ახალი ამბები

უმაღლესი განათლებისა და მეცნიერების სტრატეგიულ განვითარებაზე საჯარო დისკუსია გაიმართა ბათუმის შოთა რუსთაველის სახელმწიფო უნივერსიტეტში. დისკუსიის მონაწილეებს აჭარის განათლების, კულტურის სპორტის მინისტრი გიორგი თავამაიშვილი და ფონდ „ღია საზოგადოება-საქართველოს“ პროგრამის მენეჯერი ხათუნა იოსელიანი მიესალმნენ. შეხვედრაზე ექსპერტებმა: ლელა ჩახაიამ, ლალი ბაქრაძემ, ირინე დარჩიამ და ლიკა ღლონტმა განათლების პოლიტიკის დაგეგმვისა და მართვის საერთაშორისო ინსტიტუტის (EPPM) მიერ ჩატარებული კვლევების შედეგები წარმოადგინეს. საერთაშორისო ორგანიზაციამ პროექტი „უმაღლესი განათლებისა და მეცნიერების სტრატეგიული განვითარება საქართველოში - რეფორმის განხორციელების მხარდამჭერი პლატფორმის ჩამოყალიბება“ განახორციელა. კვლევა ითვალისწინებდა უმაღლესი განათლებისა და მეცნიერების განვითარების სტრატეგიული მიმართულებების იდენტიფიცირებასა და სექტორის გარდაქმნის სტრატეგიული გეგმის შემუშავებას

,,HILTON ბათუმის“ გენერალური მენეჯერი სტუარტ ნელსონი და HILTON-ის სათაო ოფისის წარმომადგენლები ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტის სტუდენტებს შეხვდნენ. კოპანიის გენერალურმა მენეჯერმა სტუდენტებს ,,HILTON ბათუმი“ და საერთაშორისო ბრენდის სტანდარტები წარუდგინა. სტუარტ ნელსონმა შეხვედრაზე ასევე ისაუბრა ტურიზმის ფაკულტეტთან პარტნიორობის სტრატეგიაზე და სტუდენტებს დასაქმება შესთავაზა. „HILTON ბათუმი“ მესამე საერთაშორისო ბრენდია, რომელთანაც ტურიზმის ფაკულტეტი აქტიურ თანამშრომლობას იწყებს. საერთაშორისო ბრენდის სხვადასხვა კომპანიაში დღემდე ტურიზმის ფაკულტეტის 150-მდე სტუდენტია დასაქმებული. შეხვედრის დასასრულს ,,HILTON ბათუმის“ წარმომადგენლებმა 10 იღბლიან სტუდენტს საჩუქრად სასტუმროს მომსახურების პაკეტი გადასცეს.

შოთა რუსთაველის დარბაზში „Carnegie Research Fellowship Program“-ის ფარგლებში, საერთაშორისო განათლების ამერიკული საბჭოების საქართველოს ოფისის - დასავლეთ NIS-ის და სამხრეთ კავკასიის პროგრამების მენეჯერმა ალექსეი ხარლამოვმა საინფორმაციო შეხვედრა გამართა. პროექტის წარმომადგენელმა ბათუმის შოთა რუსთაველის სახელმწიფო უნივერსიტეტის სტუდენტებსა და პროფესორ-მასწავლებლებს კარნეგის გაცვლით პროგრამაში მონაწილეობა შესთავაზა. პროგრამა ითვალისწინებს 4-თვიანი კვლევითი პროექტების დაფინანსებას სოციალურ და ჰუმანიტარულ მეცნიერებათა მიმართულებით. წარმატებული აპლიკანტები სტიპენდიას 2014-2015 სასწავლო წლისთვის მიიღებენ და კვლევებს აშშ-ს პრესტიჟულ სასწავლებლებში აწარმოებენ

ევროპის იურისტ სტუდენტთა ასოციაცია ბათუმში - "ELSA ბათუმის" წარდგინება გაიმართა ბათუმის შოთა რუსთაველის სახელმწიფო უნივერსიტეტში. "ELSA ბათუმის" ხელმძღვანელმა, ბსუ-ს სტუდენტმა ლევან კუტუბიძემ სოციალურ მეცნიერებათა, ბიზნესისა და სამართალმცოდნეობის ფაკულტეტის სტუდენტებს საერთაშორისო სტუდენტური ორგანიზაციის საქმიანობა, სტუდენტთა გაცვლითი პროგრამები, სხვადასხვა სახის პროექტები, პრიორიტეტები და პერსპექტივები გააცნო. ევროპის იურისტ სტუდენტთა ასოციაცია 42 სახელმწიფოს 300-მდე უნივერსიტეტშია წარმოდგენილი და 32 ათას სტუდენტს აერთიანებს. ამ ეტაპზე საერთაშორისო ორგანიზაციაში ბსუ-ს 40 სტუდენტია გაწევრიანებული.

საქართველოს საბჭოთა ოკუპაციის დღისადმი მიძღვნილი ღონისძიებები ბათუმის შოთა რუსთაველის სახელწმიფო უნივერსიტეტში სახელმწიფო დროშის დაშვებით დაიწყო. უმაღლესი საგანმანათლებლო დაწესებულების რექტორის მოადგილემ, ასოცირებულმა პროფესორმა ირაკლი ბარამიძემ, პროფესორ-მასწავლებლებმა და სტუდენტებმა კიდევ ერთხელ გაიხსენეს საქართველოს დამოუკიდებლობისათვის დაღუპული გმირები და წუთიერი დუმილით პატივი მიაგეს მათ ხსოვნას. სტუდენტთა სამეცნიერო ცენტრის ორგანიზებით პროფესორმა ოთარ გოგოლიშვილმა ღია ლექცია ჩაატარა თემაზე: „25 თებერვალი - საბჭოთა ოკუპაციის დღე“.