ახალი ამბები

საქართველოს პარლამენტის ეროვნულ ბიბლიოთეკაში ბათუმის შოთა რუსთაველის სახელმწიფო უნივერსიტეტის ნიკო ბერძენიშვილის ინსტიტუტის ორგანიზებით „სამხრეთ–დასავლეთ საქართველოს ისტორიის ნარკვევების“ IV ტომის („აჭარა. 1921–1990 წლები“) პრეზენტაცია გაიმართა. წარდგინებაზე მკვლევრებმა წიგნის სტრუქტურაზე, მისი დაწერის ისტორიასა და ოთხტომეულის გამოცემის მნიშვნელობაზე ისაუბრეს. ნარკვევი სამეცნიერო-კვლევითი ცენტრის მეცნიერთა ჯგუფმა ოთარ თურმანიძის რედაქტორობით მოამზადა.

ბათუმის შოთა რუსთაველის სახელმწიფო უნივერსიტეტისა და ქუთაისის სახელმწიფო უნივერსიტეტის გუნდების შეხვედრა ფუტსალში ფრედ, ანგარიშით 2:2 დასრულდა. საუნივერსიტეტო ლიგის „ე“ ქვეჯგუფში მოასპარეზე უმაღლეს საგანმანათლებლო დაწესებულებებს შორის ყველაზე წარმატებული გუნდი „ბსუ“ მორიგ შეხვედრებს თბილისში 9-13 აპრილს გამართავს. პირველობა საქართველოს სპორტისა და ახალგაზრდობის საქმეთა სამინისტროს მხარდაჭერითა და საქართველოს საუნივერსიტეტო სპორტის ფედარაციის ორგანიზებით იმართება.

აჭარის უმაღლესი საბჭოს ჯანმრთელობის და სოციალურ საკითხთა კომისიის თავმჯდომარე ჯემალ ფუტკარაძე, აჭარის ჯანმრთელობის და სოციალური დაცვის მინისტრი ნუგზარ სურმანიძე და საქართველოს რესპირაციული ასოციაციის გამგეობის თავმჯდომარე ივანე ჩხაიძე ბათუმის შოთა რუსთაველის სახელმწიფო უნივერსიტეტის რექტორს, პროფესორ ალიოშა ბაკურიძეს შეხვდნენ. ვიზიტი მიზნად ისახავდა 2013 წლის 6-8 ივნისს, ბათუმში, სასტუმრო შერატონში დაგეგმილი ასთმის და ალერგიის საერთაშორისო კონგრესის საორგანიზაციო საკითხების მოგვარებას. შეხვედრაზე მხარეებმა განიხილეს კონგრესის მოსამზადებელი სამუშაოს მიმდინარეობა, კონგრესის მუშაობაში რიზეს და ტრაპზონის უნივერსიტეტის რექტორთა მონაწილეობის საკითხები და სამეცნიერო პროგრამის დეტალები. ასევე გამოითქვა რამდენიმე მოსაზრება სამეცნიერო სესიების თავმჯდომარეებთან, სოციალურ პროგრამასთან, გახსნის ცერემონიასთან, ტექნიკურ საკითხებში უნივერსიტეტის სტუდენტების მონაწილეობასთან დაკავშირებით

ცნობილი პუბლიცისტი და ჟურნალისტი იგორ ობოლენსკი ბათუმის შოთა რუსთაველის სახელმწიფო უნივერსიტეტის სტუდენტებს, პროფესორ-მასწავლებლებსა და საზოგადოების წარმომადგენლებს შეხვდა. პუბლიცისტმა შოთა რუსთაველის დარბაზში ლექცია წაიკითხა თემაზე: „ქართველ ქალთა და მამაკაცთა ისტორია (სილამაზის ბედი და ღირსების ფასი)“ და აქტუალურ შეკითხვებს უპასუხა. ლექციის დასასრულს იგორ ობოლენსკის ბაბო დადიანისადმი მიძღვნილი დოკუმენტური ფილმის „ბაბოს“ ჩვენება და წიგნების წარდგინება გაიმართა.

აჭარის ა.რ. სპორტისა და ახალგაზრდობის საქმეთა დეპარტამენტის ხელმძღვანელმა მერაბ ნაგერვაძემ და ბათუმის მერიის სპორტისა და ახალგაზრდობის განყოფილების უფროსმა ნინო კახიძემ ბათუმის შოთა რუსთაველის სახელმწიფო უნივერსიტეტის სტუდენტებს 2013 წლის ახალგაზრდული პროგრამები წარუდგინეს. სტუდენტებს მიმდინარე და განხორციელებული პროექტები გააცნეს და პროგრამებში აქტიური მონაწილეობისაკენ მოუწოდეს. შეხვედრას ჩეხეთის რესპუბლიკის ატაშე საქართველოში ალბერტ შიდო ესწრებოდა. წარდგინება არასამთავრობო ორგანიზაცია "პროგრესის" ორგანიზებით პროექტ "ჩვენ - თვითმმართველობას" ფარგლებში გაიმართა.