ახალი ამბები

ბათუმის შოთა რუსთაველის სახელმწიფო უნივერსიტეტმა პროფესიული სასწავლებლების სტუდენტურ ფესტივალში მიიღო მონაწილეობა. ბსუ-ს პროფესიული პროგრამების მართვის და უწყვეტი განათლების ცენტრის წარმომადგენლებმა ფესტივალის საგამოფენო სივრცეში დამთვალიერებლებს უნივერსიტეტის პროფესიული საგანმანათლებლო პროგრამები წარუდგინეს. მსურველებს შესაძლებლობა ჰქონდათ, ადგილზევე გაცნობოდნენ პროფესიული პროგრამების სწავლების პრაქტიკულ მხარეს. ღონისძიება მიზნად ისახავდა ახალგაზრდებში პროფესიული საგანმანათლებლო პროგრამების პოპულარიზაციასა და გამოცდილების გაზიარებას. ფესტივალი ბათუმის სახელმწიფო საზღვაო აკადემიის პროფესიული მომზადების ცენტრმა ევროკავშირის მხარდაჭერით ჩაატარა.

ბსუ-ს სტუდენტთა კარიერული განვითარების, კულტურისა და სპორტის დეპარტამენტის ორგანიზებით, სტუდენტთა და კურსდამთავრებულთა დასაქმების მასშტაბური ფორუმი გაიმართა. ფორუმი გახსნეს და სტუდენტთა დასაქმების ხელშეწყობის მნიშვნელობაზე ისაუბრეს ბსუ-ს რექტორმა მერაბ ხალვაშმა და სტუდენტთა კარიერული განვითარების, კულტურისა და სპორტის დეპარტამენტის უფროსმა ლევან ტარიელაძემ.

ბათუმის შოთა რუსთაველის სახელმწიფო უნივერსიტეტს ქობულეთის მუნიციპალიტეტის დაგვის საჯარო სკოლის IX-X კლასის მოსწავლეები ეწვივნენ. ბსუ-ს რექტორმა მერაბ ხალვაშმა და რექტორის მოადგილემ თამარ სირაძემ ახალგაზრდებს საუნივერსიტეტო ცხოვრება გააცნეს. მოსწავლეებმა დაათვალიერეს უნივერსიტეტის მატერიალურ-ტექნიკური ბაზა, საბუნებისმეტყველო მეცნიერებათა შემსწავლელი ლაბორატორიები, სასამართლო საიმიტაციო დარბაზი, კრიმინალისტიკის ლაბორატორია და ბიბლიოთეკა. ღონისძიების ფარგლებში, რექტორის მოადგილემ თამარ სირაძემ მოსწავლეებთან ერთად ლიტერატურული დისკუსია გამართა მწერალ ჯემალ ქარჩხაძის მოთხრობებზე: „ანტონიო და დავითი“ და „ოპერაცია დეიდა ტასო“.

ბსუ-ში კანის კიბოს შესახებ ცნობიერების ამაღლების კამპანიის „ევრომელანომა“ ფარგლებში, პეტრე შოთაძის სახელობის თბილისის სამედიცინო აკადემიისა და საქართველოს ფოტოდერმატოლოგიისა და კანის კიბოს ასოციაციის ორგანიზებით მოსახლეობის კანის უფასო სკრინინგი ჩატარდა. ღონისძიება გახსნეს, მონაწილეებს მიესალმნენ და სკრინიგის მნიშვნელობაზე ისაუბრეს აჭარის ჯანმრთელობისა და სოციალური დაცვის მინისტრმა ნინო ნიჟარაძემ, ბსუ-ს საბუნებისმეტყველო მეცნიერებათა და ჯანდაცვის ფაკულტეტის დეკანმა რუსუდან ხუხუნაიშვილმა, აჭარის საზოგადოებრივი ჯანდაცვის ცენტრის დირექტორმა რუსუდან შავიშვილმა და პეტრე შოთაძის სახელობის თბილისის სამედიცინო აკადემიის კულტურის განვითარების დეპარტამენტის ხელმძღვანელმა მაკა მაღლაკელიძემ.

ბათუმის შოთა რუსთველის სახელმწიფო უნივერსიტეტში „ბსუ-ს სტუდენტური დღეები - 2023’’ ტარდება. პროექტის მიზანია სტუდენტებში ჯანსაღი ცხოვრების წესის დამკვიდრება, სპორტის, კულტურის პოპულარიზაცია და სტუდენტური ნაკრებებისთვის კანდიდატების შერჩევა. სტუდენტური დღეების ფარგლებში ბსუ-ს სტუდენტები ერთმანეთს ფაკულტეტების მიხედვით ეჯიბრებიან სპორტული, კულტურული და ინტელექტუალური აქტივობების სხვადასხვა სახეობაში. პირველობა უკვე დასრულდა ჭადრაკში, დარტსში, მაგიდის ჩოგბურთში, FIFA-2023-ში, მკლავჭიდში, შაშსა და ბილიარდში. სტუდენტური დღეების დასრულების შემდეგ, გამარჯვებული სტუდენტები დაჯილდოვდებიან თასებით, ფასიანი პრიზებით და შემეცნებითი საექსკურსიო ტურებით, ყველაზე მეტ სახეობაში გამარჯვებულ ფაკულტეტს გადაეცემა „ბსუ-ს სტუდენტური დღეები 2023’’-ის გრან-პრი.