ახალი ამბები

ბათუმის შოთა რუსთაველის სახელმწიფო უნივერსიტეტში ვახტანგ გორგასლის I ხარისხის ორდენოსანის, V ქვეითი ბრიგადის კაპრალ ამირან მამალაძის მემორიალური დაფა გაიხსნა. უმაღლესი საგანმანათლებლო დაწესებულების აკადემიურმა საბჭომ აგვისტოს ომში დაღუპული გმირის უკვდავსაყოფად უნივერსიტეტის მცირე სპორტულ დარბაზს სტუდენტ ამირან მამალაძის სახელი მიანიჭა. ახალგაზრდა მებრძოლი ერთადერთი სტუდენტი იყო აჭარის რეგიონიდან, რომელიც 2008 წლის 9 აგვისტოს ოკუპანტების წინააღმდეგ ბრძოლის დროს დაიღუპა. იგი საცეცხლე ზონაში დაჭრილი თანამებრძოლებისა და მეთაურის გამოსაყვანად დაბრუნდა და გმირულად დაეცა. მემორიალური დაფა უნივერსიტეტის რექტორმა, პროფესორმა ალიოშა ბაკურიძემ და დაღუპული გმირის მამამ, გურამ მამალაძემ გახსნეს

საქართველოს განათლებისა და მეცნიერების სამინისტროს უმაღლესი განათლებისა და მეცნიერების განვითარების დეპარტამენტის უფროსი მამუკა ბერიაშვილი ბათუმის შოთა რუსთაველის სახელმწიფო უნივერსიტეტის რექტორთან, პროფესორ ალიოშა ბაკურიძესთან ერთად პროფესორ-მასწავლებლებსა და სტუდენტებს შეხვდა. სამინისტროს წარმომადგენელმა შეხვედრაზე განათლებისა და მეცნიერების რეფორმებსა და უმაღლესი განათლების შესახებ კანონში შესატან ცვლილებებზე ისაუბრა. ყურადღება გაამახვილა უმაღლესი საგანმანათლებლო დაწესებულებების ახალ მმართველობით ორგანოზე - სენატზე, სტატუსზე, ავტონომიურობაზე, საგანმანათლებლო და სამეცნიერო პროგრამებზე, აკადემიური პერსონალის არჩევის წესზე, სტუდენტური პარლამენტის შექმნასა და სხვა მნიშვნელოვან საკითხებზე. მამუკა ბერიაშვილმა სტუდენტებს სადოქტორო პროგრამების დაფინანსების ახალი წესი, გაცვლითი პროგრამები და სტიპენდიები გააცნო. სამინისტროს დაფინანსებით გაიზრდება წიგნების ფონდის ბიუჯეტი და ინტერდისციპლინარული სამეცნიერო პროექტები მეცნიერების სხვადასხვა დარგში. შეხვედრა დიალოგის რეჟიმში წარიმართა და დეპარტამენტის უფროსმა პროფესორ-მასწავლებლებისა და სტუდენტების აქტუალურ შეკითხვებს უპასუხა.

ტურიზმის საერთაშორისო დღეს მიეძღვნა ბათუმის შოთა რუსთაველის სახელმწიფო უნივერსიტეტში გამართული აჭარის ტურიზმისა და კურორტების დეპარტამენტის წარმომადგენლებისა და ტურიზმის ფაკულტეტის სტუდენტების შეხვედრა. დეპარტამენტის თავმჯდომარემ დემურ დიასამიძემ ახალგაზრდებს ტურიზმის პოლიტიკა, განხორციელებული და დაგეგმილი პროექტები გააცნო და რეგიონის სარეკლამო-საინფორმაციო მასალები წარუდგინა. დაიგეგმა ერთობლივი პროექტების შემუშავება და განხორციელება. შეხვედრა კითხვა-პასუხის რეჟიმში წარიმართა და უწყების ხელმძღვანელმა მომავალი კოლეგების აქტუალურ შეკითხვებს უპასუხა.

საერთაშორისო კონფერენცია „ბიზანტიოლოგია საქართველოში - 4“ გაიხსნა ბათუმის შოთა რუსთაველის სახელმწიფო უნივერსიტეტში. კონფერენციის მონაწილეებს სიტყვით მიმართეს უნივერსიტეტის რექტორმა, პროფესორმა ალიოშა ბაკურიძემ, პროფესორმა მარინა გიორგაძემ, იუნესკოს ევრომედიტერანული ინტერკულტურული ცენტრის პრეზიდენტმა, პროფესორმა ტიტიკა სტასინოპულუ-პაპაზისმა და პირეოსის ტექნიკური უნივერსიტეტის პროფესორმა პანოს იანაკოპულოსმა. ბათუმის ხელოვნებისა და კულტურის ცენტრთან არსებულმა ქალთა კამერულმა გუნდმა საგალობლები შეასრულა. სამეცნიერო სესიაში ქართველებთან ერთად ბერძენი, გერმანელი, რუსი, კანადელი, ინგლისელი, უნგრელი, თურქი, სომეხი, უკრაინელი და ლიბანელი პროფესორ-მასწავლებლები და მკვლევრები მონაწილეობენ. მეცნიერები მოხსენებებს ბიზანტინოლოგიის ისტორიულ-თეოლოგიურ ასპექტებზე წარმოადგენენ და ბოლო პერიოდში წარმოებული სამეცნიერო კვლევა-ძიების შედეგებს შეაჯამებენ.

ბათუმის შოთა რუსთაველის სახელმწიფო უნივერსიტეტში ტემპუსის საგრანტო პროექტის „უნივერსიტეტი-საწარმო ურთიერთობის გაუმჯობესება კომპეტენციებზე დაფუძნებული სწავლების გზით სომხეთში, უკრაინასა და საქართველოში“ ფარგლებში სემინარი ტარდება. ხუთი დღის განმავლობაში ბელგიის სანტ-ლიუვენის კათოლიკური უნივერსიტეტის პროფესორი კრის ვან კერი და საფრანგეთის გრენობლის აკადემიის საერთაშორისო ურთიერთობათა სამსახურის წარმომადგენელი ესტერ გრუნკემაიჯერი პროფესორ-მასწავლებლებსა და დოქტორანტებს სიახლეებს გააცნობენ უნივერსიტეტის კურსდამთავრებულთა დამსაქმებლებთან, საწარმოებთან და პარტნიორ ორგანიზაციებთან თანამშრომლობის გაუმჯობესების მექანიზმებზე. სემინარზე განხილული იქნება უნივერსიტეტის განვითარებისთვის ისეთი მნიშვნელოვანი საკითხები, როგორიცაა: დაწესებულების ძლიერი და სუსტი მხარეების ანალიზი, პოლიტიკური და სოციალური რისკების ანალიზი, პროექტების მართვა, საგანმანათლებლო პროგრამის პროფილის განსაზღვრა, დაწესებულების სტრატეგიული გეგმის შემუშავების სპეციფიკა და თავისებურებები.