ახალი ამბები

ტურიზმის ფაკულტეტმა ერთობლივი პროექტის ,,ნორვეგიაში, საქართველოსა და ყირგიზეთში ტურიზმის მდგრადი განვითარებისა და ინოვაციების სფეროში განათლება“ მეორე ეტაპის განხორციელება დაიწყო. პროექტით გათვალისწინებულია ყოველწლიურად ტურიზმის ფაკულტეტის 3 სტუდენტის ერთწლიანი სწავლება ნორვეგიის ტელემარკის უნივერსიტეტში. კონკურსში მონაწილეობა 40 სტუდენტმა მიიღო. პირველი ეტაპის გამარჯვებულ ათ მონაწილეს ტელემარკის უნივერსიტეტის პროფესორებმა თემურ აბესაძემ და ფრუდე ლიენგიმ ერთკვირიანი ტრენინგი ჩაუტარეს და ოთხი საუკეთესო კონკურსანტი შეარჩიეს. კონკურსის პირობები ინგლისურ ენაში ტესტირებას, აკადემიურ მოსწრებასა და კულტურათაშორისი კომუნიკაციის უნარს ითვალისწინებდა. ტურიზმის ფაკულტეტის სტუდენტები: სოფო ფოფხაძე, ავთანდილ საგინაძე და ერეკლე ჩიკვაიძე ნორვეგიის ტელემარკის უნივერსიტეტში „ტურიზმის მენეჯმენტის“ ერთწლიან, ხოლო გურანდა ბაგრატიონი ეკოლოგიის მიმართულებით მაგისტრატურის ორწლიან სასწავლო პროგრამას გაივლის. უნივერსიტეტის რექტორმა, პროფესორმა ალიოშა ბაკურიძემ და ფაკულტეტის დეკანებმა სტუდენტებს გამარჯვება მიულოცეს და წარმატებები უსურვეს.

სააქტო დარბაზში ბათუმის შოთა რუსთაველის სახელმწიფო უნივერსიტეტისა და სკოლის “ევრო 2000”-ის ერთობლივი პროექტის „ფრანკოფონიის“ ფარგლებში ფრანკოფონიის საერთაშორისო დღისადმი მიძღვნილი კონცერტი ჩატარდა. საღამოს მონაწილეებმა კვირეულის ეგიდით ჩატარებული ღონისძიებები შეაფასეს და კიდევ ერთხელ ხაზი გაუსვეს ქართულ-ფრანგული კულტურის ურთიერთობებს. კონცერტის დასასრულს, უნივერსიტეტის რექტორის მოადგილემ ირაკლი ბარამიძემ ბსუ-ში ჩატარებული კონკურსის ,,BONJOUR la FRANCE“-ის გამარჯვებულებს სერტიფიკატები და სამახსხოვრო საჩუქრები გადასცა.

ბათუმის შოთა რუსთაველის სახელმწიფო უნივერსიტეტის სპორტულ დარბაზში აჭარის ღია ჩემპიონატი გაიმართა მკლავჭიდში. შეჯიბრი ხუთ წონით კატეგორიაში ჩატარდა და მასში 80-მდე სპორტსმენთან ერთად უმაღლესი საგანამათლებლო დაწესებულების გუდნი „დარია“ მონაწილეობდა. ახალგაზრდებმა ტურნირში წარმატებით იასპარეზეს და ორი ოქროს, რვა ვერცხლისა და ოთხი ბრინჯაოს მედალი მოიპოვეს. გამარჯვებული სტუდენტები: ონისე თავართქილაძე, ზაზა ვაშაყმაძე, არჩილ ხოზრევანიძე, ფირუზ ჭელიძე, პაატა შავაძე და ანდრეი ფედორინოვი მონაწილეობას მიიღებენ საქართველოს ჩემპიონატში, რომელიც თბილისში, 10 აპრილს გაიმართება.

ფუტსალის საუნივერსიტეტო ლიგის მორიგი შეხვედრა გაიმართა უნივერსიტეტის სპორტულ დარბაზში. ერთმანეთს ბათუმის შოთა რუსთაველის სახელმწიფო უნივერსიტეტისა და ზუგდიდის სახელმწიფო უნივერსიტეტის გუნდები დაუპირისპირდნენ. პირველობა ანგარიშით, 3:2 ბსუ-ს გამარჯვებით დასრულდა. 30 მარტს, ბათუმისა და ქუთაისის სახელმწიფო უნივერსიტეტების გუნდების შეხვედრა გაიმართება. საუნივერსიტეტო ლიგა ფუტსალში საქართველოს სპორტისა და ახალგაზრდობის საქმეთა სამინისტროს მხარდაჭერითა და საქართველოს საუნივერსიტეტო სპორტის ფედარაციის ორგანიზებით ტარდება.

შოთა რუსთაველის დარბაზში ამერიკელი ავტორების ბრენტ რითჩისა და ჩარლზ გელდნერის ,,ტურიზმი: საფუძვლები, პრაქტიკა, თეორია“ პოპულარული სახელმძღავნელოს ქართულენოვანი გამოცემის წარდგინება გაიმართა. წიგნი ბათუმის შოთა რუსთაველის სახელწმიფო უნივერსიტეტის ტურიზმის ფაკულტეტმა თარგმნისა და გამოცემის ექსკლუზიური უფლების საფუძველზე საქართველოში აშშ-ის საელჩოს ფინანსური მხარდაჭერით გამოსცა. სახელმძღვანელოს მეთორმეტე გამოცემა ტურიზმის ძირითად ცნებებსა და შესაძლებლობებს იკვლევს, მიუთითებს, როგორ შეიძლება იქცეს ტურიზმი ნებისმიერი ერის მატერიალური კეთილდღეობის უზრუნველყოფის მნიშვნელოვან ფაქტორად. ყურადღება ეთმობა ტურიზმის გლობალურ ზეგავლენას როგორც ეკონომიკურ, ისე სოციალურ სფეროზე. წიგნი რეკომენდებულია ტურიზმის სპეციალობის სტუდენტებისა და პედაგოგებისათვის, ტურიზმის ინდუსტრიის კომპანიების მფლობელებისა და მენეჯერებისათვის, აგრეთვე ტურიზმით დაინტერესებული მკითხველისათვის