ახალი ამბები

ნიკო ბერძენიშვილის ინსტიტუტის ორგანიზებით უნივერსიტეტის საკონფერენციო დარბაზში გაიმართა ბრიტანელი გამომცემლის, უნივერსიტეტის საპატიო დოქტორის რობერტ ჯარმანის წიგნის „აჭარა ბრიტანეთის ეროვნულ არქივებში“პრეზენტაცია. რობერტ ჯარმანიმ 2003 წელს, ასლან აბაშიძის ფონდის დაფინანსებით, სამ ტომად გამოსცა ბრიტანეთის ეროვნულ არქივებში აჭარის შესახებ დაცული ცნობები, რომლებიც მოიცავს პერიოდს 1830-იანი წლებიდან 1921 წლამდე. 2009 წელს გამოვიდა სამტომეულის მეორე, შევსებული და რედაქტირებული გამოცემა დოკუმენტების ინგლისურ და რუსულენოვანი აღწერილობებით. გამომცემელმა ასევე წარმოადგინა მესამე გამოცემის მეოთხე ტომის სასიგნალო ეგზემპლიარი, რომელშიც მხოლოდ 1840 წლის მასალებია შესული, რომელთა დოკუმენტების ნაწილი პირველად ქვეყნდება და სრულიად უცნობია ქართული ისტორიოგრაფიისათვის. გამომცემლის აზრით, აჭარის შესახებ არსებული დოკუმენტების სრული სახით გამოცემას ათი ტომი დასჭირდება. საპატიო დოქტორმა უნივერსიტეტს საჩუქრად მეორე და მესამე გამოცემების ტომები გადასცა.

თურქეთის რესპუბლიკის საელჩოსთან არსებული თბილისის იუნუს ემრეს კულტურის ცენტრის ორგანიზებით ბათუმის შოთა რუსთაველის სახელმწიფო უნივერსიტეტში თურქი მხატვრის უმმუგულსუმ ფალას ნახატების გამოფენა მოეწყო. გამოფენას უნივერსიტეტის რექტორი, პროფესორი ალიოშა ბაკურიძე, იუნუს ემრეს კულტურის ცენტრის დირექტორი ბარიშ დემირი და სტუდენტები ესწრებოდნენ. ხელოვანმა სტუდენტებსა და პროფესორ-მასწავლებლებს ებრუს მეთოდით ხატვის სპეციფიკა გააცნო და მათთან ერთად რამდენიმე ნახატი შეასრულა. ებრუს მეთოდით მხატვრობა, ე. წ. წებოს ერთ-ერთი სახეობითა და სპეციალურად დამზადებული საღებავებით კონცენტრირებული წყლით ქაღალდზე გადატანილი დეკორატიული ხელოვნებაა. „ებრუს“, როგორც „თურქულ ქაღალდს“, „მარმარილოს ქაღალდს“ უწოდებენ.

ახალგაზრდობის მომსახურების მსოფლიო დღეს მიეძღვნა ბათუმის შოთა რუსთაველის სახელმწიფო უნივერსიტეტის ტექნოლოგიური ფაკულტეტის სტუდენტებისათვის გამართული „თანატოლთა მენტორობის პროგრამის“ წარდგინება. მშვიდობის კორპუსის ამერიკელმა მოხალისეებმა ელისონ სტივენსმა და რიჩარდ ლეტენდრემ ახალგაზრდებს პროგრამის მნიშვნელობასა და მასში მონაწილეობის პირობებზე ესაუბრენ. პროგრამაში ჩართულობა სტუდენტებს ერთი მხრივ, დაეხმარება სწავლა-სწავლების უნარების გაუმჯობესებასა და დასაქმებაში, მეორე მხრივ, ახალგაზრდები თავის წვლილს შეიტანენ „ათასწლეულის გამოწვევის ფონდი-საქართველოს“ მიერ გამოცხადებულ კონკურსში ფაკულტეტის წარმატების მიღწევაში.

ბათუმის შოთა რუსთაველის სახელმწიფო უნივერსიტეტში ქრისტიანული კვლევის ცენტრისა და ნიკო ბერძენიშვილის ინსტიტუტის ისტორიისა და არქეოლოგიის განყოფილების ორგანიზებით გაიხსნა რიგით მეხუთე საერთაშორისო სამეცნიერო კონფერენცია: „ჩვენი სულიერების ბალავარი“. ორი დღის განმავლობაში ქართველი, რუსი, სომეხი მკვლევრები და საქართველოს საპატრიარქოს წარმომადგენლები 41 მოხსენებას წარმოადგენენ ქართული მართლმადიდებლური ეკლესიის ისტორიაზე, ქრისტიანული სარწმუნოების წიაღში განვითარებულ კულტურასა და ხელოვნებაზე, ეთნიკურ და რელიგიურ ტოლერანტობაზე, კულტურათა დიალოგზე, სწავლებასა და აღზრდაზე. საერთაშორისო სამეცნიერო კონფერენციის მოხსენებები კრებულის სახით უკვე დაიბეჭდა.

შოთა რუსთაველის ეროვნული სამეცნიერო ფონდის დირექტორმა სულხან სისაურმა ბათუმის შოთა რუსთაველის სახელმწიფო უნივერსიტეტის პროფესორ-მასწავლებლებისა და მეცნიერ-თანამშრომლებისათვის 2013 წლის საგრანტო სამეცნიერო კონკურსების თემაზე სემინარი ჩაატარა. სამეცნიერო ფონდის ხელმძღვანელმა მკვლევრებს „გამოყენებითი კვლევებისათვის სახელმწიფო სამეცნიერო გრანტების“, „ფუნდამენტური კვლევებისათვის სახელმწიფო სამეცნიერო გრანტების“ და „უცხოეთში მოღვაწე თანამემამულეთა მონაწილეობით ერთობლივი კვლევებისათვის სახელმწიფო გრანტის“ კონკურსების განხორციელების წესი და მათში მონაწილეობის პირობები გააცნო.