ახალი ამბები

შოთა რუსთაველის დარბაზში ამერიკელი ავტორების ბრენტ რითჩისა და ჩარლზ გელდნერის ,,ტურიზმი: საფუძვლები, პრაქტიკა, თეორია“ პოპულარული სახელმძღავნელოს ქართულენოვანი გამოცემის წარდგინება გაიმართა. წიგნი ბათუმის შოთა რუსთაველის სახელწმიფო უნივერსიტეტის ტურიზმის ფაკულტეტმა თარგმნისა და გამოცემის ექსკლუზიური უფლების საფუძველზე საქართველოში აშშ-ის საელჩოს ფინანსური მხარდაჭერით გამოსცა. სახელმძღვანელოს მეთორმეტე გამოცემა ტურიზმის ძირითად ცნებებსა და შესაძლებლობებს იკვლევს, მიუთითებს, როგორ შეიძლება იქცეს ტურიზმი ნებისმიერი ერის მატერიალური კეთილდღეობის უზრუნველყოფის მნიშვნელოვან ფაქტორად. ყურადღება ეთმობა ტურიზმის გლობალურ ზეგავლენას როგორც ეკონომიკურ, ისე სოციალურ სფეროზე. წიგნი რეკომენდებულია ტურიზმის სპეციალობის სტუდენტებისა და პედაგოგებისათვის, ტურიზმის ინდუსტრიის კომპანიების მფლობელებისა და მენეჯერებისათვის, აგრეთვე ტურიზმით დაინტერესებული მკითხველისათვის

ბაქოს ბიზნესის უნივერსიტეტს 20 წლის საიუბილეო ღონისძიებებთან დაკავშირებით, სამდღიანი ვიზიტით სოციალურ მეცნიერებათა, ბიზნესისა და სამართალმცოდნეობის ფაკულტეტის პროფესორები: ასიე ცინცაძე, ბადრი გეჩბაია და საგარეო ურთიერთობათა დეპარტამენტის უფროსი ნანა ყურშუბაძე ეწვივნენ. ვიზიტის ფარგლებში ხელი მოეწერა მემორანდუმს ბაქოს ბიზნესის უნივერსიტეტსა და ბათუმის შოთა რუსთაველის სახელმწიფო უნივერსიტეტს შორის, რომელიც ერთობლივი პროგრამების, საზაფხულო სკოლებისა და გაცვლითი პროგრამების განხორციელებას ითვალისწინებს. დაიგეგმა სტუდენტების გაცვლა ერთი სემესტრით უცხო ენის მიმართულებით. დელეგაციის წევრები დაესწრნენ კონფერენციას თემაზე: „სწავლების ხარისხის გაუმჯობესების ახალი მიდგომების მნიშვნელობა“. ღონისძიებაში მონაწილე უცხოეთის სხვადასხვა უმაღლეს საგანმანათლებლო დაწესებულებებთან დაიგეგმა სამომავლო თანამშრომლობის კონკრეტული მიმართულებები

1921 წლის კონსტიტუციის მიღების 92 წლისადმი მიძღვნილი ღონისძიების ფარგლებში საქართველოს საკონსტიტუციო სასამართლოს თავმჯდომარემ გიორგი პაპუაშვილმა ბათუმის შოთა რუსთაველის სახელმწიფო უნივერსიტეტის სამართალმცოდნეობის სპეციალობის სტუდენტებს ლექცია წაუკითხა თემაზე: “1921 წლის კონსტიტუციის სამართლებრივი ასპექტები“. მოხსენებები წარმოადგინეს ასევე ბსუ-ს პროფესორებმა ნუგზარ ფუტკარაძემ, მალხაზ ნაკაშიძემ და ოთარ გოგოლიშვილმა ისეთ მნიშვნელოვან საკითხებზე, როგორიცაა: „1921 წლის 21 თებერვლის კონსტიტუციით გათავალისწინებული ადამიანის ძირითად უფლებები“, „მმართველობის სისტემის ძირითადი თვისებები საქართველოს 1921 წლის 21 თებერვლის კონსტუტუციის მიხედვით“ და „საზოგადოებრივ-პოლიტიკური ვითარება ბათუმში 1921 წლის თებერვალ-მარტში“. საქართველოს საკონსტიტუციო სასამართლოში ასევე გაიმართა ქვეყნის პირველი კონსტიტუციის მიღების ამსახველი ფოტოგამოფენა

ბათუმის შოთა რუსთაველის სახელმწიფო უნივერსიტეტის რექტორი, პროფესორი ალიოშა ბაკურიძე, ადმინისტრაციის ხელმძღვანელი ედიშერ ჩავლეიშვილი და პროფესორ-მასწავლებლები აჭარის განათლების, კულტურისა და სპორტის მინისტრს გიორგი თავამაიშვილსა და მინისტრის მოადგილეს ვალერი ბერაძეს შეხვდნენ. მხარეებმა ფიზიკური განათლებისა და სპორტის განვითარების კონცეფცია განიხილეს. შეხვედრაზე სამინისტროსა და უმაღლესი საგანმანათლებლო დაწესებულების 2014 წლის პრიორიტეტების შემუშავებასა და აჭარაში სპორტის მასწავლებელთა და მწვრთნელთა კვალიფიკაციის ამაღლებაზე იმსჯელეს.

ბათუმის ხელოვნებისა და მუსიკის ცენტრში ბათუმის შოთა რუსთაველის სახელმწიფო უნივერსიტეტმა ღია კარის დღე გამართა. აბიტურიენტები და საზოგადოების წარმომადგენლები უმაღლესი საგანმანათლებლო დაწესებულების საგანმანათლებლო პროგრამებს, სტიპენდიებს, საუნივერსიტეტო ცხოვრებას, სოციალურ, გაცვლით პროგრამებსა და სიახლეებს გაეცნენ. 2013-2014 სასწავლო წელს ბსუ-ს 40-მდე საბაკალავრო საგანმანათლებლო პროგრამაზე 1075 პირველკურსელი ჩაირიცხება. მათგან ექვსი სასწავლო პროგრამა (ქართული ფილოლოგია, მათემატიკა, ფიზიკა ასტრონომიით, ბიოლოგია, აგრონომია და მშენებლობა) სრული სახელმწიფო დაფინანსებით განხორციელდება. ღია კარის დღე კონცერტით დასრულდა, რომელშიც მონაწილეობა მიიღეს უნივერსიტეტის სტუდენტებმა და კურსდამთავრებულებმა: ლუკა ზაქარიაძემ, თამუნა მიქელაძემ, თეონა ჩიტიშვილმა, სოფო პაპუაშვილმა, ქორეოგრაფიულმა ანსამბლმა ,,ტბეთმა“, თანამედროვე ცეკვების ჯგუფმა ,,M style 13”-მა, ქართული ხალხური და საესტრადო სიმღერის ანსამბლებმა. უნივერსიტეტის რექტორმა, პროფესორმა ალიოშა ბაკურიძემ სოციალურ მეცნიერებათა, ბიზნესისა და სამართალმცოდნეობის ფაკულტეტის II კურსის სტუდენტს, ტელეპროექტის ,,საქართველოს ვარსკვლავის“ გამარჯვებულს ლუკა ზაქარიაძეს უმაღლესი საგანმანათლებლო დაწესებულების პოპულარიზაციისათვის დიპლომი გადასცა და სწავლის გადასახადისაგან გაათავისუფლა.
10 მარტი 2013 წელი