძიებებზე ისაუბრეს და სამომავლო თანამშრომლობის პერსპექტივები განიხილეს. ჰუმანიტარულ მეცნიერებათა, საბუნებისმეტყველო მეცნიერებათა და ჯანდაცვის ფაკულტეტებთან დაიგეგმა ერთობლივი ახალი პროექტების განხორციელება.

საქართველოს პარლამენტის ფრაქციის “ქართული ოცნება - სოციალ-დემოკრატების“ თავმჯდომარემ, თსუ-ს პროფესორმა გია ჟორჟოლიანმა ბათუმის შოთა რუსთაველის სახელმწიფო უნივერსიტეტის სტუდენტებისათვის საჯარო ლექცია წაიკითხა თემაზე: „თანამედროვე საქართველოს განვითარების პერსპექტივები“. პარლამენტარმა ახალგაზრდებს ქვეყნის ეკონომიკური განვითარების პერსპექტივები და მათი გამოყენების შესაძლებლობები გააცნო. პროფესორმა გია ჟორჟოლიანმა საუბრისას ყურადღება გაამახვილა ასევე დემოკრატიულ ღირებულებებსა და ადამიანის უფლებათა დაცვის საკითხებზე.

ბათუმის შოთა რუსთაველის სახელმწიფო უნივერსიტეტში, ტექნოლოგიური ფაკულტეტის ბაზაზე ინოვაციების ცენტრი გაიხსნა. ცენტრი Erasmus+“-ის საგრანტო პროექტის - „InnoCENS Project“ (Enhacing Innovation Competencesand Entrepreneurial Skillsin Engineering Education - ინოვაციური კომპეტენციებისა და სამეწარმეო უნარების ამაღლება საინჟინრო განათლებაში) ფარგლებში შეიქმნა და მიზნად ისახავს საინჟინრო სწავლებაში თანამედროვე სამეწარმეო მიდგომების დანერგვას, ინოვაციური კომპეტენციების განვითარებას, სტარტაპებისა და სპინოფების ჩამოყალიბებას. ინოვაციური ცენტრი პროფესორ-მასწავლებლებთან ერთად, გახსნა ვალენსიის პოლიტექნიკური უნივერსიტეტის პროფესორმა, ბიზნეს მენეჯერმა იზრაელ გრიოლ ბარესმა. ტრენერები ბსუ-დან ბოლო ერთი წლის განმავლობაში 7 სხვადასხვა ქვეყანაში გადიოდნენ სწავლების კურსს, რომლის მიხედვითაც ევროპულ გამოცდილებას მსმენელებს საგანმანათლებლო პროცესში გაუზიარებენ.