ახალი ამბები

სამხრეთ საქართველოდან თურქეთის შიდა პროვინციაში გადასახლებული ქართველების (მუჰაჯირებს) ისტორიას, მათ შთამომავალთა თანამედროვე ყოფას, კულტურასა და სხვა აქტუალურ საკითხებს მიეძღვნა ქართველოლოგიის ცენტრის სამეცნიერო კონფერენცია „მუჰაჯირები“. სამეცნიერო სესია ბათუმის შოთა რუსთაველის სახელმწიფო უნივერსიტეტში ჩატარდა და მის მუშაობაში საქართველოს სხვადასხვა უმაღლესი საგანმანათლებლო დაწესებულებისა და კვლევითი ცენტრის წარმომადგენლებთან ერთად, უცხოელი მკვლევრებიც მონაწილეობდნენ. „საზღვარგარეთ მცხოვრებ ქართველთა დასახლებებისა და ყოფის კვლევის“ პროგრამის ფარგლებში გამართულ კონფერენციაზე მონაწილეებმა ქართველოლოგიის ცენტრის მიერ ერთი წლის განმავლობაში წარმოებული კვლევა-ძიების შედეგები შეაჯამეს.

ტემპუსის საგრანტო პროექტის „530311-TEMPUS-1-2012-1-AM-TEMPUS-JPCR: MASTER IN HIGHER EDUCATION MANAGEMENT: DEVELOPING LEADERS FOR MANAGING EDUCATIONAL TRANSFORMATION“ ეგიდით ბათუმის შოთა რუსთაველის სახელმწიფო უნივერსიტეტში სამდღიანი ტრენინგი გაიმართა თემაზე: „ორგანიზაციული მენეჯმენტი“. ეკონომიკის დოქტორმა კონსტანტინე მეგრელიშვილმა აჭარის უმაღლესი საგანმანათლებლო დაწესებულებების წარმომადგენლებს უმაღლესი განათლების მენეჯმენტი გააცნო. ასევე ისაუბრა მენეჯმენტის საერთაშორისო გამოცდილებასა და თანამედროვე მიღწევებზე. ტემპუსის პროექტის ფარგლებში, ევროპელი პარტნიორების კონსულტაციების საფუძველზე მომზადდა სამაგისტრო პროგრამა „უმაღლესი განათლების მენეჯმენტი“. საგანმანათლებლო პროგრამის მიზანია თანამედროვე მოთხოვნების შესატყვისი კომპეტენციის მქონე მაღალკვალიფიციური და კონკურენტუნარიანი მენეჯერების მომზადება.სწავლების დასასრულს ექსპერტმა ეკონომიკის დარგში მარკ როდესმა ტრენინგის მონაწილეებს გამოცდილება გაუზიარა და სერტიფიკატები გადასცა.

სოციალურ მეცნიერებათა, ბიზნესისა და სამართალმცოდნეობის ფაკულტეტის ასისტენტ პროფესორებმა ნოდარ ფუტკარაძემ და ლილით მელოიანი-ფუტკარაძემ ტემპუსის პროექტის „აღმოსავლეთ სამეზობლო ქვეყნების უმაღლესი საგანმანათლებლო დაწესებულებების ინტერნაციონალიზაციის ხელშეწყობა კულტურული და სტრუქტურული ადაპტაციის მეშვეობით“ ფარგლებში გამართულ შეხვედრაში მიიღეს მონაწილეობა. ერევნის სახელმწიფო უნივერსიტეტში შეხვედრის მონაწილეები ორი დღის განმავლობაში პარტნიორ უნივერსიტეტების საგანმანათლებლო პროგრამებს გაეცნენ, ერთმანეთს გამოცდილება გაუზიარეს ინტერნაციონალიზაციის სფეროში და „Promoting Internationalization of HEIs in Eastern Neighbourhood Countries through Cultural and Structural Adaptations (PICASA)“ პროექტის სამომავლო გეგმები განიხილეს.

სოციალურ მეცნიერებათა, ბიზნესისა და სამართალმცოდნეობის ფაკულტეტის „დემოკრატია და მოქალაქეობის“ სასწავლო კურსის სტუდენტებმა საარჩევნო სისტემების საერთაშორისო ფონდის (IFES) მიერ ორგანიზებულ აკადემიური ნაშრომების კონკურსში მიიღეს მონაწილეობა. ქვეყნის 22 უმაღლესი საგანმანათლებლო დაწესებულების მონაწილეებს შორის ბათუმის შოთა რუსთაველის სახელმწიფო უნივერსიტეტის სტუდენტები: ელზა ბარამიძე, რამინ მაჭარაშვილი, ნიკა მჟავანაძე, მირიან თაფლაძე, მარიამ ზოიძე, სოფიო კეკელიძე, ანა მიქაბაძე და მეგი ბარამიძე წარმატებული ნაშრომებისა და პრეზენტაციისთვის სიგელებით დაჯილდოვდნენ. ბათუმის გუნდის წევრები თეორიული ცოდნის გასაღრმავებლად ბაკურიანის ზამთრის სკოლაში არიან მიწვეული.

დამდეგი შობა-ახალი წელი ბათუმის შოთა რუსთაველის სახელმწიფო უნივერსიტეტში ტრადიციული ღონისძიებით აღინიშნა. სტუდენტებსა და პროფესორ-მასწავლებლებს დღესასწაული უმაღლესი საგანმანათლებლო დაწესებულების რექტორის მოადგილემ ნათია წიკლაშვილმა მიულოცა, წარმატებები უსურვა და განვლილი წელი შეაჯამა. სტუდენტებისა და აკადემიური პერსონალის ერთობლივ საახალწლო კონცერტზე უნივერსიტეტის ანსამბლმა „ტბეთმა“ ქორეოგრაფ ზურაბ სვანაძის მიერ დადგმული ფოლკლორული ცეკვები: „აჭარული“, „აფხაზური“ და „მთიულური“ შეასრულა. ღონისძიებაში მონაწილეობა მიიღეს ასევე გოგონათა და ვაჟთა ვოკალურმა ანსამბლებმა და სხვასხვა შემოქმედებითმა ჯგუფმა. კონცერტის ფარგლებში შეზღუდული შესაძლებლობების მქონე ახალგაზრდების დასახმარებლად საქველმოქმედო გამოფენა გაიმართა.