ახალი ამბები

უნივერსიტეტის ილია ჭავჭავაძის ბიბლიოთეკაში ამერიკის შეერთებულ შტატებში განხორციელებული გაცვლითი პროგრამების წარდგინება გაიმართა. პროექტების მონაწილეებმა პროფესორ-მასწავლებლებს მიღებული გამოცდილება და მათი შემდგომი გამოყენების პერსპექტივები გააცნეს. ამერიკის სახელმწიფო დეპარტამენტის საგანმანათლებლო და კულტურული საკითხების ბიუროს საერთაშორისო ვიზიტორთა პროექტის „ლიდერთა ვიზიტორობის საერთაშორისო პროგრამის“ ფარგლებში ბსუ-ს ბიბლიოთეკის დირექტორი ლელა თურმანიძე აშშ საუნივერსიტეტო ბიბლიოთეკებს ეწვია. განათლებისა და მეცნიერებათა ფაკულტეტის დეკანის მოადგილე ინგა შამილიშვილი აშშ განათლების სახელმწიფო დეპარტამენტის, საერთაშორისო განათლების ინსტიტუტისა და საქართველოში ამერიკის შეერთებული შტატების საელჩოს პროგრამის ,,international visitor leadership programm”-ის ეგიდით გაეცნო ინდაუმენტის სისტემას აშშ-ს უნივერსიტეტებში, ხოლო ბსუ-ს შეფასებისა და გამოცდების ცენტრის ხელმძღვანელმა ივდით დიასამიძემ აშშ კონგრესის ბიბლიოთეკის პროფესიული განვითარების პროგრამის „ღია სამყაროს“ ხელშეწყობით ამერიკის უმაღლეს სასწავლებელთა მენეჯმენტის მოდელი შეისწავლა

სტუდენტური დღეები "აჭარა 2013" სპორტული ღონისძიებებით დაიწყო. ბათუმის შოთა რუსთაველის სახელმწიფო უნივერსიტეტის, ხელოვნების სასწავლო უნივერსიტეტის, ბათუმის სახელმწიფო საზღვაო აკადემიისა და ნავიგაციის სასწავლო უნივერსიტეტის 150-მდე სტუდენტი შესაძლებლობებს წარმოაჩენს ფრენბურთში, ქუჩის კალათბურთში, ბილიარდსა და ინტელექტუალურ თამაშებში. სტუდენტური დღეების ეგიდით გამოვლინდება ასევე „მის-სტუდენტი 2013“. პირველობა უკვე გაიმართა და მინი ფეხბურთში. ფინალურ შეხვედრაში ერთმანეთს ბათუმის შოთა რუსთაველის სახელმწიფო უნივერსიტეტი და ნავიგაციის სასწავლო უნივერსიტეტი დაუპირისპირდნენ. შეჯიბრი ანგარიშით 3:2, ბსუ-ს გამარჯვებით დასრულდა.

ბათუმის შოთა რუსთაველის სახელმწიფო უნივერსიტეტში სტუდენტური თვითმმართველობის არჩევნები ჩატარდა. კენჭისყრაში 93 სტუდენტი და სამი საინიციატივო ჯგუფი: „ალტერნატიული ინიციატივა“, „გულო თურმანიძის საინიციატივო ჯგუფი“ და „აპოლიტიკა“ მონაწილეობდა. უმაღლესი საგანმანათლებლო დაწესებულების 6 საარჩევნო უბანზე 4 250-მდე სტუდენტს შეეძლო საკუთარი პოზიციის დაფიქსირება. ხმის მიცემის პროცედურას საარჩევნო სუბიექტებისა და არასამთავრობო ორგანიზაციების: „ახალგაზრდა იურისტთა ასოციაციისა“ და „საერთაშორისო გამჭვირვალობა - საქართველოს“ წარმომადგენლები აკვირდებოდნენ. სტუდენტური თვითმმართველობის არჩევნების შედეგებს ცენტრალური საარჩევნო კომისია უახლოეს მომავალში გამოაქვეყნებს.

ქართული ენის დღისადმი მიძღვნილი სამეცნიერო კონფერენცია გაიმართა ბათუმის შოთა რუსთაველის სახელმწიფო უნივერსიტეტში. პროფესორ-მასწავლებლებმა მოხსენებები წარმოადგინეს ქართული ენის სიწმინდეზე, მშობლიური ენის სწავლებისა და უფლებების დაცვის პრობლემეტიკაზე. ენათმეცნიერებმა ტრადიციულ სესიაზე ბოლო ერთი წლის განმავლობაში წარმოებული კვლევა-ძიების შედეგებთან ერთად ქართული ფილოლოგიის დეპარტამენტის პროფესორების ახალი წიგნები შეაფასეს და 1978 წლის 14 აპრილს განვითარებულ მოვლენებზე ისაუბრეს. 14 აპრილს დედაენის დღის აღსანიშნავად მსვლელობა უნივერსიტეტიდან დაიწყება და ილია ჭავჭავაძის ძეგლთან დასრულდება. სტუდენტები და პროფესორ-მასწავლებლები ძეგლს ყვავილებით შეამკობენ.

შოთა რუსთაველის დარბაზში ამერიკის შეერთებული შტატების ეროვნული გეოგრაფიული საზოგადოების (National Geographic Society) 125 წლის იუბილეს მიეძღვნა ჟურნალ „National Geographic“-ის პრეზენტაცია. ჟურნალის რედაქტორმა ლევან ბუთხუზმა სტუდენტებსა და პროფესორ-მასწავლებლებს მსოფლიოს ერთ-ერთი ყველაზე დიდი სამეცნიერო და საგანმანათლებლო ორგანიზაციის ოფიციალური გამოცემა წარუდგინა. „National Geographic“-ი 1888 წელს დაარსდა, ხოლო ქართულენოვანი ჟურნალის პირველი ნომერი მკითხველმა 2012 წლის ოქტომბერში მიიღო. პერიოდული გამოცემა 37 ენაზე იბეჭდება, მსოფლიოს 100-ზე მეტ ქვეყანაში ვრცელდება და 60 მილიონზე მეტი მკითხველი ჰყავს. 125 წლის განმავლობაში ამერიკული საზოგადოების დაფინანსებით არაერთი სამეცნიერო ექსპედიცია და პროექტი განხორციელდა. მის ინტერესებში შედის გეოგრაფიის, არქეოლოგიის, საბუნებისმეტყველო მეცნიერებების, მსოფლიო კულტურისა და ისტორიის შესწავლა. National Geographic Society-ის გრანტით გახდა შესაძლებელი საქართველოში დმანისის სამარხების საფუძვლიანი კვლევა და პირველი ევროპელების - ზეზვასა და მზიას აღმოჩენა