ახალი ამბები

ბათუმის შოთა რუსთაველის სახელმწიფო უნივერსიტეტის რექტორის მოადგილემ სამეცნიერო დარგში, პროფესორმა ნათია წიკლაშვილმა და ჰუმანიტარულ მეცნიერებათა ფაკულტეტის ხარისხის უზრუნველყოფის სამსახურის უფროსმა, ასოცირებულმა პროფესორმა ქეთევან სვანიძემ მონაწილეობა მიიღეს საერთაშორისო გაცვლითი პროგრამის ERASMUS+-ის ფარგლებში ფრიდრიხ შილერის უნივერსიტეტში (იენა, გერმანია) გამართულ საერთაშორისო ერთკვირიან ტრენინგში. საქართველოსა და ევროპის 15-მდე უნივერსიტეტის წარმომადგენლები გაცვლითი პროგრამების ფარგლებში უნივერსიტეტის სტუდენტების, პროფესორ-მასწავლებლებისა და ადმინისტრაციული პერსონალის მობილობის პროცედურებს გაეცნენ. განიხილეს კანდიდატთა შერჩევის პროცედურის ხარისხის უზრუნველყოფა, კრედიტებისა და ქულების აღიარების პროცედურა და მობილობის ფინანსური მხარე.

სამეცნიერო კონფერენცია „გულ-სისხლძარღვთა დაავადებათა ტენდენციები საქართველოში (აჭარის რეგიონის 20-წლიანი კვლევის შედეგები)“ გაიმართა ბათუმის შოთა რუსთაველის სახელმწიფო უნივერსიტეტში. თსუ-სა და ბსუ-ს ერთობლივ სამეცნიერო სესიაზე მონაწილეებმა აჭარაში წარმოებული კვლევის შედეგები შეაჯამეს და ისეთი მნიშვნელოვანი მოხსენებები წარმოადგინეს გულ-სისხლძარღვთა დაავადებებზე, როგორიცაა: გულ-სისხლძარღვთა სისტემის დაავადებები აჭარის ავტონომიური რესპუბლიკის პოპულაციაში, რისკ-ფაქტორთა რეგიონული ტენდენციები, არაგადამდებ დაავადებებით ავადობა და სიკვდილიანობა აჭარის ავტონომიური რესპუბლიკის მოსახლეობაში, ცერებრო-ვასკულური პათოლოგიის კლინიკურ-ეპიდემიოლოგიური პროფილი აჭარის რეგიონში.

უმაღლესი საგანმანათლებლო დაწესებულებების ავტორიზაციის განახლებული სტანდარტებით პილოტირების პროცესში ბათუმის შოთა რუსთაველის სახელმწიფო უნივერსიტეტი ჩაერთო. ბსუ 7-9 ნოემბერს საერთშორისო ექსპერტთა ჯგუფმა ახალი, ევროპულ სტანდარტებთან თავსებადი ავტორიზაციის სტანდარტებისა და პროცედურების მიხედვით შეაფასა. ავტორიზაციის პროცესში საერთაშორისო ექსპერტებთან ერთად, ქართველი ექსპერტები, სტუდენტები და დამსაქმებლები მონაწილეობდნენ. ექსპერტთა ჯგუფს EUA-ს ექსპერტი, პრომორსკის უნივერსიტეტის პროფესორი ლუსია ჩოკი (სლოვენია) ხელმძღვანელობდა. პილოტირება პროექტ STUDY IN GEORGIA-ს ფინანსური მხარდაჭერით ხორციელდება.

ბათუმის შოთა რუსთველის სახელმწიფო უნივერსიტეტში საზეიმოდ გაიხსნა სტუდენტური თეატრების საერთაშორისო ფესტივალი „დებიუტი“. ხუთი დღის განმავლობაში საუნივერსიტეტო სცენა დაეთმობა ბათუმის შოთა რუსთაველის სახელმწიფო უნივერსიტეტის, ივანე ჯავახიშვილის სახელობის თბილისის სახელმწიფო უნივერსიტეტის, ლატვიის ქალაქ ელგავას აგრარული უნივერსიტეტის, ლიტვის ქალაქ ვილნიუსის სახელმწიფო უნივერსიტეტისა და ქუთაისის აკაკი წერეთლის სახელმწიფო უნივერსიტეტის სტუდენტურ თეატრებს. სტუდენტური თეატრების საერთაშორისო ფესტივალის მიზანია ხელი შეუწყოს თეატრალური ღირებულებების დამკვიდრებას, კულტურულ-შემეცნებითი პროექტების განხორციელებასა და სტუდენტთა შორის ურთიერთობების გაღრმავებას.

მწერლისა და საზოგადო მოღვაწის, ეროვნულ-განმათავისუფლებელი მოძრაობის ლიდერის ილია ჭავჭავაძის 180 წლის იუბილე ბათუმის შოთა რუსთველის სახელმწიფო უნივერსიტეტში რამდენიმე ღონისძიებით აღინიშნა. ჰუმანიტარულ მეცნიერებათა ფაკულტეტის სტუდენტებმა და პროფესორ-მასწავლებლებმა მსვლელობა მოაწყვეს და ეროვნული გმირის ძეგლი გვირგვინით შეამკეს. ღონისძიების ფარგლებში უმაღლეს საგანმანათლებლო დაწესებულებაში ილიას ხსოვნისადმი მიძღვნილი ლიტერატურული საღამო გაიმართა. ქართული ფილოლოგიის სპეციალობის სტუდენტებმა კიდევ ერთხელ შეაფასეს ილია ჭავჭავაძის ღვაწლი, მოხსენებები წაიკითხეს მის ფენომენსა და ლიტერატურულ მემკვიდრეობაზე. ახალგაზრდებმა ღონისძიებაზე ასევე წარმოადგინეს მწერლის მოღვაწეობის ამსახველი ფოტოკოლაჟი.