ახალი ამბები

მეცნიერებისა და ინოვაციების საერთაშორისო კვირეულის ეგიდით, ბათუმის შოთა რუსთაველის სახელმწიფო უნივერსიტეტში საჯარო ლექციები ტარდება. სტუდენტებისა და პროფესორ-მასწავლებლებისათვის ფიტოპათოლოგიისა და ბიომრავალფეროვნების ინსტიტუტის გამძლეობის გენეტიკის განყოფილების უფროსმა ზოია სიხარულიძემ ლექცია წაიკითხა თემაზე: „ფიტოპათოლოგიური კვლევები - გუშინ, დღეს, ხვალ“, აგრარული და მემბრანული ტექნოლოგიების ინსტიტუტის დირექტორმა რაულ გოცირიძემ - „ფიტოპათოლოგიური კვლევები - გუშინ, დღეს, ხვალ“, ხოლო ნიკო ბერძენიშვილის ინსტიტუტის დირექტორმა როინ მალაყმაძემ და ინსიტუტის ფოლკლორისა და დიალექტოლოგიის განყოფილების უფროსმა შუშანა ფუტკარაძემ - „სტამბოლის ქართული კულტურის სავანე“. საჯარო ლექციები პროფესორ ალეკო კალანდიას მოხსენებით „საკვები-სარგებელი და საფრთხე“ დასრულდება.

ბათუმის შოთა რუსთაველის სახელმწიფო უნივერსიტეტი „სტუდენტ–ახალგაზრდული დღეების“ გამარჯვებულია. ახალგაზრდებმა საკუთარი შესაძლებლობები შემოქმედებით, კულტურულ და სპორტულ შეჯიბრებებში წარმოაჩინეს. უმაღლესი საგანმანათლებლო დაწესებულების გუნდებმა პირველი ადგილი დაიკავეს მხიარულ სტარტებსა და მინიფეხბურთში. კომპეტენტურმა ჟიურიმ ბათუმის საზაფხულო თეატრში გამართულ დასკვნით კონცერტზე გრან-პრის მფლობელად ბსუ დაასახელა. ახალგაზრდული ფესტივალი ბათუმის მერიის სპორტისა და ახალგაზრდობის განყოფილების ორგანიზებით ჩატარდა და მასში ქვეყნის ათი უნივერსიტეტის სტუდენტები მონაწილეობდნენ. გამარჯვებული გუნდის წევრები შემოქმედებითი ტურით ტაო-კლარჯეთში გაემგზავრებიან. დასკვნითი ღინისძიება ჯგუფ „ფრანის“ კონცერტით დასრულდა.

ადამიანის უფლებათა ევროპული სასამართლოს მოსამართლემ (1999-2009), ვენეციის კომისიის წევრმა, პროფესორმა მინდია უგრეხელიძემ ბათუმის შოთა რუსთაველის სახელმწიფო უნივერსიტეტში საჯარო ლექციები წაიკითხა სამართლის ფილოსოფიის, ევროპული სასამართლოების და საერთაშორისო სისხლის სამართალის თემებზე. ორი დღის განმავლობაში მომხსენებელმა უმაღლესი საგანმანათლებლო დაწესებულების სტუდენტებსა და პროფესორ-მასწავლებლებს სამართლის, როგორც განზომილებათა სისტემის (ლეგიმეტრიის), ადამიანის უფლებათა ევროპულ სასამართლოში პრეცედენტული სამართლისა და სისხლის სამართლის საერთაშორისო მართლმსაჯულების აქტუალური საკითხები გააცნო. საჯარო ლექციები აჭარის ა.რ. განათლების, კულტურისა და სპორტის სამინისტროს უმაღლესი განათლების ხელშეწყობის პროგრამის „საჯარო ლექციების“ ფარგლებში ჩატარდა.

ქირურგთა სამეცნიერო კონფერენცია გაიმართა შოთა რუსთველის დარბაზში. ერთდღიან სამეცნიერო სესიაზე ქირურგებმა დარგის აქტუალურ საკითხებზე იმსჯელეს და ბოლო პერიოდში წარმოებული კვლევა-ძიების შედეგები შეაჯამეს. სხვადასხვა წამყვანი კლინიკებისა და საავადმყოფოების ექიმებმა მოხსენებები წარმოადგინეს ისეთ მნიშვნელოვან თემებზე, როგორიცაა: „საქართველოში ღვიძლის პირველი ტრანსპლანტაციის გამოცდილება“, „ღვიძლის ჰემაგიომების ქირურგიული მკურნალობის გამოცდილება“, „პანკრეატო - დუედონალური რეზექციები და მისი ვარიანტები“ და „ღვიძლის ქირურგიული ანატომია“. სამეცნიერო კონფერენცია ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტისა და საქართველოს აკადემიკოს გრიგოლ მუხაძის სახელობის ქირურგთა სამეცნიერო საზოგადოების ორგანიზებით ჩატარდა.

„Erasmus+“-ის ეროვნული სააგენტოს საქართველოს ოფისის ხელმძღვანელმა ლიკა ღლონტმა ბათუმის შოთა რუსთაველის სახელმწიფო უნივერსიტეტში საინფორმაციო შეხვედრა გამართა და ახალი საკონკურსო პროგრამები წარმოადგინა. ტემპუსის, ერაზმუს მუნდუსისა და ჟან მონეს პროგრამები 2015 წლიდან ახლად შექმნილი გაერთიანებული პროგრამის Erasmus+ის ეგიდით ხორციელდება. ბსუ-ს სხვადასხვა საფეხურის სტუდენტებსა და პროფესორ-მასწავლებლებს შეუძლიათ მონაწილეობა მიიღონ Degree Mobility-ს,Credit Mobility-სა და Capacity Building for Higher Education-ის გაცვლით პროგრამებში.