ახალი ამბები

სახალხო დღესასწაულის „ბათუმობის“ ფარგლებში ბათუმის შოთა რუსთაველის სახელმწიფო უნივერსიტეტში VIII საერთაშორისო სამეცნიერო კონფერენცია „ბათუმი - წარსული და თანამედროვეობა“ გაიხსნა. 60-მდე ქართველი და უცხოელი მკვლევარი სამეცნიერო მოხსენებებს წაიკითხავს ქალაქის წარსულსა და თანამედროვეობაზე, განიხილავენ ბათუმის განვითარების ტენდენციებსა და სხვა აქტუალურ საკითხებს. სამეცნიერო სესიაზე წარმოდგენილი იქნება ისეთი მნიშნელოვანი სტატიები, როგორიცაა: თანამედროვე ბათუმი: ინტერესთა კონფლიქტი და პერსპექტივა, ებრაელობა ბათუმის საქალაქო თვითმმართველობაში (1887-1917), ზნეობრივი ომი ხიმშიაშვილთა ოჯახის წინააღმდეგ, საქართველოს ევროპული რადიუსი და ბათუმის ურბანული პრიორიტეტები, ბრძოლები ბათუმის მიმართულებით 1877-1878 წლების რუსეთ-ოსმალეთის ომის პერიოდში, ტურიზმის განვითარების სტრატეგიული მიმართულებები ბათუმში.

დღეს, ბათუმს შოთა რუსთაველის სახელმწიფო უნივერსიტეტში პირველკურსელებისათვის საკონსულტაციო ცენტრი გაიხსნა. სტუდენტებს საშუალება აქვთ დეტალური ინფორმაცია მიიღონ აკადემიური და ფინანსური რეგისტრაციის ვადებსა და პირობებზე, სასწავლო პროცესზე, უნივერსიტეტში მოქმედ გაცვლით პროგრამებზე, სტიპენდიებზე, კულტურულ და სპორტულ აქტივობებზე.

შოთა რუსთაველის სამეცნიერო ფონდის საგრანტო პროექტის „ისტორიული ჭანეთის ცენტრალურ ნაწილში დაცული ქართული კულტურული მემკვიდრეობის ძეგლები (საფორტიფიკაციო ნაგებობები, ეკლესიები, საკომუნიკაციო და საყოფაცხოვრებო არქიტექტურის ნიმუშები)“ ფარგლებში, დასრულდა პირველი კომპლექსური სამეცნიერო ექსპედიცია ისტორიული ჭანეთის ტერიტორიაზე. ექსპედიცია მიზნად ისახავდა ტრაპიზონისა და მისი შემოგარენის კვლევას. ერთი კვირის განმავლობაში ექსპედიციის წევრებმა შეისწავლეს ზღვისპირა ზოლსა და დეღრიმენდერეს ხეობაში მდებარე საფორტფიკაციო ნაგებობები: ახჩა-კალე, იენესილ კალე, კალექოი, ტრაპიზონის ციხის რომაული ეპოქის გალავნის ნაშთები, იენიქოი და ხამსიქოის ციხეები, მაჩკას ეკლესია, თერაზილერისა და ჯოშანდერეს ქვის თაღოვანი ხიდები. მკვლევრებმა წარმოადგინეს საფორტფიკაციო ნაგებობების აღწერა-დახასიათება, გრაფიკული და ფოტოფიქსაცია. ექსპედიციის ფარგლებში, ასევე შეგროვდა ეთნოგრაფიული და ტოპონიმიკური მასალებიც.

დღეს, ბათუმის შოთა რუსთაველის სახელმწიფო უნივერსიტეტში, ფრანკფურტის იოჰან ვოლფგანგ გოეთეს უნივერსიტეტისა და ბსუ-ს ერთობლივი VI საზაფხულო სკოლა დიგიტალურ ჰუმანიტარიაში გაიხსნა. საერთაშორისო საზაფხულო სკოლა 2012 წლიდან ყოველწლიურად ტარდება და მისი მიზანია დიგიტალური ჰუმანიტარიის განვითარება საქართველოში, ენისა და კულტურის ელექტრონული დოკუმენტაციის ძირითადი პრინციპებისა და მეთოდების შესწავლა, აღნიშნული პროფილის ქართული და საერთაშორისო ელექტრონული რესურსების გაცნობა, საველე სამუშაოების ჩატარების უნარ-ჩვევების გამომუშავება.

ჟურნალისტიკის რესურსცენტრის (JRC) და ცესკოს სწავლების ცენტრის ერთობლივი პროექტის „გაიზიარე ქალთა მონაწილეობა არჩევნებში“ ფარგლებში ბათუმის შოთა რუსთაველის სახელმწიფო უნივერსიტეტში შეხვედრა გაიმართა. პროექტის ორგანიზატორები რეგიონული უნივერსიტეტების კოორდინატორებთან და სტუდენტებთან ერთად, ბსუ-ს რექტორს მერაბ ხალვაშს შეხვდნენ და სამომავლო თანამშრომლობის გეგმები გააცნეს. ჟურნალისტიკის რესურსცენტრი და ,ცესკოს სწავლების ცენტრი ბათუმის შოთა რუსთაველის სახელმწიფო უნივერსიტეტთან და სხვა რეგიონულ უნივერსიტეტებთან ერთად, მორიგ პროექტს „სტუდენტები არჩევნებისთვის“ იწყებს. პროექტის მიზანია ქალთა ჩართულობის ზრდა 2017 წლის თვითმმართველობის არჩევნების პროცესში, ახალგაზრდა ამომრჩევლის ინფორმირებულობის დონისა და სოციალური კამპანიის - „გაიზიარე ქალთა მონაწილეობა არჩევნებში” წარმოება.