ახალი ამბები

ტექნოლოგიური ფაკულტეტის აგროეკოლოგიისა და სატყეო საქმის დეპარტამენტის ხელმძღვანელი, ასოცირებული პროფესორი დარეჯან ჯაში და სტრატეგიული განვითარების სამსახურის უფროსი, ასისტენტ პროფესორი თეონა ბერიძე ორდღიანი ვიზიტით როსტოკის უნივერსიტეტში (გერმანია) იმყოფებოდნენ. ვიზიტი მიზნად ისახავდა ტექნოლოგიების ფაკულტეტის აგრარულ მეცნიერებათა მიმართულების სასწავლო პროგრამების სრულყოფას, უცხოური გამოცდილების გაზიარებას, ერთობლივი სამეცნიერო და სასწავლო პროგრამების შემუშავებისა, სამომავლო თანამშრომლობის გაღრმავებისა და კონკრეტული სამოქმედო გეგმის შემუშავებას. როსტოკის უნივერსიტეტის აგრარულ მეცნიერებათა ფაკულტეტის დეკანთან, ბატონ ელმარ მოორთან გამართულ შეხვედრაზე დელეგაციის წევრებმა პრიორიტეტულ მიმართულებებზე: მემცენარეობაზე, გარემოს ინჟინერიასა და აქვაკულტურაზე ისაუბრეს.

ტემპუსის პროექტის „უნივერსიტეტი-წარმოება ურთიერთობის გაძლიერება კომპეტენციებზე დაფუძნებული სწავლების გზით“ ფარგლებში ბათუმის შოთა რუსთაველის სახელმწიფო უნივერსიტეტში სემინარი ჩატარდა თემაზე: „უნივერსიტეტისა და წარმოების თანამშრომლობა - გამოცდილებიდან სტრატეგიამდე“. სანტლივენის უმაღლესი კათოლიკური სკოლის პროფესორმა კრის ვან კერიმ (ბელგია), აალენის უნივერსიტეტის პროფესორმა კარინ კადოვიმ (გერმანია), გრენობლის აკადემიის პროფესორმა ესტერ გრუნკემაიჯერიმ (საფრანგეთი) და კოვენტრის უნივერსიტეტის პროფესორმა კუო მინგ ჩაომ (ინგლისი) სემინარის მონაწილეებს გაუზიარეს გამოცდილება უნივერსიტეტების ეკონომიკის სექტორთან თანამშრომლობისა და გამოყენებითი ხასიათის კვლევების, კვლევების კომერციალიზიის საკითხებში. ასევე გააცნეს აჭარაში არსებული რამდენიმე ორგანიზაციისა და უნივერსიტეტის თანამშრომლობის მაგალითები. პროექტის კოორდინატორმა, ასოცირებულმა პროფესორმა ლელა თურმანიძემ წარმოადგინა ბათუმის შოთა რუსთაველის სახელმწიფო უნივერსიტეტის ხედვა სტუდენტთა სტაჟირების, კურსდამთავრებულთა დასაქმებისა და ინოვაციური კვლევების წარმოებასთან დაკავშირებით.

განათლებისა და მეცნიერებათა ფაკულტეტის მასწავლებლის მომზადების საგანმანათლებლო პროგრამის III და IV კურსის სტუდენტები სწავლების მეთოდიკის ხელმძღვანელთან მადონა მიქელაძესთან ერთად, პროექტის: „თანამშრომლობა უკეთესი მომავლისთვის“ ფარგლებში ქედის, შუახევისა და ხულოს საჯარო სკოლებს ეწვივნენ. ახალგაზრდებმა ზოგადსაგანმანათლებლო დაწესებულებებში სოციოლოგიური გამოკითხვა ჩაატარეს ისტორიისა და სამოქალაქო სწავლების საკითხებზე და სკოლებს ბათუმის შოთა რუსთაველის სახელმწიფო უნივერსიტეტისა და მასწავლებელთა ასოციაციის სახელით საჩუქრად წიგნები გადასცეს. პროექტი მიზნად ისახავს სკოლისა და უნივერსიტეტის სამეცნიერო–კვლევითი საქმიანობის ინტეგრირებას, მასწავლებლის განათლების ახალი საზრისისა და დანიშნულების განსაზღვრასა და არსებული მდგომარეობის ანალიზს.

მაღალმთიან აჭარაში ტურიზმის განვითარებისა და მიგრაციის შემცირების საკითხებს მიეძღვნა ბათუმის შოთა რუსთაველის სახელმწიფო უნივერსიტეტში გამართული შეხვედრა. მიუნხენის გამოყენებით მეცნიერებათა უნივერსიტეტის ტურიზმის ფაკულტეტის 20-კაციანი დელეგაციის წევრებმა ხულოს მუნიციპალიტეტში განხორციელებული ტურისტული ტურის შედეგები წარმოადგინეს. ერთი კვირის განმავლობაში გერმანელი სტუდენტები გერმანიის განათლების სამინისტროს მხარდაჭერითა და მიუნხენის გამოყენებით მეცნიერებათა უნივერსიტეტის ტურიზმის ფაკულტეტის დეკანის თეო ებერჰალდის ხელმძღვანელობით მაღალმთიან რეგიონში ფოლკლორს, ქართულ ტრადიციებსა და სამზარეულოს ეცნობოდნენ. უცხოელი სპეციალისტების შეფასებით, შესაძლებელია ტურიზმი მაღალმთიანი აჭარის მოსახლეობისთვის ახალი შემოსავლის წყარო გახდეს.

შოთა რუსთაველის დარბაზში სოციალურ მეცნიერებათა, ბიზნესისა და სამართალმცოდნეობის ფაკულტეტის სტუდენტებისათვის როსტოკის უნივერსიტეტის ეკონომიკურ და პოლიტიკურ მეცნიერებათა ფაკულტეტის დეკანმა, პროფესორმა მაიერ ცუ ნატრუპიმ საჯარო ლექცია წაიკითხა თემაზე: „ეკონომიკური კრიზისი ევროპაში“. მომხსენებელმა კრიზისის გამომწვევ მიზეზებზე, მათი დაძლევის გზებზე და ევროკავშირში შემავალი ქვეყნების ეკონომიკური განვითარების ჰომოგენურობის აუცილებლობაზე ისაუბრა. ყურადღება გაამახვილა ასევე ევროკავშირის, როგორც პოლიტიკური გაერთიანების დადებით და უარყოფით მხარეებზე. საჯარო ლექციის დასასრულს დისკუსია გაიმართა და მკვლევარმა სტუდენტების შეკითხვებს უპასუხა.